Ogmant ou Lazwa dan Predikasyon
1 Sa lazwa pour partaz sa bon nouvel—eski ou pe eksperyans li dan ou minister? Si nou pa vizilan, sa monn mesan otour nou i kapab fer nou timid konsernan predikasyon, e fer nou perdi nou lazwa. Travay dan bann teritwar kot dimoun pa enterese avek sa bon nouvel i kapab osi dekouraz nou. Ki bann mezir pratik ki nou kapab pran pour ogmant nou lazwa dan predikasyon?
2 Vin en Dimoun pozitif: Mentenir en latitid pozitif i vreman ede. En fason pour fer sa se par medit lo nou gran privilez ki nou annan konman “bann konpanyon travay Bondye.” (1 Kor. 3:9) Zezi osi i avek nou pour akonpli sa travay. (Mat. 28:20) E i siport nou avek en gran larme bann lanz. (Mat. 13:41, 49) Alor, nou kapab asire ki nou zefor pe ganny gide par Bondye. (Rev. 14:6, 7) Nenport ki fason ki serten dimoun i kapab reakte anver nou travay, nou konnen ki bann ki dan lesyel i reazir avek bokou lazwa.
3 Prepar byen: Bon preparasyon i osi kontribye ver nou lazwa. Prepare pour al predikasyon pa enplik en ta travay. I pran zis detrwa minit pour konsider en pwen ki ou kapab koz lo la dan bann magazin resan oubyen dan piblikasyon ki pe ganny ofer pour sa mwan. Swazir en prezantasyon dan “Ki pour dir lo bann Magazin,” dan Nou Minister Rwayonm. Refer avek sipleman Zanvye 2002, “Sizesyon lo konman pour konmans Konversasyon dan Predikasyon,” oubyen get dan liv Comment raisonner pour en lentrodiksyon efikas. Si ou kwense par en lobzeksyon ki bann dimoun i souvan souleve, prepar en larepons ki pou pran an konsiderasyon zot komanter e diriz latansyon ver en size ki revey lentere. Liv Comment raisonner i vreman itil dan sa domenn. Par servi sa bann led nou pou ganny konfyans ki nou bezwen pour pres avek lazwa.
4 Priy senserman: Lapriyer i esansyel pour lazwa dirab. Lefe ki nou pe fer travay Zeova, nou bezwen enplor li pour son lespri sen, e lazwa i enn son fri. (Gal. 5:22) Zeova pou donn nou lafors pour kontinyen prese. (Fili. 4:13) Priy konsernan nou minister i kapab ed nou pour get keksoz byen kan nou rankontre bann leksperyans negatif. (Akt 13:52; 1 Pyer 4:13, 14) Si nou santi ki nou enpe per, lapriyer i kapab ed nou pour persiste san okenn lafreyer e avek lazwa.—Akt 4:31.
5 Kree bann Loportinite: Byensir, nou minister i pli gou kan nou kapab rankontre dimoun e temwanny avek zot. Varye ou progranm pour fer port-an-port dan diferan moman, petet tar apremidi oubyen okonmansman lasware, i kapab prodwi plis rezilta. Ou rankontre dimoun tou letan, ler ou pe marse lo semen, pe al magazen, ler ou dan bis, oubyen pe marse dan bann landrwa piblik. Akoz ou pa prepar en topik an bref ki pou permet ou fer en konversasyon e pran linisyativ pour apros bann dimoun ki paret amikal? Petet ou annan en travay profann oubyen ou al lekol, kot toulezour ou pe koz avek lezot. Ou kapab ganny en sans pour donn en temwannyaz par senpleman lev en topik baze lo Labib ki revey serten lentere. Bann bon sizesyon i ganny trouve lo premye paz sipleman Nou Minister Rwayonm Zanvye 2002. Tou sa bann zefor i kapab fer en kantite pour ogmant nou lazwa dan predikasyon.
6 Lefe ki lazwa i ed nou pour andire, i vreman esansyel ki nou mentenir li! Par fer sa, nou pou ganny en gran rekonpans kan sa travay ki pa pou zanmen ganny repete i ariv ver son lafen. Sa lespwar dan li menm i kapab ogmant nou lazwa dan predikasyon.—Mat. 25:21.