Eski Mari i manman Bondye?

Ki Labib i dir?

Non, Labib pa dir ki Mari i manman Bondye, ni donn sa nide ki bann Kretyen i devret ador oubyen onor Mari.a Vwar akoz nou dir sa:

• Mari pa’n zanmen dir ki i manman Bondye. Labib i eksplike ki i ti donn nesans “Garson Bondye,” non pa Bondye li menm.​—Mark 1:1; Lik 1:32.

• Zezi Kri pa’n zanmen dir ki Mari i manman Bondye oubyen ki i merit en devosyon spesyal. Anfet, ler en madanm ti dir ki Mari i devret ere akoz i manman Zezi, Zezi ti koriz li e dir: “Non, plito, ere sa bann ki tann parol Bondye e obei li!”​—Lik 11:27, 28.

• Sa term “Manman Bondye” ek “Theotokos” (Sa enn ki’n donn nesans Bondye) pa egziste dan Labib.

• Dan Labib, sa lekspresyon “larenn lesyel” pa pe refer avek Mari, me avek en fo bondye ki bann Izraelit ki ti’n vin aposta ti adore. (Zeremi 44:15-19) I posib ki sa “larenn lesyel” ki zot ti pe adore ti en bondye Babilonnyen ki apel Ishtar (Astarte).

• Bann Kretyen dan premye syek pa ti ador Mari e zot pa ti donn li loner spesyal. En istoryen i dir ki bann Kretyen dan premye syek “ti pou’n rezet bann sekt e i tre probab ki zot ti per ki si zot ti donn Mari plis latansyon ki neseser, sa ti’n kapab fer lezot krwar ki zot ador bann fo bondye.”​—In Quest of the Jewish Mary.

• Labib i dir ki Bondye in toultan egziste. (Psonm 90:1, 2; Izai 40:28) Vi ki Bondye ti napa en konmansman, i pa kapab ki i annan en manman. Deplis, Mari pa ti pou’n kapab anmenn Bondye dan son vant parski Labib i fer kler ki menm lesyel pa kapab kontenir li.​—1 Lerwa 8:27.

Mari i manman Zezi, pa “Manman Bondye”

Mari ti en Zwif par nesans e i ti en desandans Lerwa David. (Lik 3:23-31) I ti ganny laprouvasyon Bondye akoz son lafwa ek devosyon. (Lik 1:28) Bondye ti swazir li pour vin manman Zezi. (Lik 1:31, 35) Li ek son msye Zozef ti annan lezot zanfan.​—Mark 6:3.

Menm si Labib i montre ki Mari ti vin en disip Zezi, i pa donn bokou plis lenformasyon lo li.​—Akt 1:14.