“Servi Zeova dan Lazwa”
1. Kwa ki kapab anmenn bokou lazwa pour bann serviter Zeova?
1 Zapot Pol ti ekrir: “Rezoui zot dan Senyer, mon repete, rezoui zot.” (Fili. 4:4) Privilez pour partaz sa bon nouvel e pour ed bann dimoun senser pour ador Zeova i anmenn bokou lazwa. (Lik 10:17; Akt 15:3; 1 Tesa. 2:19) Me ki nou kapab fer, si nou vwar ki parler nou pa zwaye dan nou minister?
2. Konman ki ler nou gard antet sa enn ki’n demann nou pour fer sa travay, i kontribye pour nou zwaye?
2 En Travay ki Bondye in donn nou: Rapel ki se Zeova ki’n demann nou pour fer sa travay predikasyon. Wi, pa nou privilezye pour vin ‘konpanyon travay Bondye’ pour proklanm mesaz Rwayonm e pour fer disip! (1 Kor. 3:9) Zezi Kri i avek nou dan sa travay ki pa pou zanmen ganny repete. (Mat. 28:18-20) Bann lanz osi i enplike e zot pe travay avek nou dan sa gran rekolt spirityel ki pe ganny fer. (Akt 8:26; Rev. 14:6) Labib, ansanm avek bann leksperyans pep Bondye, i donn levidans kler ki Zeova pe soutenir sa travay. Alors, ler nou prese, nou ale “parey nou’n ganny anvoye par Bondye, anba regar Bondye, an konpanni avek Kris.” (2 Kor. 2:17, NW ) Pa sa i en rezon enportan pour nou dan lazwa!
3. Ki rol lapriyer i zwe pour gard nou lazwa dan servis Bondye?
3 Lapriyer i esansyel pour gard nou lazwa dan servis Bondye. (Gal. 5:22) Vi ki nou kapab fer travay Bondye gras a son lafors, nou bezwen enplor li pour son lespri sen, ki i donn avek gran ker bann ki demann li. (Lik 11:13; 2 Kor. 4:1, 7; Efe. 6:18-20) Priy konsernan nou minister pou ed nou pour gard sa bon pwennvi ler nou pa ganny byen resevwar. I pou ed nou pour kontinyen pres avek lardyes e avek lakontantman.—Akt 4:29-31; 5:40-42; 13:50-52.
4. Ki mannyer bon preparasyon i ede pour ogmant nou lazwa dan predikasyon, e ki serten fason pratik nou kapab prepare?
4 Byen prepare: En fason pratik pour ogmant nou lazwa ler nou partisip dan predikasyon se par prepar byen. (1 Pyer 3:15) En tel preparasyon pa pran bokou letan. I pran zis ennde minit pour revwar bann sizesyon pour prezant bann magazin resan oubyen en prezantasyon ki apropriye pour sa piblikasyon ki ou pe al ofer. Pour en lentrodiksyon apropriye, ou kapab vwar liv Comment raisonner ouswa bann ansyen nimero Nou Minister Rwayonm. Serten proklanmater Rwayonm i vwar li itil pour ekrir en prezantasyon bref lo en bout papye. Tanzantan, zot zet en pti kou-d-ey lo sa papye pour rafresi zot memwar. Sa i ed zot pour sirmont lafreyer e i donn zot konfyans pour pres avek lardyes.
5. Ki mannyer lazwa i benefisye nou e osi lezot?
5 Lazwa i anmenn bokou byenfe. En leta lespri zwaye i fer nou mesaz vin pli atiran. Lazwa i fortifye nou pour andire. (Nee. 8:10; Ebr. 12:2) Pli enportan, nou servis ki ganny fer avek lazwa i glorifye Zeova. Alors, annou “servi Zeova dan lazwa.”—Ps. 100:2.