Imit Zeova, nou “Bondye ere”
1 Zeova i vreman anvi ki tou dimoun i ere. Son Parol i fer nou anvi ganny sa bann benediksyon merveye ki i’n rezerve pour limanite. (Iza. 65:21-25) Bann dimoun avek ki nou partaz sa bon nouvel konsernan sa “Bondye ere,” zot bezwen vwar ki nou kontan pour partaz sa mesaz avek zot. (1 Tim. 1:11, NW) Nou lanmour pour laverite i devret ganny reflekte dan lafason ki nou koz lo sa mesaz Rwayonm, ek sa lentere senser ki nou annan dan dimoun ki nou koz avek.—Rom. 1:14-16.
2 I vre, parfwa nou kapab pa dan nou lakok. Dan serten teritwar, pa bokou dimoun ki enterese avek sa mesaz Rwayonm. I kapab annan bann zour kot nou bezwen fer fas avek bann sitiasyon difisil dan nou prop lavi. Pour nou kapab gard nou lazwa, i bon si nou reflesir lo ki kantite enportan i enportan pour dimoun dan nou teritwar tann e konpran sa bon nouvel ki nou pe prese. (Rom. 10:13, 14, 17) Kan nou fer sa, avek lazwa nou pou kontinyen fer dimoun konn sa provizyon ranpli avek mizerikord ki Zeova in fer pour sov nou.
3 Konsantre lo sa ki pozitif: Nou bezwen osi vey byen sa ki nou dir. Menm si dan nou lentrodiksyon nou konmans koz lo en problenm oubyen en nouvel ki dimoun in fek tande, nou devret evite koz tro bokou lo bann keksoz negatif. Bi nou travay se pour “anmenn bon nouvel konsernan en keksoz meyer.” (Iza. 52:7; Rom. 10:15) Sa bon nouvel i baze lo promes ki Bondye in fer pour anmenn en meyer lemonn alavenir. (2 Pyer 3:13) Avek sa antet, annou servi Labib pour “pans sa bann ki annan leker brize.” (Iza. 61:1, 2) Sa pou ed nou gard nou lazwa e reste pozitif.
4 San okenn dout dimoun pou remarke ki nou zwaye anmezir ki nou pres sa bon nouvel. Alors, annou kontinyen reflekte sa lazwa ki Zeova nou “Bondye ere” i annan, anmezir ki nou partaz sa bon nouvel Rwayonm avek dimoun dan nou teritwar.