“Konbyen letan . . . mon bezwen kriy o sekour?”
Jayne ti plere an dizan: “Mon zis anvi sa douler i arete!” I ti annan kanser e sa kanser ti pe propaze dan son lekor. Sa ki son fanmir ek zanmi ti swete se zis si zot ti kapab retir sa maladi ek soufrans lo li! Zot ti priy Bondye pour ed li. Eski i pou ekoute? Eski i enterese?
BONDYE i konn kondisyon tou bann imen. Son Parol, Labib, i dir: “Tou lakreasyon Bondye pe soupire e soufer.” (Romen 8:22) Bondye i konnen ki parey Jayne, i annan plizyer santenn milyon dimoun ki pe soufer tou le zour, ki swa fizikman, emosyonnelman ouswa mantalman. Bondye i vwar sa 800 milyon dimoun ki al dormi vant vid aswar, sa plizyer milyon ki soufer akoz vyolans domestik e sa kantite paran ki trakas pour lavenir ek byennet zot zanfan. Eski ou’n deza mazinen si Bondye pou vreman rezourd sa bann problenm? Sirman, lefet ki nou anvi ed sa bann ki nou kontan, eski pa Bondye osi pou anvi ed bann imen ki li in kree?
Si ou’n demann sa bann menm kestyon, ou pa tousel. Plis ki 2,600-z-an pase, en zonm fidel ki ti apel Abakouk ti santi parey bokou dimoun ozordi. I ti demann Bondye: “Konbyen letan O Zeova mon bezwen kriy o sekour, san ki ou tann mwan? Konbyen letan fodre mon kriy ou pour demann led kont vyolans, san ki ou sov mwan? Akoz ou fer mwan vwar sa ki fer mal, e ou kontinyen get zis problenm menm? Akoz depouyman ek vyolans i la devan mwan? Akoz dispit i arive e akoz i annan konfli?” (Abakouk 1:2, 3) Abakouk ti en profet Ebre e dan son letan i ti temwanny bann aksyon vyolan ki sokan e osi lager. Tou le zour i annan bann nouvel koumsa e sa i fer bann dimoun ki annan konpasyon vreman dezapwente.
Eski Bondye pa ti enterese avek konsern ki Abakouk ti annan? Non. I ti ekout bann kestyon senser ki Abakouk ti demande e apre i ti rekonfort li e ankouraz sa zonm deprimen. Bondye ti afermi lafwa Abakouk par promet li ki I ti pou elimin soufrans. Mesaz Bondye ki donn lespwar i kapab donn ou osi sa lasirans parey i ti leka pour Jayne ek son fanmir. Sa bann lartik ki swiv pou reponn bann kestyon parey: Ki mannyer nou kapab asire ki Bondye i enterese avek nou? Ki Bondye pou fer pour elimin soufrans e kan?