Anmase
Kondwir bann Letid Labib ki progrese
Sa sipleman i en koleksyon bann pwen enportan sorti dan en seri lartik lo kondwir bann letid Labib ki progrese ki’n aparet dan Nou Minister Rwayonm. Tou dimoun i ganny ankouraze pour anmas sa sipleman e pour refer avek li ler pe kondwir bann letid Labib. Deplis, bann pwen dan sa sipleman i kapab ganny servi dan bann randevou predikasyon, e bann sirveyan servis i kapab servi li konman baz pour fer bann diskour ki zot prezante ler pe vizit bann group letid liv.
Parti 1: Kisisa en Letid Labib?
Si ou servi nou bann piblikasyon pour fer bann diskisyon lo Labib regilyerman e dan en fason annord, menm si i bref, ou pe kondwir en letid Labib. Sa letid i kapab ganny raporte ler i’n ganny fer de fwa apre ki ou’n fer laranzman letid e si i paret ki sa letid pou kontinyen.—km 7/04 p. 1.
Bann Piblikasyon ki kapab ganny servi
◼ Sa ki Bondye i ekspekte nou fer
◼ Konnesans Ki Anmenn ver Lavi Eternel
◼ Ador sa sel vre Bondye
◼ Ou Kapab Vin Zanmi Bondye! i kapab ganny servi pour fer letid avek bann dimoun ki napa bokou ledikasyon ouswa ki pa konn byen lir.
Parti 2: Prepare pour kondwir Letid
Nou bezwen prezant sa lenformasyon dan en fason ki tous leker sa etidyan. Sa i demann en preparasyon oprofon avek sa etidyan antet.—km 8/04 p. 1.
Konman pour prepare
◼ Egzamin tit, bann soutit, ek bann led vizyel sa sapit oubyen sa leson.
◼ Idantifye larepons pour sak kestyon ki ganny demande, mark zis bann mo ek fraz kle.
◼ Deside ki verse Labib ki pou ganny lir pandan letid. Fer bann not bref dan bann lespas akote paz.
◼ Prepar en revizyon bref lo bann pwen enportan.
Adapte sa Leson avek bezwen sa Etidyan
◼ Priy konsernan sa etidyan ek son bezwen.
◼ Mazin bann pwen ki sa etidyan i kapab trouv difisil pour konpran ouswa pour aksepte.
◼ Demann ou lekor: Ki sa etidyan i bezwen konpran ouswa amelyore pour li progrese spirityelman? Ki mannyer mon kapab tous son leker?
◼ Si i neseser, prepar en legzanp, en leksplikasyon, oubyen en seri kestyon pour ed sa etidyan konpran en pwen oubyen en verse Labib.
Parti 3: Servi byen bann Verse Labib
Nou bi pour kondwir bann letid Labib se pour ‘fer disip.’ Nou fer sa par ed dimoun konpran e aksepte lansennyman Parol Bondye e aplik li dan zot lavi. (Mat. 28:19, 20; 1 Tesa. 2:13) Alors, sa letid i devret baze lo Labib.—km 11/04 p. 4.
Ansenny sa ki dan Parol Bondye
◼ Montre sa etidyan ki mannyer pour rod serten verse dan son prop Labib.
◼ Gete e diskit bann verse ki montre rezon biblik pour nou krwayans.
◼ Servi kestyon. Olye eksplik bann verse Labib avek sa etidyan, fer li eksplik ou sa bann verse.
◼ Gard li senp. Pa sey eksplik tou keksoz dan en verse. Eksplik zis sa ki neseser pour fer kler sa pwen.
◼ Fer laplikasyon pratik. Ed sa etidyan vwar konman bann verse Labib i aplik pour li personnelman.
Parti 4: Montre Etidyan konman pour prepare
En etidyan ki lir son lenformasyon ki i pou etidye davans, souliny larepons, e mazinen konman pour reponn dan son prop mo i fer progre spirityel vitman. Alors, enn fwa ki en letid Labib regilye in ganny etablir, prepar en leson ansanm avek ou etidyan pour montre li konman pour prepare. Avek laplipar etidyan, i pou itil pour prepar en sapit ouswa en leson antye ansanm.—km 12/04 p. 1.
