“Apel bann ansyen”

1. Ki mannyer Zeova in montre ki son bann mouton i presye pour li?

ZEOVA i kontan tou bann ki servi li e i pran swen avek zot parey en bon berze i pran i swen avek son bann mouton. I’n aste zot avek disan Zezi e i’n apwent bann ansyen dan kongregasyon pour pran swen avek Son troupo. (Akt 20:28) Bondye i anvi ki son bann mouton i ganny trete byen. Anba gidans Kris, bann ansyen i ankouraz e protez bann mouton kont bann keksoz ki kapab gat zot lanmitye avek Zeova.—Iza. 32:1, 2.

2. Lekel ki Zeova i donn en latansyon spesyal? (Ezekyel 34:15, 16)

² Zeova i enterese avek byennet tou son bann mouton, me i donn en latansyon spesyal bann ki pe soufer. Atraver bann ansyen, Zeova i ed bann ki pe soufer akoz zot in fer en fot. (Lir Ezekyel 34:15, 16.) Kantmenm sa, i anvi ki nou rod led ler nou bezwen. Dan sa bann moman, nou demann Bondye pour ed nou me nou osi rod led avek bann “berze ek ansenyan” dan kongregasyon.—Efe. 4:11, 12.

3. Ki byenfe nou kapab gannyen ler nou aprann plis konsernan rol bann ansyen?

³ Dan sa lartik, nou pou aprann plis konsernan sa laranzman ki Zeova in met an plas pour nou ganny led spirityel atraver bann ansyen. Nou pou reponn sa bann kestyon swivan: Kan ki nou devret demann led bann ansyen? Akoz nou bezwen demann led? Ki mannyer zot ed nou? Menm si pour le moman, nou pa pe pas dan difikilte, larepons sa bann kestyon pou ed nou annan plis lapresyasyon pour sa laranzman e i pou ed nou konnen ki pour fer ler nou bezwen led spirityel.

KAN KI NOU DEVRET “APEL BANN ANSYEN”?

4. Akoz nou kapab dir ki Zak 5:14-16, 19, 20 pe refer avek ler en dimoun i malad spirityelman? (Vwar portre.)

⁴ Disip Zak i konmans koz lo sa laranzman ki Bondye in met an plas pour nou ganny led spirityel par dir: “Eski i annan ki malad parmi zot? I devret apel bann ansyen dan kongregasyon.” (Lir Zak 5:14-16, 19, 20.) Konteks sa verse i montre ki Zak pe koz konsernan en dimoun ki bezwen aranz son lanmitye avek Zeova. Par egzanp, sa enn ki malad i ganny dir ki i devret apel bann ansyen e pa en dokter. Zak i koz lo en maladi spirityel akoz i eksplike ki ler en dimoun i malad, i ganny geri ler son pese i ganny pardonnen. Dan en sans, bann keksoz ki bezwen ganny fer pour tret en dimoun ki malad spirityelman, i parey bann keksoz ki bezwen ganny fer pour tret en dimoun ki malad fizikman. Ler nou malad fizikman, nou al kot en dokter, nou eksplik nou bann sentonm e nou swiv son lenstriksyon. Pareyman ler nou malad spirityelman, nou devret al kot en ansyen, nou eksplik li nou sityasyon e nou azir dapre bann konsey ki i donn nou ki sorti dan Labib.

