Konman ki Konsey Direkter i Diferan Avek en Lasosyasyon Legal
DEPI Zanvye 1885, miting Lasosyete Watch Tower Bible and Tract of Pennsylvania pe ganny fer tou le-z-an. Ler rasanbleman bann Kretyen swazir ti pe arive dan bann dernyen peryod diznevyenm syek, bann direkter ek zofisye sa lasosyasyon ti annan lesperans seles. Annefe, sa in leka preski toultan.
Ti annan en leksepsyon. An 1940, Hayden C. Covington—ki ti avoka Lasosyete sa letan e enn parmi “lezot mouton,” avek lesperans teres—ti ganny elekte konman en direkter Lasosyete. (Zan 10:16) I ti servi konman vis prezidan Lasosyete depi 1942 ziska 1945. Apre, Frer Covington ti aret servi konman en manm lo bord pour konform avek sa ki ti paret lavolonte Zeova—ki tou direkter ek zofisye lo bord lasosyete Watchtower of Pennsylvania i bann Kretyen swazir. Lyman A. Swingle ti ranplas Hayden C. Covington lo bord bann direkter, e Frederick W. Franz ti ganny elekte vis prezidan.
Akoz ki bann serviter Zeova ti krwar ki tou bann direkter ek zofisye Lasosyete Watch Tower Bible and Tract of Pennsylvania i devret bann Kretyen swazir? Sa letan, bord bann direkter ek zofisye lasosyasyon Pennsylvania ti resanble bokou avek Konsey Direkter Temwen Zeova, ki’n toultan formen antyerman par bann zonm swazir par lespri.
En Miting Annyel Istorik
Dan miting annyel ki ti fer le 2 Oktob, 1944, an Pittsburgh, bann manm lasosyasyon Pennsylvania ti adopte sis rezolisyon pour pas bann amannman lo dokiman konstitisyon sa lasosyasyon. Sa dokiman ti’n fer provizyon ki drwa pour vote i ganny donnen avek bann ki kontribye bann resours anver travay Lasosyete, me trwazyenm amannman ti elimin sa provizyon. En rapor lo sa miting annyel ti note: “Lakantite manm Lasosyete pou ganny limite pa plis ki 500 . . . Sak manm ki ganny swazir i devret en serviter aplentan oubyen en serviter amitan dan en group [kongregasyon] temwen Zeova e i devret montre leta lespri Senyer.”
Apartir sa moman, bann direkter Lasosyete ti ganny elekte pour en serten fonksyon par bann endividi ki ti antyerman devoue avek Zeova, san pran an konsiderasyon lakantite larzan ki zot ti’n kontribye pour avans travay Rwayonm. Sa ti al byen an akor avek amelyorasyon progresif ki’n ganny predir dan Izai 60:17, kot nou lir: “Olye kwiv mon pou anmenn lor, olye feray mon pou anmenn larzan, olye dibwa ek kwiv e olye bann ros ek feray; mon pou etabli lape konman ou bann sirveyan e ladrwatir konman bann ki donn ou latas.” Par mansyonn “bann sirveyan” ek “bann ki donn latas,” sa profesi ti pe endik bann amelyorasyon dan fason organize pep Zeova.
Sa mezir enportan pour anmenn lorganizasyon anliny avek fason teokratik ti vin alafen sa “de mil trwa san lannwit ek bomaten,” ki ganny mansyonnen dan Danyel 8:14. A sa moman, “landrwa sen” ti ganny “anmennen dan son vre kondisyon.”
Sepandan apre sa miting annyel istorik an 1944, ti reste en kestyon esansyel. Vi ki sa letan Konsey Direkter ti parey avek lasosyasyon Pennsylvania ki ti annan set manm lo bord direkter, eski sa i vedir ki Konsey Direkter pa pou zanmen kapab ganny formen par plis ki set Kretyen swazir? Deplis, vi ki bann direkter ti ganny elekte par bann manm lasosyasyon, eski bann manm lasosyasyon ti pou elekte bann manm Konsey Direkter dan miting annyel sak lannen? Eski bann direkter ek zofisye Lasosyete Watch Tower Bible and Tract of Pennsylvania ek bann manm Konsey Direkter zot menm parey, oubyen eski zot diferan?
En Lot Miting Annyel Memorab
Sa bann kestyon ti ganny reponn dan miting annyel ki ti fer le 1 Oktob, 1971. Pour sa lokazyon, enn bann orater ti fer resorti ki konsey direkter “lesklav fidel e pridan” ti egziste avan Lasosyete Watch Tower Bible and Tract of Pennsylvania pour plizyer santenn lannen. (Matye 24:45-47) En konsey direkter ti ganny formen lannen 33 N.L. zour Lapannkot, plis ki 18 syek avan ki lasosyasyon Pennslyvania ti vin an egzistans. Okonmansman, konsey direkter ti konpoze non pa par 7 zonm, me par 12 zapot. Evidaman, son lakantite manm ti ogmante plitar, akoz “bann zapot ek bann ansyen an Zerizalenm” ti pe dirize.—Akt 15:2.
