Eski Labib i Parol Bondye?
“Tou Lekritir i enspire par Bondye e i itil pour ansennyen, pour koriz lerer, pour remet drwat, e pour formen pour viv byen selon Bondye, pour ki dimoun ki servi Bondye i byen prepare e byen ekipe pour fer tou aksyon ki bon.”—2 TIMOTE 3:16, 17.
PA SA ki zapot Pol i dir konsernan valer ekstraordiner ki Labib i annan i vreman pwisan! I vre ki i ti pe refer pli spesifikman avek sa parti Labib ki ti disponib dan son letan, sa ki dimoun konmela i apel Ansyen Testaman. Me an prensip, son parol i aplik pour tou le 66 liv Labib, enkli sa ki bann disip fidel Zezi ti ekrir dan premye syek Nou Lepok.
Eski Labib i annan menm valer pour ou parey i ti annan pour Pol? Eski ou krwar sa bann dimoun ki’n ekrir Labib ti vreman ganny enspire par Bondye? Bann Kretyen dan premye syek ti krwar e sa i en krwayans ki bann vre Kretyen in toultan annan. Par egzanp, John Wycliffe, en pret Angle dan katorzyenm syek ti vwar Labib konman en liv ki “pa kapab mal.” Dan en komanter ki The New Bible Dictionary ti fer lo parol Pol ki’n ganny site anler, i dir lefet ki Bondye ki’n “enspir Labib, sa i garanti ki tou sa ki i dir i vre.”
Sanzman latitid anver Labib
Konmela, dimoun i nepli rekonnet Labib konman sa liv ki annan drwa dir nou ki pour fer. Sa liv The World’s Religions i dir: “An prensip, tou Kretyen i [ankor] aksepte Labib konman sa liv ki annan drwa pour gid zot aksyon e pour form zot krwayans.” Me an realite, sa i tou lekontrer. Bokou dimoun i aprezan vwar Labib konman en liv ki “annan bann tradisyon zonm ki nou pa kapab depan lo la.” Zot rekonnet ki sa bann zonm ki’n ekrir Labib ti annan en gran lafwa, me kantmenm sa, pour zot, sa bann ekriven i zis bann dimoun enparfe ki’n ganny bokou difikilte pour eksplik bann laverite spirityel ki profon. Zot osi panse ki sa bann zonm ti mank konnesans ek leklersisman ki nou annan ozordi.
An realite, i annan zis en ptigin dimoun konmela ki vreman les Labib gid zot panse ek aksyon. Konbyen fwa, par egzanp, ou’n tann dimoun dir ki standar Labib lo moralite i nepli annan valer e i pa pratik? Bokou dimoun pa ezite pour pran alalezer bann lalwa dan Labib ek son bann prensip oubyen menm rezet zot konpletman si i pa dan zot lavantaz. Serten dimoun ki apel zot lekor Kretyen i kareman rezet sa ki Labib i dir lo fornikasyon, adilter, malonnekte ek soular.—1 Korentyen 6:9, 10.
Akoz sa i le ka? Enn bann rezon ti ganny idantifye par en arkeolog apele Charles Marston ki ti pe viv o konmansman ventyenm syek. Dan son liv The Bible Is True, i ti dir ki dimoun ti tro vit pour “aksepte lopinyon laplipar sa bann nouvo ekriven” ki ti pe dir ki Labib i mal. Eski sa i ankor vre ozordi? Ki mannyer ou merit vwar lopinyon ek teori bann spesyalis Labib ki dekouraz dimoun pour annan konfyans dan Labib? Lartik swivan pou diskit lo la.