Kwen Kestyon

◼ Lekel ki devret fer lapriyer dan bann renyon kongregasyon?

Lapriyer kongregasyon i en parti esansyel dan nou ladorasyon. Reprezant lezot devan Zeova i en privilez ki presye e i en responsabilite ki serye. Etan donnen ki i annan en gran lenportans, bann ansyen i bezwen servi bon zizman kan zot deside ki frer ki kalifye pour reprezant kongregasyon dan lapriyer, kan nou fer renyon. Bann frer batize ki reprezant kongregasyon i devret bann minis Kretyen ki matir, ki annan repitasyon konman bann bon legzanp e ki ganny respekte par kongregasyon. Zot lapriyer senser e respektab i devret demontre en bon relasyon avek Zeova. Lartik “Des Prières publiques qui viennent d’un coeur humble” dan La Tour de Garde le 15 Me, 1986, i souliny bann prensip enportan ki spesyalman itil pour bann ki priy piblikman lo non kongregasyon.

Bann ansyen pa pou les en frer fer lapriyer si i annan en kondwit ki pa serye oubyen ki donn doutans. En frer ki mekontan oubyen ki tant pour servi lapriyer piblik konman en mwayen pour ekspoz bann diferans personnel, pa pou ganny swazir. (1 Tim. 2:8) Menm si en frer adolesan in batize, bann ansyen pou bezwen determinen si i annan matirite spirityel pour priy lo non kongregasyon.—Akt 16:1, 2.

Detanzaot, pandan bann renyon predikasyon, petet i pou neseser pour en ser batize ofer lapriyer si napa en frer kalifye pour reprezant group. I pou bezwen kouver son latet dan en fason apropriye. Si i annan probabilite ki en frer kalifye pa pou prezan kot serten renyon predikasyon, bann ansyen i devret deziny en ser kalifye pour pran sa linisyativ.

Abityelman, se tyermenn renyon piblik ki ofer lapriyer lentrodiksyon. Parkont dan bann lezot renyon kongregasyon, kot i annan ase frer kalifye, enn apard sa frer ki’n entrodwir renyon oubyen sa enn ki’n ganny dezinyen pour fer dernyen size, i kapab ganny demande pour prezant lapriyer lentrodiksyon ou final. Antouka, sa frer ki pou ganny demande pour prezant lapriyer dan en renyon i bezwen ganny enformen davans afen ki i kapab mazin en pe lo sa ki i pou dir. Alors i kapab ofer en lapriyer koeran e senser ki apropriye pour sa renyon partikilye.

I pa neseser ki sa bann lapriyer i long. Kan en frer i ofer en lapriyer piblik, lodyans pou normalman pli byen konpran si i debout, i koz ase for e eksprim li klerman. Sa pou permet tou bann ki’n rasanble pour antann lapriyer e alafen pour dir en “Amenn!” senser.—1 Kron. 16:36; 1 Kor. 14:16.