Souliny Larepons e fer bann Not
◼ Eksplik sa etidyan konman pour trouv larepons dan paragraf pour bann kestyon.
◼ Montre li ou liv ouswa brosir kot ou’n souliny zis bann mo ek fraz enportan.
◼ Ed sa etidyan vwar ki sak teks ki’n ganny mansyonnen i siport en pwen dan paragraf, e montre li konman pour fer bann not dan lespas vid dan son liv oubyen brosir.
En Apersi ek Revizyon
◼ Montre sa etidyan konman pour egzamin tit sa sapit oubyen sa leson, bann soutit, ek portre avan i konmans prepar oprofon.
◼ Ankouraz sa etidyan pour reviz bann pwen enportan alafen son preparasyon.
Parti 5: Deside ki Kantite Lenformasyon pour kouver
Lakantite lenformasyon ki pou ganny egzaminen pou depan lo abilite ek sitiasyon sa ansennyan ek sa etidyan.—km 1/05 p. 1.
Batir Lafwa ferm
◼ I pli enportan ed en etidyan byen konpran sa lenformasyon olye ki kouver en kantite lenformasyon dan en pti gin letan.
◼ Pas kantite letan ki neseser pour ed en etidyan konpran e aksepte sa ki i pe aprann.
◼ Dedye sifizaman letan pour egzamin bann verse Labib enportan ki sa lansennyman i baze lo la.
Konsantre lo Tenm sa letid
◼ Si sa etidyan i tant pour koz en kantite lo bann keksoz personnel, ou kapab fer laranzman pour koz sa bann keksoz apre letid.
◼ Pa koz tro bokou pandan letid. Pa diskit tro bokou lo bann pwen segonder ek leksperyans ki kapab anpes sa etidyan ganny en konnesans egzakt lo bann lansennyman Labib.
Parti 6: Ler en Etidyan i demann Kestyon
Enn fwa ki en letid Labib in ganny byen etablir, i pli byen pour egzamin bann lansennyman Labib dan lord olye zis swazir en nenport size. Sa i ed sa etidyan batir en fondasyon pour konnesans egzakt e pour progrese spirityelman.—km 2/05 p. 6.
Annan bon Zizman
◼ Bann kestyon ki relye avek lenformasyon i kapab ganny reponn toudswit.
◼ Bann kestyon ki pa relye avek lenformasyon ki pe ganny etidye oubyen ki demann fer resers i kapab ganny egzaminen en lot ler. I kapab itil pour ekrir sa bann kestyon.
◼ Si sa etidyan i vwar li difisil pour aksepte en serten lansennyman, egzamin lezot lenformasyon ki diskit sa size oprofon.
◼ Si sa etidyan pa ankor konvenki, les sa size pour en lot ler e kontinyen avek letid.
Konn ou Limit
◼ Si ou pa konn larepons en kestyon, pa donn ou lopinyon personnel.
◼ Montre sa etidyan ptit-a-pti konman pour fer resers.
Parti 7: Fer Lapriyer dan Letid
Benediksyon Zeova i neseser pour bann etidyan Labib kapab progrese. Alors, i byen pour konmans e termin en letid avek lapriyer.—km 3/05 p. 4.
Konman pour konmans fer Lapriyer
◼ Souvan nou kapab fer lapriyer lo premye letid avek en dimoun ki relizye.
◼ Avek lezot etidyan, nou bezwen determin moman apropriye pour konmans fer lapriyer.
◼ Psonm 25:4, 5 ek 1 Zan 5:14 i kapab ganny servi pour eksplike akoz lapriyer i ganny fer.
◼ Zan 15:16 i kapab ganny servi pour montre ki nou devret priy Zeova atraver Zezi Kri.
Ki pour enkli dan Lapriyer
◼ I apropriye pour loue Zeova konman sa Sours lenstriksyon.
◼ Eksprim lentere senser dan sa etidyan.
◼ Eksprim lapresyasyon pour sa lorganizasyon ki Zeova pe servi.
◼ Demann Zeova pour beni zefor sa etidyan pour aplik sa ki i pe aprann.
