“Kote Bondye ti ete?”
“MON KONTINYEN DEMANDE: KOTE BONDYE TI ETE?”—Sa i sa ki Lepap Benoit XVI ti dir, ler i ti pe vizit en kan konsantrasyon Auschwitz, Lapolonny.
LER EN MALER I ARIVE, ESKI OU DEMANN OU LEKOR ‘KOTE BONDYE TI ETE?’ OUBYEN LER OU PE SOUFER, ESKI OU DEMANDE SI BONDYE I VREMAN ENTERESE AVEK OU?
Petet ou annan menm pwennvi avek Sheila, en madanm ki reste Lanmerik. Sheila ti grandi dan en fanmir ki ti krwar dan Bondye e i dir: “Depi byen pti, mon ti ganny atire ver Bondye akoz i nou Kreater. Me mon pa ti zanmen santi mwan pros avek li. Mon ti krwar i ti lwen avek mwan. Mon pa ti krwar i ay mwan me i pa ti kontan mwan osi.” Me akoz Sheila ti santi koumsa? I ti dir: “Mon fanmir ti pas dan problenm enn deryer lot e i ti konmsi Bondye pa ti pe ed nou ditou.”
Parey Sheila, petet ou osi ou asire ki Bondye i egziste me ou kapab doute si i vreman kontan ou personnelman. Zob, en bon dimoun ki ti obeir Bondye e ki ti annan lafwa dan pouvwar ek lasazes Bondye, ti annan bann dout li osi. (Zob 2:3; 9:4) Apre ki Zob ti’n soufer akoz problenm ki ti pe kontinyen vini enn deryer lot, i ti santi ki Bondye pa ti pe ed li e i ti demann Bondye: “Akoz ou kasyet ou figir avek mwan e ou konsider mwan koman ou lennmi?”—Zob 13:24.
Eski nou devret blanm Bondye ler nou pas dan problenm? Eski i annan okenn laprev ki montre ki Bondye i kontan imen e sakenn ant nou personnelman? Eski ou menm ou krwar ki Bondye i enterese avek nou, i konpran nou douler oubyen i ed nou avek nou bann problenm? Me ki Labib i dir?
Sa bann lartik ki swiv pou eksplike ki mannyer kreasyon i montre ki Bondye i kontan nou. (Romen 1:20) Nou pou osi vwar dan Labib ki mannyer Bondye i montre ki i enterese avek nou. Anmezir ou “aprann konn” Bondye atraver sa ki in kree e son Parol Labib, ou pou pli asire ki i ‘enterese avek ou.’—1 Zan 2:3; 1 Pyer 5:7.