Trouv lazwa ler ou pe anons sa bon nouvel

Eski ou’n deza vwar li difisil pour prese? Bokou nou ti pou dir wi. Akoz? Petet dimoun dan teritwar pa enterese, pa kontan nou oubyen nou per pour koz avek bann ki nou pa konnen. Byensir, sa i kapab fer nou perdi nou lazwa. Me, nou pe ador sa Bondye ere ki anvi nou servi li avek lazwa. (Ps 100:2; 1Ti 1:11) Ki trwa bon rezon nou annan pour trouv lazwa ler nou pe anons sa bon nouvel?

Premyerman, nou pe anons en mesaz lespwar. Menm si bokou dimoun i nepli annan lespwar ozordi, nou kapab ed zot pour annan en lespwar avek sa “bon nouvel konsernan en keksoz meyer.” (Iza 52:7, NWT) Me sa bon nouvel konsernan Rwayonm Bondye i kapab osi fer nou zwaye. Avan al prese, medit lo bann benediksyon ki Rwayonm Bondye pou anmennen lo later.

Dezyenmman, sa bon nouvel ki nou prese i benefisye bann dimoun fizikman e spirityelman. Zot aprann pour aret fer bann keksoz danzere e zot annan sa posibilite pour ganny lavi eternel. (Iza 48:17, 18; Ro 1:16) Nou kapab imazin nou dan en travay sekour. Menm si i annan serten ki pa anvi ganny sove, nou kontinyen rod lezot dimoun ki anvi ganny sove.​—Mt 10:11-14.

Sa trwazyenm keksoz ki pli enportan, i ki nou predikasyon i onor Zeova e i osi annan en gran valer pour li. (Iza 43:10; Ebr 6:10) An plis, i donn nou son lespri sen pour akonplir sa travay. Alor, sipliy Zeova pour donn nou lazwa, ki en laspe fri lespri. (Ga 5:22) Avek led Zeova, nou kapab sirmont nou lenkyetid e anons sa bon nouvel avek lardyes. (Akt 4:31) Alor, menm si pa tou dimoun ki aksepte sa mesaz, nou pou trouv lazwa pour anons sa bon nouvel.​—Eze 3:3.

GET SA VIDEO REGANNY OU LAZWA PAR ETIDYE E MEDITE E APRE REPONN SA BANN KESTYON SWIVAN:

• Akoz nou devret fer sir ki nou annan en bon progranm letid menm si nou pas bokou letan dan predikasyon tou le mwan?

• Dan ki fason nou devret imit Mari?

• Kan ki ou fer letan pour medit lo Parol Bondye?

• Ki bann keksoz ki fer ou zwaye letan ou pe pres sa bon nouvel?