Ki mannyer bann ansyen i demontre pitye ek lanmour anver bann ki fer en pese grav?

1. Ki kapab arive avek serten ki fer en pese grav?

DAN lartik avan, nou ti vwar ki mannyer Zapot Pol ti tret en sityasyon kot en dimoun dan lavil Korent ti fer en pese grav. Sa dimoun pa ti repantir e i ti bezwen ganny tire dan kongregasyon. Par kont, parey sa verse tenm i montre i posib pour tous leker bann dimoun ki’n fer en pese grav. Bann ansyen i kapab ed zot pour repantir. (Rom. 2:4) Alor ki mannyer bann ansyen i kapab ed zot?

2-3. Ki nou devret fer si nou aprann ki en lot Kretyen in fer en fot grav e akoz?

² Pour ki bann ansyen i kapab ed en dimoun, zot bezwen konnen ki sa dimoun i annan en problenm. Alor ki nou devret fer si nou aprann ki en lot Kretyen in fer en pese grav, en pese ki ti kapab fer sa dimoun ganny tire dan kongregasyon? Nou devret ankouraz sa dimoun pour rod led bann ansyen.—Iza. 1:18; Akt 20:28; 1 Pyer 5:2.

³ Me ki pou arive si sa dimoun i refize koz avek bann ansyen? Alor, nou pou bezwen koz avek bann ansyen pour fer sir ki sa dimoun i ganny led ki i bezwen. Nou pou demontre lanmour akoz nou pa oule perdi nou frer oubyen nou ser. Si sa dimoun i kontinyen fer sa ki mal, i pou gat son relasyon avek Zeova e i pou osi sali repitasyon kongregasyon. Alor avek kouraz e akoz nou kontan Zeova ek sa dimoun, nou pou pran aksyon.—Ps. 27:14.

KI MANNYER BANN ANSYEN I ED EN DIMOUN KI’N FER EN PESE GRAV

4. Ki bi bann ansyen ler zot zwenn avek en dimoun ki’n fer en pese grav?

⁴ Ler en dimoun dan kongregasyon i fer en pese grav, konsey ansyen pou swazir trwa frer kalifye parmi bann ansyen e zot pou form en komite.a Sa bann frer i bezwen modes e annan limilite. Menm si zot fer bokou zefor pour ed en dimoun repantir, zot aksepte ki zot pa kapab fors en dimoun pour sanze. (Det. 30:19) Bann ansyen i rekonnet ki pa tou dimoun ki fer pese ki pou byen reazir parey lerwa David ti fer. (2 Sam. 12:13) Serten dimoun pou swazir pour rezet bann konsey Zeova. (Zen. 4:6-8) Par kont, bann ansyen pou esey ed en dimoun ki’n fer sa ki mal pour repantir si i posib. Ki prensip Labib ki pou ed bann ansyen ler zot zwenn avek sa dimoun ki’n fer en pese grav?

5. Ki konsey bann ansyen i devret pran aker ler zot zwenn avek en dimoun ki’n fer en fot grav? (2 Timote 2:24-26) (Vwar osi portre.)

⁵ Bann ansyen i konsider ki sa dimoun i en mouton perdi ki presye. (Lik 15:4, 6) Alor ler zot zwenn avek sa dimoun, zot pa brit dan zot fason koze, zot latitid e lafason ki zot get sa dimoun. Sa renyon pa zis en prosedir. Plito, zot pou demontre bann kalite ki nou trouv dan 2 Timote 2:24-26. (Lir.) Bann ansyen i toultan dous, zantiy, bon e zot esey tous leker sa dimoun ki’n fer en fot grav.

6. Ki mannyer bann ansyen pou prepar zot leker avan ki zot zwenn avek sa dimoun? (Romen 2:4)

⁶ Bann ansyen i prepar zot leker. Zot esey imit Zeova dan lafason ki zot tret sa dimoun. Zot rapel parol Pol: “Bondye dan son labonte pe esey ed ou pour repantir.” (Lir Romen 2:4.) Bann ansyen i devret rapel ki avan tou, zot bann berze ki travay anba gidans Kris. (Iza. 11:3, 4; Mat. 18:18-20) Avan ki zot zwenn avek sa dimoun, sa komite pou fer lapriyer e rapel zot bi, setadir ed sa dimoun pour repantir. Zot pou fer bann resers dan Labib e dan nou bann piblikasyon e priye pour annan bon zizman. Zot pou reflesi lo sa ki zot konnen lo sa dimoun pour esey konpran son fason panse, son latitid ek son kondwit.—Prov. 20:5.

7-8. Ki mannyer bann ansyen i kapab imit pasyans Zeova ler zot zwenn avek en dimoun ki’n fer en fot grav?

