Senkyenm krwayans: Mari i manman Bondye

Kote sa krwayans i sorti? “Ladorasyon Mari konman manman Bondye ti konmans vin popiler ler . . . en kantite payen ti asosye avek legliz. . . . Zot latasman ek krwayans relizye [setadir bann payen ki ti’n vin Kretyen] ti’n ganny enfliyanse en kantite par ladorasyon ‘manman siperyer’ e ‘vyerz’ ki ti egziste plizyer milye lannen oparavan.”—The New Encyclopædia Britannica (1988), Volim 16, paz 326 ek 327.

Ki Labib i dir? “Ou pou konsevwar e donn nesans en garson, e ou merit apel li Zezi. I pou gran e i pou ganny apele Garson Bondye Tre-o. . . . E alor sa zanfan pou sen e i pou ganny apele Garson Bondye.”—Nou ki’n met an italik; Lik 1:31-35, The New Jerusalem Bible.

Sa pasaz Labib i montre klerman ki Mari ti manman “Garson Bondye,” me pa manman Bondye li menm. Eski i ti pou kapab anmenn dan son vant sa Enn ‘ki lesyel pa kapab anmennen’? (1 Lerwa 8:27) Mari pa’n zanmen dir en keksoz koumsa. I sa lansennyman lo Trinite ki’n senm konfizyon lo lidantite Mari. Par donn Mari sa tit Theotokos (en mo Grek ki vedir “Sa enn ki’n konsevwar Bondye”), oubyen “Manman Bondye,” sa konsil ki ti ganny fer Efez an 431 N.L., in kontribye pour ki Mari i ganny adore. Lavil Efez, sa landrwa kot sa konsil ti deroule ti sant ladorasyon zidol kot bondye fertilite Artemis ti ganny onore pour plizyer syek.

Alor i ti sa bann diferan laspe dan ladorasyon zidol Artemis ki “ti tonbe sorti dan lesyel,” tel parey laprosesyon, ki ti ganny entrodwir dan ladorasyon Mari. (Akt 19:35) En lot pratik ki ti gradyelman ganny entrodwir dan lansennyman Kretyen ti litilizasyon zimaz Mari ek lezot zimaz dan ladorasyon.

Konpar sa bann verse Labib: Matye 13:53-56; Mark 3:31-35; Lik 11:27, 28

REALITE:

Mari ti manman Garson Bondye me pa manman Bondye. Krwayans dan Trinite ki’n fer ki Mari i ganny adore konman Manman Bondye