An 1971, sa menm orater ti eksplike ki bann manm Lasosyete Watch Tower pa ti pou kapab elekte bann manm swazir lo bord Konsey Direkter. Akoz? I ti dir: “Parski konsey direkter, sa ‘lesklav’ pa ganny apwente par okenn zonm. I ganny apwente par . . . Zezi Kri, Sef vre kongregasyon Kretyen, Senyer ek Met group ‘lesklav fidel e pridan.’ ” I ti kler alor ki bann manm Konsey Direkter pa kapab ganny elekte dan zot fonksyon par bann manm okenn lasosyasyon legal.
Sa orater ti kontinyen an fezan sa deklarasyon tre enportan: “Konsey Direkter napa zofisye parey Bord Direkter Lasosyete i annan, tel konman prezidan, vis prezidan, sekreter-trezorye ek asistan sekreter-trezorye. I annan selman en tyermenn.” Pour bokou lannen, prezidan lasosyasyon Pennsylvania ti osi en manm prensipal dan Konsey Direkter. Sa ti pou nepli leka. Kantmenm zot pa ti egal dan leksperyans oubyen kapasite, bann manm Konsey Direkter ti pou egal dan responsabilite. Sa orater ti azoute: “Nenport manm konsey direkter i kapab tyermenn san anmenmtan prezidan . . . Lasosyete . . . I tou depan lo lekel ki tyermenn dan Konsey Direkter dapre sistenm rotasyon.”
Dan sa miting annyel memorab an 1971, en distenksyon ti klerman ganny fer ant bann Kretyen swazir ki manm Konsey Direkter ek bann direkter lasosyasyon Pennsylvania. Toudmenm, bann manm Konsey Direkter ti kontinyen servi konman bann direkter ek zofisye Lasosyete. Ozordi, sepandan, sa kestyon i souleve: Eski i annan okenn rezon Biblik akoz ki bann direkter Lasosyete Watch Tower Bible and Tract of Pennsylvania i devret bann manm Konsey Direkter?
Larepons se non. Lasosyasyon Pennsylvania i pa sa sel lasosyasyon legal ki ganny servi par bann Temwen Zeova. I annan lezot. Enn se Lasosyete Watchtower Bible and Tract of New York, Incorporated, ki fasilit nou travay dan Letazini. Zeova in klerman beni sa lasosyasyon, kantmenm lamazorite son bann direkter ek zofisye i form parti “lezot mouton.” Lasosyasyon Enternasyonal bann Etidyan Labib i ganny servi an Langleter. Lezot lasosyasyon legal i ganny servi pour promot bann lentere Rwayonm dan lezot pei. Zot tou zot ede dan larmoni e zot annan en rol pour fer bon nouvel ganny prese dan lemonn antye. Nenport ki landrwa zot ete oubyen nenport ki ki servi konman direkter oubyen zofisye, sa bann lasosyasyon i ganny gide dan en fason teokratik e zot ganny servi par Konsey Direkter. An konsekans, bann tel lasosyasyon i ganny servi pour akonpli serten latas ki fer avanse lentere Rwayonm.
I dan nou benefis pour annan bann lasosyasyon legal. Par zot, nou konform avek bann lalwa legal e nasyonal, parey Parol Bondye i demande. (Zeremi 32:11; Romen 13:1) Bann lasosyasyon legal i fasilit nou travay pour propaz mesaz Rwayonm par enprim Labib, liv, magazin, brosir, ek lezot keksoz. Bann tel lasosyasyon i osi servi konman bann lenstriman legal pour okip drwa pour propriyete, bann led sekour, bann kontra pour servi bann fasilite lasanble, ek lezot. Nou apresye servis ki sa bann lasosyasyon legal i donnen.
Non Zeova i Ganny met Annavan
An 1944, lartik 2 dan dokiman konstitisyon Lasosyete Watch Tower Bible and Tract of Pennsylvania ti ganny amande pour met lanfaz lo bann lobzektif sa lasosyasyon. Dapre sa dokiman, bann lobzektif Lasosyete i enkli sa lobzektif prensipal: “Pour pres levanzil rwayonm Bondye, anba Kris Zezi, dan tou nasyon konman en temwannyaz pour non, parol ek sipremasi Bondye Tou-Pwisan, ZEOVA.”
Depi 1926, ‘lesklav fidel’ in anmenn non Zeova devan. Sirtou an 1931, ler bann Etidyan Labib ti adopte sa non Temwen Zeova. (Izai 43:10-12) Bann piblikasyon Lasosyete ki’n met lanfaz lo non Bondye i enkli bann liv parey Jehovah (1934), “Let Your Name Be Sanctified” (1961), ek “The Nations Shall Know That I Am Jehovah”—How? (1971).