⁷ Bann ansyen i imit pasyans Zeova. Zot gard antet ki mannyer Zeova ti azir avek bann dimoun ki ti fer en fot grav dan lepase. Par egzanp, avek pasyans Zeova ti rezonn avek Kaen, i ti averti li lo konsekans son pese e i ti reasir li ki i ti kapab sanze. (Zen. 4:6, 7) Zeova ti konsey David atraver profet Natan ki ti servi en legzanp pour tous leker sa lerwa. (2 Sam. 12:1-7) Zeova “ti kontinyen anvoy” bann profet ankor e ankor kot nasyon Izrael ki ti rebel. (Zer. 7:24, 25) I pa ti espere ki son pep i konmans repantir pour li ed zot. Plito i ti pran linisyativ pour ankouraz zot pour repantir.

⁸ Bann ansyen i swiv legzanp Zeova par esey ed bann ki’n fer en fot grav. Parey 2 Timote 4:2 i dir, zot rezonn “avek bokou pasyans” ler zot koz avek en frer oubyen ser. En not letid lo sa verse i donn sa leksplikasyon konsernan en ansyen: “I pou toultan annan kontrol lo son lekor, avek pasyans i pou sipliy [sa dimoun ki’n fer pese] pour devlop sa dezir pour fer sa ki byen. Si [sa ansyen] i fristre oubyen i perdi pasyans, sa i kapab anpes sa dimoun pour repantir.”

9-10. Ki mannyer bann ansyen i kapab ed en dimoun rezonnen konsernan son bann move aksyon?

⁹ Bann ansyen i esey konpran bann sirkonstans ki’n kapab fer en dimoun fer pese. Par egzanp eski sa dimoun in vin feb spirityelman akoz i pa ti pe etidye personnelman oubyen partisip dan predikasyon? Eski i ti’n aret priye regilyerman oubyen eski i ti pe fer bann lapriyer alalezer? Eski i’n les bann move dezir diriz li? Eski i’n fer bann move swa konsernan frekantasyon oubyen lanmizman? Eski sa bann move swa in annan en move lefe lo son leker? Eski i aksepte ki son bann desizyon ek aksyon in annan en lefe lo son Papa Zeova?

¹⁰ Avek labonte, bann ansyen i kapab demann bann kestyon ki ed sa dimoun konpran akoz i’n fer en pese grav. Par kont, zot pa pou demann bann kestyon personnel ki pa neseser. (Prov. 20:5) Deplis, zot kapab servi bann legzanp ki pou ed sa dimoun rezonnen e konpran akoz son bann aksyon i mal, parey Natan ti fer avek David. Petet pandan sa premye renyon avek bann ansyen, sa dimoun pou konmans santi li vreman tris akoz sa ki i’n fer, i menm kapab repantir konpletman.

11. Ki mannyer Zezi ti tret bann dimoun ki’n fer pese?

¹¹ Bann ansyen i esey imit legzanp Zezi. Ler i ti koz avek Sol sorti Tars, Zezi ki ti’n ganny resisite ti demann li sa kestyon: “Sol, Sol, akoz ou pe persekit mwan?” La Zezi ti pe esey ed li pour rezonnen konsernan son move kondwit. (Akt 9:3-6) Dan ka sa madanm ki apel Zezabel, Zezi ti dir: “Mon’n donn li letan pour repantir.”—Rev. 2:20, 21.

12-13. Ki mannyer bann ansyen i kapab ed en dimoun repantir? (Vwar osi portre.)

¹² Parey Zezi, bann ansyen pa pou vitman krwar ki en dimoun ki’n fer en fot grav pa pou repantir. En dimoun i kapab repantir pandan sa premye renyon avek sa komite, me lezot pou bezwen plis letan. Alor, bann ansyen i kapab fer laranzman pour zwenn plis ki en fwa avek en dimoun ki’n fer en fot grav. Petet apre sa premye renyon, sa Kretyen ki’n fer en fot grav pou konmans reflesi seryezman lo sa ki bann ansyen in dir li. Avek limilite, i kapab konmans priy Zeova. (Ps. 32:5; 38:18) Alor, dan en lot renyon, i kapab konmans demontre en leta lespri ki diferan avek sa enn ki i ti demontre pandan sa premye renyon.

¹³ Pour ed sa dimoun repantir, bann ansyen pou demontre konpasyon ek labonte. Zot annan lespwar e zot priye ki Zeova pou beni zot zefor pour ed sa Kretyen ki’n rezet Bondye revin alarezon e repantir.—2 Tim. 2:25, 26.

14. Lekel ki devret ganny felisite si en dimoun ki’n fer en pese grav i repantir e akoz?

¹⁴ Si sa dimoun i repantir, i annan bokou lazwa dan lesyel! (Lik 15:7, 10) Lekel ki devret ganny felisite pour sa? Bann ansyen? Rapel sa ki Pol ti ekri konsernan bann ki fer pese: “Petet Bondye pou permet zot repantir.” (2 Tim. 2:25) En not letid lo sa verse i dir: “Si en dimoun i sanz son fason panse ek son latitid, pa bann imenn ki devret ganny felisite me loner i al pour Zeova ki’n ed en Kretyen ki’n rezet li, fer sa sanzman enportan. Pol i mansyonn bann zoli rezilta en tel repantans. I fer sa dimoun annan en pli bon konnesans egzakt lo laverite, i ed li pour retourn a la rezon e i ed li pour sorti dan latrap Satan.—2Ti 2:26.”

