Nou Pres bann Bon Nouvel
1 Nou annan en privilez merveye koman porter “bann bon nouvel lo bann bon keksoz!” (Rom. 10:15) Nou annan en mesaz tre ankourazan pour partaz avek bann dimoun ki pe viv dan konfizyon ek dezespwar. Ki mannyer nou kapab ed zot konpran ki nou pe ofer “bann bon nouvel lo en keksoz meyer”?—Iza. 52:7.
2 Prepar en Mesaz Pozitif: Nou bann konversasyon dan minister pou annan en lefe profitab si nou konsantre lo bann bon keksoz. Savedir, ler nou pe prepar nou prezantasyon e repas lo sa piblikasyon ki nou pe al ofer, nou devret met lanfaz lo bann laspe pozitif nou mesaz. Si nou partaz nou lesperans baze lo Labib, avek lasirans ek lantouzyasm, alor sirman nou pou ganny bann rezilta tre ankourazan.—Prov. 25:11.
3 Malgre ki nou senpatiz avek bann dimoun ler zot akonte ki mannyer zot in ganny afekte avek bann move kondisyon lemonn, nou devret montre zot sa vre solisyon pour bann problenm imen, Rwayonm Bondye. Menm ler nou pe diskit avek zot konsernan “zour vanzans” Zeova ki pe aprose, nou oule montre ki vreman sa i en “bon nouvel pour bann dimoun ki annan limilite.” (Iza. 61:1, 2) Nou kapab asir bann ki ekout nou, ki tou sa ki Zeova i fer, pou anmenn pli gran boner e pli bon lavenir posib.
4 Prezant Laverite Avek en Vre Lazwa: Ler dimoun i remark sa lazwa lo nou vizaz ek sa lasirans dan nou ton lavwa, zot pli pare pour ekoute. Si nou reflekte en laparans optimis, nou bann oditer pou konpran ki nou “rezwir dan lesperans.” (Rom. 12:12) Alor zot pou pli dispoze pour aksepte sa bon nouvel. Sirman, nou annan bann bon rezon pour demontre en latitid pozitif e zwaye dan tou laspe nou minister.
5 Koman bann minis sa bon nouvel, nou pa senpleman pas lenformasyon. Nou predikasyon i donn en lespwar asire pour en lavi meyer konmela, osi byen ki dan lavenir. (1 Tim. 4:8) Ler nou apros sak dimoun, nou pwennvi pozitif pou reflekte atraver sa ki nou dir e i pou ed dimoun pour aksepte sa bon nouvel. An fezan atansyon lo sa ki nou dir e lo fason ki nou dir li, annou ankouraz bann dimoun senser pour aksepte sa bon nouvel stimilan ki nou prese!