Zezi i swazir douz zapot

Apre ki Zezi ti’n prese pour apepre enn an edmi, i ti bezwen fer en desizyon enportan. Lekel ki i ti pou swazir pour travay avek li? Lekel ki i ti pou formen pour responsab kongregasyon Kretyen? Pour fer sa bann desizyon, Zezi ti anvi Zeova i gid li. Alor, i ti al lo en montanny kot i ti pou li tousel e i ti priye tou lannwit. Son lannmen bomaten, Zezi ti rasanble serten son bann disip e i ti swazir 12 zapot. Lekel ki ou konnen? Zot non ti Pyer, Andre, Zak, Zan, Filip, Bartelemi, Toma, Matye, Zak garson Alfe, Tade, Simon ek Zida Iskaryot.

Sa douz zapot ti al partou avek li. Apre ki Zezi ti’n form zot, i ti anvoy zot tousel pour prese. Zeova ti donn zot pouvwar pour sas demon e pour geri bann malad.

Zezi ti konsider son douz zapot konman son bann zanmi e i ti annan konfyans dan zot. Pour bann Farizyen, bann zapot ti bann dimoun ordiner san ledikasyon. Me Zezi ti form zot pour fer sa travay. Zot ti pou avek Zezi dan bann moman pli enportan dan son lavi parey avan son lanmor ek apre son rezireksyon. Parey Zezi, laplipar son bann zapot ti sorti Galile e serten ti marye.

Bann zapot ti bann dimoun enparfe ki ti fer fot. Parfwa zot ti koze san reflesir e zot ti fer bann move desizyon. Par ler zot ti napa pasyans. Zot ti menm argimante konsernan lekel ki pli enportan. Me zot ti bann bon dimoun ki ti kontan Zeova. Zot ti pou bann premye manm dan kongregasyon Kretyen. Zot ti pou zwe en rol enportan dan kongregasyon ler Zezi i ale.