15. Ki mannyer bann ansyen pou kontinyen ed en dimoun ki’n fer en fot grav e ki’n repantir?

¹⁵ Ler en dimoun i repantir, sa komite pou fer laranzman pour ki sa dimoun i ganny vizite par bann ansyen pour ki sa dimoun i kontinyen ganny sa led ki i bezwen pour lalit avek bann latrap Satan e pour fer en semen ki drwat pour son lipye. (Ebr. 12:12, 13) Byensir bann ansyen pa pou revel avek lezot bann detay konsernan sa fot. Me eski i annan serten keksoz ki kongregasyon i devret ganny enformen?

‘REPRIMANN BANN KI PRATIK PESE DEVAN TOU DIMOUN’

16. Dapre 1 Timote 5:20, ki sa lekspresyon ki Pol ti servi “tou dimoun” i vedir?

¹⁶ Lir 1 Timote 5:20. Pol ti ekri sa bann parol pour en lot ansyen, setadir Timote, an rapor avek lafason ki zot ti bezwen tret “bann ki pratik pese.” Ki sa i vedir? Ler i ti servi sa lekspresyon “tou dimoun” i pa ti neseserman vedir kongregasyon antye. Plito i ti kapab pe refer avek bann ki ti deza konn sa pese. Petet zot ti bann temwen sa ki ti’n arive oubyen sa dimoun ti’n dir zot sa ki i ti’n fer. Alor, dan en fason diskre bann ansyen pou dir sa bann dimoun ki sa sityasyon in ganny trete e ki sa dimoun in ganny konseye.

17. Si preski tou dimoun dan kongregasyon i konnen oubyen pou konnen ki en fot in ganny fer, ki laranzman pou ganny fer e akoz?

¹⁷ Dan serten ka, preski tou dimoun dan kongregasyon i konnen oubyen zot pou konnen ki sa dimoun in fer sa pese. Alor dan sa ka, “tou dimoun” i vedir kongregasyon antye. Alor, en ansyen pou dir kongregasyon ki sa frer oubyen sa ser in ganny reprimande. Akoz? Pol i reponn: “Sa pou en lavertisman pour lezot” pour zot pa fer menm pese.

18. Ki mannyer bann ansyen pou tret bann sityasyon ki enplik bann miner ki’n batize? (Vwar osi portre.)

¹⁸ Ki mannyer nou pou ed bann Kretyen batize ki’n fer en fot grav me ki anba laz? Konsey ansyen pou fer laranzman pour de ansyen zwenn avek sa dimoun ki en miner ek son paran Kretyen.b Bann ansyen pou gete ki paran in fer pour ed zot zanfan repantir. Si sa zanfan i annan en bon latitid e son paran in kapab ed li, sa de ansyen i kapab deside ki i pa neseser pour fer plis ki sa. Apre tou, i responsabilite paran devan Bondye pour koriz zot zanfan avek lanmour. (Det. 6:6, 7; Prov. 6:20; 22:6; Efe. 6:2-4) Tanzantan bann ansyen pou gete si sa paran i kontinyen donn led ki sa zanfan i bezwen. Par kont, ki arive si en frer oubyen en ser batize ki miner i kontinyen fer sa ki mal e i pa repantir? Dan sa ka, en komite ansyen pou zwenn avek li ek son paran Kretyen.

“ZEOVA I ANNAN EN KANTITE KONPASYON EK PITYE”

19. Ki mannyer bann ansyen i esey imit lafason ki Zeova i tret bann ki’n fer pese?

¹⁹ Bann ansyen ki lo en komite i annan sa responsabilite devan Zeova pour gard kongregasyon prop. (1 Kor. 5:7) Zot pou kontan ki bann ki’n fer en pese grav i repantir si posib. Pour sa rezon, bann ansyen i reste pozitif e zot annan lespwar ki en dimoun i kapab sanze. Akoz? Parski zot oule imit Zeova ki “annan en kantite konpasyon ek pitye.” (Zak 5:11) Gete ki mannyer zapot Zan ki ti byen aze ti demontre sa leta lespri. I ti ekri: “Mon bann zanfan, mon pe ekri zot sa bann keksoz pour ki zot pa fer en pese. Pourtan, si en dimoun i fer en pese, nou annan en asistan ki avek nou Papa e sa i Zezi Kri, sa enn ki drwat.”—1 Zan 2:1.

20. Ki nou pou etidye dan sa dernyen lartik dan sa seri?

²⁰ Malerezman, parfwa i arive ki en Kretyen i refize repantir. Si i leka, i pou bezwen ganny tire dan kongregasyon. Ki mannyer bann ansyen pou tret en tel sityasyon? Nou pou get sa dan sa dernyen lartik dan sa seri.