5. Ki mannyer nou pou konnen si nou lanmitye avek Zeova i nepli parey avan?

⁵ Sa laranzman ki Zak sapit 5 i koz lo la i ankouraz nou pour al kot bann ansyen ler nou santi nou malad spirityelman. Me i vreman enportan ki nou ganny led avan ki nou gat nou lanmitye avek Bondye. Nou bezwen onnet avek nou lekor. Labib i averti nou ki si nou pa fer atansyon, nou kapab anbet nou lekor pour krwar ki nou annan en bon lanmitye avek Zeova ler nou napa. (Zak 1:22) Sanmenm sa ki ti arive avek serten Kretyen dan kongregasyon Sard e Zezi ti dir zot ki zot ti nepli fer Zeova plezir. (Rev. 3:1, 2) En fason ki nou kapab verifye si nou annan en bon lanmitye avek Zeova, i par konpar lafason ki nou ti santi konsernan Zeova ler nou ti fek batize avek lafason ki nou santi la konmela. (Rev. 2:4, 5) Nou kapab demann nou lekor: ‘Eski mon ankor kontan lir Labib e medite parey avan? Eski mon prepar pour renyon zis ler mon ganny letan e eski mon asiste tou renyon? Eski mon ankor kontan predikasyon parey avan? Oubyen eski mon prefere pas mon letan pe fer lezot keksoz oubyen pe mazin keksoz materyel?’ Si larepons pour enn sa bann kestyon i negatif, sa i kapab montre ki ou annan en febles e si ou pa fer en keksoz dan sa sityasyon, i kapab vin pli grav. Si lo ou menm ou pa trouv en solisyon pour sa febles oubyen ou’n deza fini fer en keksoz ki kont standar Bondye ou devret demann led bann ansyen.

6. Ki bann dimoun ki’n fer en pese grav i devret fer?

⁶ Serten pese i sitan grav ki en dimoun i kapab ganny tire dan kongregasyon. Dan bann ka koumsa, sa dimoun i devret koz avek en ansyen. (1 Kor. 5:11-13) En dimoun ki’n fer en pese grav i bezwen led pour aranz son lanmitye avek Zeova. Pour li benefisye atraver sa ranson e ganny pardonnen, sa dimoun i bezwen fer “bann aksyon ki montre ki [i’n] repantir.” (Akt 26:20) Sa i enkli koz avek bann ansyen si i’n fer en pese grav.

7. Lekel ankor ki bezwen led bann ansyen?

⁷ Bann ansyen pa ed zis bann ki’n fer en pese grav me zot osi ed bann ki feb spirityelman. (Akt 20:35) Par egzanp, petet ou per ki ou pe nepli kapab reziste ou bann move dezir. Ou kapab vwar li pli difisil sirtou si avan ou ti aprann laverite ou ti adikt avek drog, get pornografi oubyen ou ti annan en lavi imoral. Ou pa bezwen fer fas avek sa sityasyon ou tousel. Ou kapab koz avek en ansyen ki pou ekout ou, donn ou konsey e asir ou ki ou kapab fer plezir Zeova si ou pa azir dapre ou bann move dezir. (Ekle. 4:12) Si ou dekouraze akoz ou pa pe kapab reziste ou bann move dezir, bann ansyen i kapab fer ou rapel ki sa i montre ki ou annan limilite e ki ou lanmitye avek Zeova i enportan pour ou.—1 Kor. 10:12.

8. Eski nou bezwen koz avek bann ansyen pour tou bann pti fot ki nou fer? Eksplike.

⁸ Nou pa bezwen al kot bann ansyen pour tou pti konsern ki nou annan. Par egzanp, meton ou’n dir en keksoz ki’n bles santiman en frer oubyen en ser oubyen ou’n pran lakoler. Dan plas koz avek ansyen lo la ou kapab aplik konsey Zezi e fer lape avek sa frer oubyen sa ser. (Mat. 5:23, 24) Ou kapab fer resers lo bann kalite parey ladouser, pasyans, kontrol lo ou lekor, pour ou kapab demontre sa bann kalite pli byen. Me si ou pa kapab rezourd sa problenm, ou kapab demann led en ansyen. Dan sa let ki zapot Pol ti ekrir pour bann Filipyen, i ti demann en frer pour ed Evodi ek Sentis rezourd zot problenm. En ansyen dan ou kongregasyon i kapab ed ou dan menm fason.—Fili. 4:2, 3.

AKOZ NOU DEVRET APEL BANN ANSYEN?

9. Akoz nou pa devret les laont anpes nou rod led avek bann ansyen? (Proverb 28:13)

⁹ Ler nou fer en pese grav oubyen nou santi ki nou pa pe kapab lalit avek en move dezir, nou bezwen annan lafwa ek kouraz pour demann led bann ansyen. Nou pa devret les laont anpes nou rod led avek bann ansyen. Akoz non? Parski ler nou swiv sa laranzman ki Zeova in met an plas, nou montre ki nou annan konfyans dan li ek bann lenstriksyon ki i’n donnen pour ed nou kontinyen annan en lafwa for ek en bon lanmitye avek li. Nou rekonnet ki nou bezwen son led ler nou santi ki nou pa pe kapab reziste nou bann move dezir. (Ps. 94:18) Si nou’n fer en pese, Bondye pou pran pitye pour nou si nou konfese e aret fer sa ki mal.—Lir Proverb 28:13.

