Setyenm Parti—Kondwir bann Letid Labib ki progrese
Fer Lapriyer dan Letid
1. (a) Akoz i byen pour konmans e termin en letid Labib avek lapriyer? (b) Ki mannyer nou kapab entrodwir lapriyer dan en letid Labib?
1 Benediksyon Zeova i neseser pour bann etidyan Labib kapab progrese. (1 Kor. 3:6) Alors, i byen pour konmans e termin en letid avek lapriyer. Souvan nou kapab fer sa dan nou premye letid avek en dimoun ki relizye. Avek lezot etidyan, nou bezwen determin moman apropriye pour konmans fer lapriyer. Ou kapab servi Psonm 25:4, 5 ek 1 Zan 5:14 pour ed sa etidyan vwar akoz lapriyer i devret ganny fer e osi servi Zan 15:16 pour eksplik lenportans pour priy Zeova atraver Zezi Kri.
2. Si en frer batize oubyen en proklanmater zonm ki pa ankor batize i akonpanny en ser lo en letid, lekel ki pou fer lapriyer?
2 Lekel ki devret fer lapriyer dan en letid Labib? Si en frer batize i akonpanny en ser lo en letid, sa frer pou fer lapriyer, menm si sa ser i kapab kondwir sa letid avek son latet kouver. (1 Kor. 11:5, 10) De lot kote, si en proklanmater zonm ki pa ankor batize i akonpanny en ser lo en letid, sa ser pou fer lapriyer. Dan en ka koumsa, sa ser pou bezwen kouver son latet ler i pe fer lapriyer osi byen ler i pe kondwir letid.
3. Ki bann keksoz apropriye nou kapab enkli dan lapriyer ki nou fer dan en letid Labib?
3 Ki devret enkli dan Lapriyer: Lapriyer dan en letid Labib pa devret long, me i devret spesifik. Apard ki demann Bondye pour beni sa letid e remersi li pour sa laverite, i apropriye pour loue Zeova konman sa Sours lenstriksyon. (Iza. 54:13) Nou kapab enkli bann parol ki montre nou lentere senser dan sa etidyan e nou lapresyasyon pour sa lorganizasyon ki Zeova pe servi. (1 Tesa. 1:2, 3; 2:7, 8) Ler nou priy Zeova pour beni zefor sa etidyan pour aplik sa ki i pe aprann, i kapab ed li pour vwar lenportans pour ‘met an pratik laparol.’—Zak 1:22.
4. Ki byenfe konmans e termin en letid Labib avek lapriyer i anmennen?
4 I annan en kantite byenfe ler nou fer lapriyer. I anmenn benediksyon Zeova. (Lik 11:13) I montre ki etidye Parol Bondye i en keksoz serye. Anmezir ki sa etidyan i ekout nou lapriyer, i pe aprann ki mannyer pour priye. (Lik 6:40) Deplis, lapriyer ki sorti dan en leker ranpli avek lanmour pour Bondye ek rekonesans pour son bann kalite remarkab, i kapab ed sa etidyan devlop en relasyon personnel avek Zeova.