En mansyon spesyal i bezwen ganny fer lo Les Saintes Écritures Traduction du monde nouveau, pibliye an antye dan langaz Angle an 1960. I kontyen non Zeova dan tou landrwa kot sa Tetragram i aparet dan Lekritir Ebre. Sa tradiksyon i osi enkli sa non divin dan 237 landrwa dan Lekritir Grek kot analiz oprofon ti endike ki sa ti zistifye. Eski nou pa rekonesan ki, dan plizyer fason, Zeova in permet “lesklav” ek son Konsey Direkter itiliz zot mwayen pour pibliye ensi ki bann lasosyasyon legal pour fer konnen son non dan lemonn antye!
Distribisyon Parol Bondye i Ganny Promouvwar
Pep Zeova in konstaman rann temwannyaz lo son non e zot in soutenir son Parol par pibliy e distribye plizyer milyon piblikasyon baze lo Labib osi byen ki Labib li menm. Boner dan bann lannen 1900, Lasosyete Watch Tower ti vin propriyeter kopirayt The Emphatic Diaglott, en edisyon ki pour sak laliny teks Grek ti annan son versyon Angle, pour Lekritir Grek tradwi par Benjamin Wilson. Lasosyete ti pibliy edisyon bann Etidyan Labib, versyon Labib King James, ki ti enkli en 500 paz lenformasyon siplemanter. An 1942, i ti pibliy tradiksyon Labib King James avek bann referans anba lo paz. Apre an 1944, Lasosyete ti konmans enprim tradiksyon Labib American Standard Version pibliye an 1901, ki servi sa non divin. Non Zeova ti osi en laspe dan The Bible in Living English, par Stephen T. Byington, ki ti ganny pibliye par Lasosyete an 1972.
Bann lasosyasyon legal ki ganny servi par bann Temwen Zeova in ede pour enprim e distribye tou sa bann tradiksyon Labib. Sepandan sa ki pli remarkab, se sa korperasyon etrwat ant Lasosyete Watch Tower ek sa group Temwen Zeova, ki annan lesperans seles, ki ti form Komite Tradiksyon Labib Nouvo Monn. Nou zwaye ki ziska prezan i annan plis ki 106,400,000 kopi sa tradiksyon ki’n ganny enprimen dan 38 langaz swa an antye ou an parti. Lasosyete Watch Tower Bible and Tract Pennsylvania i vreman en Lasosyete Labib!
‘Lesklav fidel’ in ganny ‘apwente lo tou byen son met.’ Sa i enkli bann fasilite dan biro prensipal dan leta New York, Lanmerik, ek sa 110 brans ki pe fonksyonnen dan lemonn antye. Bann manm sa group lesklav i konnen ki zot pou ganny apele pour rann kont lo lafason ki zot in servi bann keksoz ki’n ganny konfye avek zot. (Matye 25:14-30) Toudmenm, sa pa’n anpes ‘lesklav’ permet bann sirveyan kalifye parmi “lezot mouton” pour pran swen bann responsabilite legal ek ladministrasyon. Annefe, sa i permet bann manm Konsey Direkter pour dedye plis letan “pour lapriyer ek pour predikasyon.”—Akt 6:4.
Otan ki bann kondisyon dan sa monn i permet, Konsey Direkter, ki pe reprezant “lesklav fidel e pridan,” pou itiliz bann lasosyasyon legal. Sa bann lasosyasyon i itil, me zot pa endispansab. Si en lasosyasyon i ganny disoud par desizyon gouvernman, travay predikasyon pou kontinyen kantmenm sa. Menm konmela, dan bann pei kot i annan restriksyon e kot napa bann lasosyasyon legal ki pe ganny servi, mesaz Rwayonm pe ganny anonse, bann disip pe ganny fer, e ogmantasyon teokratik pe kontinyen. Sa pe arive parski Temwen Zeova i plante e aroze, e ‘Bondye i kontinyen fer pouse.’—1 Korentyen 3:6, 7.
Ler nou regard lavenir, nou annan konfyans ki Zeova pou pran swen bezwen spirityel e materyel son pep. Li ek son Garson, Zezi Kri, pou kontinyen fourni gidans seles ek sipor neseser pour konplet travay predikasyon lo Rwayonm. Byensir, nenport kwa ki nou akonpli konman serviter Bondye i ganny fer ‘non pa par en lafors militer, ni menm par pwisans, me par lespri Zeova.’ (Zekarya 4:6) Nou alor priy pour led divin, vi ki nou konnen ki avek lafors ki Zeova i fourni, nou pou kapab fini sa travay ki i’n donn nou pour fer dan sa letan lafen.