10. Ki i kapab arive si nou esey kasyet nou pese?

¹⁰ Si nou koz avek bann ansyen ler nou bezwen led, nou pou ganny bann benediksyon ki nou bezwen. De lot kote, si nou esey kasyet nou pese nou pou fer nou sityasyon vin pli grav. Ler Lerwa David ti esey kasyet son pese, i ti soufer spirityelman, emosyonnelman e menm fizikman. (Ps. 32:3-5) Parey en maladi oubyen en blesir fizik, souvandfwa en problenm spirityel i vin pli grav si i pa ganny sa tretman apropriye. Zeova i konpran sa, alor i envit nou pour “aranz keksoz” avek li atraver sa laranzman ki i’n met an plas pour nou ganny sa gerizon spirityel, setadir pour nou vin son zanmi ankor.—Iza. 1:5, 6, 18.

11. Si nou kasyet en pese grav, ki lefe sa i kapab annan lo lezot?

¹¹ Si nou esey kasyet en pese grav, sa i kapab annan en lefe lo lezot osi. Nou aksyon i kapab fer ki Zeova i aret beni kongregasyon e sa pou fer ki i pou napa lape dan kongregasyon. (Efe. 4:30) De lot kote, si nou aprann ki en dimoun dan kongregasyon in fer en pese grav, nou devret ankouraz li pour koz avek bann ansyen konsernan sa sityasyon.a Si nou kasyet pese en lot dimoun, sa pou fer nou koupab nou osi. (Lev. 5:1) Nou lanmour pour Zeova pou motiv nou pour al kot bann ansyen pour dir laverite. Dan sa fason, nou ede pour gard kongregasyon prop e ed sa enn ki’n fer pese pour reganny en bon lanmitye avek Zeova.

KI MANNYER BANN ANSYEN I ED NOU?

12. Ki mannyer bann ansyen i ed bann ki feb spirityelman?

¹² Labib i dir ki bann ansyen i devret siport bann ki feb spirityelman. (1 Tesa. 5:14) Si ou’n fer pese, avek disernman zot kapab demann ou bann kestyon pour zot kapab konpran ki ou pe mazinen e ki ou pe santi. (Prov. 20:5) Petet ou kiltir, personnalite oubyen lakanmizri i kapab fer li difisil pour ou koz lo ou move dezir ki ou pe lalit avek, me ou kapab ed bann ansyen si ou eksprim ou lekor dan en fason kler. Pa bezwen enkyet ki sa ki ou pe dir i paret konmsi ou pe “koz an bonnavini.” (Zob 6:3, not.) Bann ansyen pa pou tonm lo en konklizyon deswit. O kontrer zot pou fer zefor pour ekout ou atantivman pour ganny tou lenformasyon avan ki zot konsey ou. (Prov. 18:13) Bann ansyen i realize ki i pran letan pour donn en dimoun sa led ki i bezwen, alor zot pa ekspekte ki sa problenm pou ganny rezourd apre zis en konversasyon.

13. Ler bann ansyen i priy pour nou e donn nou bann konsey sorti dan Labib, ki mannyer sa i kapab ed nou? (Vwar portre.)

¹³ Ler ou apel bann ansyen, zot pou fer zefor pour fer ou pa santi ou pli koupab. O kontrer zot pou priy pour ou. Zeova pou ekout zot lapriyer e sa pou annan “bokou lefe.” Ou pou santi ki ou’n ganny rekonforte e ankouraze plis ki ou ti pe ekspekte. Zot pou osi ed ou par “pas delwil lo [ou] o non Zeova.” (Zak 5:14-16) Sa “delwil” pe refer avek sa laverite ki sorti dan Parol Bondye. Bann ansyen pou servi bann verse Labib pour rekonfort e soulaz ou e zot pou ed ou aranz ou lanmitye avek Zeova. (Iza. 57:18) Bann konsey ki zot donn ou sorti dan labib pou ed ou pour ou pou pli determinen pour fer sa ki byen. Atraver zot ou kapab tann lavwa Zeova pe dir ou: “La sa semen. Mars lo la.”—Iza. 30:21.

