Demann Led
1 Sa parol enspire “difisil pour siporte”, i dekrir byen nou letan kritik. (2 Tim. 3:1) Alors, ki ou kapab fer ler ou rankontre bann defi spirityel difisil, ki ou santi ou pa byen ekipe pour fer fas avek?
2 Eski ou pare pour koz avek en manm kongregasyon ki matir spirityelman? En dimoun i kapab ezite pour fer sa, petet akoz i anbarase, i pa anvi enpoz lo lezot, oubyen i pa sir si i annan ki kapab vreman ed li. I vre ki nou bezwen fer nou mye pour desarz nou bann responsabilite personnel, me nou devret toultan santi nou lib pour rod led dan bann domenn ki enplik nou byennet spirityel.—Gal. 6:2, 5.
3 Koman Fer: Ou kapab apros ou kondikter letid liv e demann li si ou kapab travay avek li dan predikasyon. Sa pou donn ou loportinite pour partaz avek li ou dezir pour progrese spirityelman. Si i en asistan ministeryel, fer li konnen ki ou bezwen led spirityel e i pou demann bann ansyen pour ed ou. Oubyen ou kapab apros nenport ansyen konsernan sa sitiasyon ki enkyet ou.
4 Ki kalite led ki ou bezwen? Eski i annan keksoz ki’n afebli ou larder? Eski ou en paran tousel ki pe esey gard ou zanfan pros avek kongregasyon? Eski ou en dimoun aze ki bezwen led? Oubyen, eski i annan serten problenm ki pe dekouraz ou? Pour fer fas avek nou letan kritik i kapab difisil—me pa enposib. Ou kapab ganny led.
5 Ki Mannyer bann Ansyen i Ede: Bann ansyen i senserman enterese avek ou. Zot pou ekoute ler ou eksplik ou lenkyetid. Si lezot proklanmater pe fer fas avek bann menm lobstak, bann ansyen pou pran sa an konsiderasyon ler zot ansenny oubyen vizit bann manm kongregasyon. Koman “bann legzanp pour troupo”, zot touzour pare pour travay ansanm avek ou dan lazwa. (1 Pyer 5:3) Si ou ekout sa bann frer eksperyanse ler zot rezonn lo bann prensip Labib, sa i kapab amelyor ou minister e ed ou dan ou lavi personnel.—2 Tim. 3:16, 17.
6 Zezi in fourni nou plizyer “don dan laform zonm.” (Efe. 4:8, not) Sa i vedir ki bann ansyen i la pour servi ou. Zot disponib pour ed ou. Annefe, ‘zot la pour ou’. (1 Kor. 3:21-23) Alors, olye ezite, eksprim ou libreman. Demann led ki ou bezwen.