En Lanons Spesyal
DAN konklizyon miting annyel Lasosyete Watch Tower and Tract of Pennsylvania le 7 Oktob, 2000, en lanons spesyal ti ganny fer par tyermenn, John E. Barr, manm Konsey Direkter. Sa lanons ti relye avek lezot diskour ki ti ganny prezante pli boner sa zour par Theodore Jaracz ek Daniel Sydlik.—Vwar paz 6-10 ek 29-32 dan sa magazin.
Frer Barr ti fer resorti en pwen byen enportan kan i ti dir: “ ‘Lesklav fidel e pridan’ ek son Konsey Direkter in ganny konfye avek bann pli gran lentere e ki enplik bokou plis ki bann lentere ki en lasosyasyon legal i gannyen. Bann lobzektif sa bann lasosyasyon legal ki ganny detaye dan zot dokiman konstitisyon i annan zot limit. Sepandan, nou Met, Zezi Kri, in apwent sa group lesklav fidel lo tou son ‘byen’ oubyen bann lentere Rwayonm lo later.”—Matye 24:45-47.
Konsernan Lasosyete Watchtower of Pennsylvania, Frer Barr ti azoute: “Depi ki i’n vin an egzistans an 1884, Lasosyete Watch Tower and Tract of Pennsylvania in zwe en rol enportan dan nou listwar modern. Kantmenm sa, i senpleman en lenstriman legal ki disponib pour ‘lesklav fidel e pridan’ servi kan i neseser.”
Dan zot diskour, Frer Sydlik ek Jaracz ti eksplike ki lefe ki “lesklav fidel e pridan” in ganny konfye avek tou byen teres Senyer, sa pa anpes group lesklav permet bann zonm kalifye parmi “lezot mouton” pour okip serten responsabilite dan ladministrasyon toulezour. (Zan 10:16) Anplis ki sa, i napa okenn rezon Biblik pour ensiste ki tou oubyen serten direkter pour bann lasosyasyon legal ki ganny servi par Temwen Zeova i devret bann Kretyen swazir.
Frer Barr ti anons lodyans ki resanman serten manm Konsey Direkter ki ti pe servi konman direkter ek zofisye in volonterman demisyonnen lo bann bord direkter tou lasosyasyon ki ganny servi par “lesklav fidel e pridan,” Letazini. Bann frer responsab parmi lezot mouton ti ganny elekte konman ranplasan.
Sa desizyon i anmenn bokou benefis. I permet bann manm Konsey Direkter pour pas plis letan pour prepar nouritir spirityel e osi pour pran swen bezwen spirityel bann frer ek ser dan lemonn antye.
Dan konklizyon, tyermenn ti dir avek son lodyans ki ti dan lazwa: “E menm si serten travay legal ek ladministrasyon in ganny donnen avek bann sirveyan eksperyanse, . . . zot tou zot pe servi anba gidans spirityel Konsey Direkter. . . . Nou tou nou tourn ver Zeova dan lapriyer pour son benediksyon lo nou zefor inifye pour fer son lavolonte, pour loner ek laglwar son gran non.”