14. Dapre Galat 6:1, ki mannyer bann ansyen i ed bann dimoun ki’n pran en “move semen”? (Vwar portre.)

¹⁴ Lir Galat 6:1. Bann Kretyen ki pran en “move semen” pa pe viv dapre bann standar Bondye. I kapab ki zot in fer en move desizyon oubyen en pese grav. Lanmour i motiv bann ansyen pour “esey redres sa dimoun avek ladouser.” Sa mo Grek ki’n ganny tradwir “redres” i osi kapab ganny servi pour dekrir lafason ki en dokter i remet en lezo dan son plas pour ki sa lezo i geri byen. En bon dokter pou fer atansyon ki i pa fer sa dimoun plis dimal ler i pe esey redres sa lezo. Pareyman ler bann ansyen pe donn konsey en dimoun ki’n fer pese, zot fer atansyon ki zot pa fer sa dimoun plis ditor. Labib i osi dir bann ansyen ki zot bezwen “fer atansyon.” Anmezir ki zot ed en dimoun pour revin lo sa bon semen, bann ansyen i rekonnet ki zot osi zot enparfe e ki zot osi zot kapab pran en move semen. Alor zot pou fer atansyon ki zot pa krwar ki zot pli meyer oubyen pli drwat ki sa dimoun ki zot pe sey ede, o kontrer zot pou demonte limilite ek konpasyon.—1 Pyer 3:8.

15. Ki nou kapab fer si nou annan en problenm?

¹⁵ Nou kapab annan konfyans dan nou bann ansyen. Zot in ganny bann formasyon pour zot gard nou bann lenformasyon konfidansyel, pour donn konsey ki baze lo bann prensip Labib e pa lo zot prop lopinyon e pour kontinyen ed nou ler nou pe fer fas avek nou bann problenm. (Prov. 11:13; Gal. 6:2) Zot annan diferan personnalite ek diferan leksperyans. Me nou santi nou alez pour koz avek nenport parmi zot pour diskit lo en problenm. Byensir, nou pa pou al kot diferan ansyen pour demann menm konsey pour trouv en ansyen ki pou dir nou sa ki nou anvi tande. Si nou ti fer sa, nou ti pou parey sa bann ki prefere tann sa ki pou “satouy zot zorey,” ki aprann “sa bon lansennyman” ki sorti dan Parol Bondye. (2 Tim. 4:3, not.) Ler nou al kot en ansyen konsernan en problenm, i kapab demande si nou’n koz avek en lot ansyen lo la e ki konsey sa ansyen in donnen. Vi ki i modes, i kapab demann en lot ansyen konsey.—Prov. 13:10.

KI NOU RESPONSABILITE?

16. Ki responsabilite nou annan?

¹⁶ Menm si bann ansyen i vey lo nou, zot pa dir nou ki pour fer. Sakenn parmi nou i annan sa responsabilite pou viv en lavi ki montre ki nou annan devosyon pour Bondye. Nou pou bezwen rann kont avek Bondye pour sa ki nou dir e fer. Avek led Bondye, nou kapab reste fidel menm si i difisil. (Rom. 14:12) Dan plas dir nou ki pour fer, bann ansyen i servi Labib pour ed nou konpran fason panse Bondye. Par swiv zot konsey ki sorti dan Labib, nou kapab aprann pour servi nou “abilite pou zize” pour fer bann desizyon ki saz.—Ebr. 5:14.

17. Ki nou devret determinen pour fer?

¹⁷ Nou annan sa privilez pour form parti troupo Zeova. Zeova ti anvoy Zezi ki sa “bon berze,” pour pey ranson pour ki nou kapab ganny sa loportinite pour viv pour touzour. (Zan 10:11) Atraver bann ansyen dan kongregasyon, Zeova in gard promes ki i ti fer. I ti dir: “Mon pou donn zot bann berze ki fer mon lavolonte e zot pou donn zot konnesans ek bon zizman.” (Zer. 3:15) Ler nou fay oubyen malad spirityelman, nou pa devret ezite pour apel bann ansyen pour ganny led. Bann ansyen i en provizyon sorti kot Zeova, alor annou determinen pour servi sa provizyon.