Parti 8: Diriz Etidyan ver Lorganizasyon
Nou bi ler nou kondwir bann letid Labib i pa zis pour donn bann lansennyman me osi pour ed bann etidyan form parti kongregasyon Kretyen. Pran detrwa minit sak semenn dan letid pour partaz en pwen lo lorganizasyon.—km 4/05 p. 8.
Renyon
◼ Eksplik sak renyon. Envit zot pour asiste renyon depi premye letid.
◼ Partaz bann zoli pwen ki’n ganny prezante dan renyon.
◼ Ogmant lantouzyasm pour Memoryal, bann lasanble, ek vizit sirveyan rezyonal.
◼ Servi bann portre dan nou bann piblikasyon pour ed zot esey vwar dan zot lespri sa ki pase dan renyon.
◼ Ankouraz zot pour lir sa brosir Les Témoins de Jéhovah: Qui sont-ils? Quelles sont leurs croyances?
Servi bann Video pour devlop Lapresyasyon
◼ Les Témoins de Jéhovah: un nom, une organisation
◼ Toute la communauté de nos frères
◼ Unis grâce à l’enseignement divin
◼ Jusqu’aux extrémités de la terre
Parti 9: Prepar Etidyan pour donn Temwannyaz enformel
Ler bann etidyan Labib i konmans demontre lafwa dan sa ki zot pe aprann, zot santi zot motive pour koz lo la.—km 5/05 p. 1.
Ankouraz zot pour donn Temwannyaz
◼ Eski i annan bann zanmi ek fanmiy ki zot ti pou kapab envite pour asiste letid?
◼ Eski zot bann koleg travay, kanmarad lekol, oubyen lezot dimoun ki zot konnen in demontre lentere dan sa bon nouvel?
Form zot pour partaz zot Krwayans
◼ En serten moman pandan letid demann sa etidyan, “Ki mannyer ou pou servi Labib pour eksplik sa laverite avek ou fanmiy?”
◼ Ed sa etidyan konpran nesesite pour demontre respe e zantiy ler i pe koz avek lezot lo Zeova ek son plan.
◼ Bann etidyan i kapab servi sa brosir Les Témoins de Jéhovah: Qui sont-ils? Quelles sont leurs croyances? pour ed bann zanmi ek fanmiy konpran nou krwayans ki baze lo Labib e osi sa ki nou fer.
Parti 10: Form Etidyan pour pres port-an-port
Ler bann ansyen i dakor ki en etidyan Labib i kalifye konman en proklanmater ki pa ankor batize, i kapab konmans pres avek kongregasyon.—km 6/05 p. 1.
Prepar ansanm
◼ Montre sa nouvo proklanmater kote i kapab trouv bann prezantasyon.
◼ Ed li swazir en prezantasyon senp ki aplik pour nou teritwar.
◼ Ankouraz li pour servi Labib dan son predikasyon.
◼ Egzers ansanm. Montre li ki mannyer pour byen fer fas avek bann reaksyon ki nou souvan rankontre.
Pres ansanm
◼ Les sa etidyan obzerve pandan ki ou prezant sa prezantasyon ki zot ti prepare ansanm.
◼ Pran an konsiderasyon personnalite ek abilite sa etidyan. Dan serten ka, i kapab pli byen pour fer li prezant zis en bout sa prezantasyon.
◼ Ed sa nouvo proklanmater etablir en progranm regilye pour partisip dan predikasyon.
Parti 11: Ed bann Etidyan pour fer retourn Vizit
Preparasyon pour fer en retourn vizit i konmans avek premye vizit. Ankouraz sa etidyan pour annan en lentere senser dan bann dimoun ki i koz avek. Ptit-a-pti form sa nouvo proklanmater pour ankouraz bann dimoun pour eksprim sa ki zot panse, pour ekout zot komanter, e pour pran not lo bann keksoz ki sa bann dimoun i enterese avek.—km 7/05 p. 1.
Preparasyon pour retournen
◼ Rediskit sa premye vizit, e ed sa etidyan pour swazir en size ki pou atir sa dimoun.
◼ Prepar en prezantasyon bref ki enkli en verse Labib ek en paragraf dan en piblikasyon.
◼ Prepar en kestyon ki kapab ganny demande alafen sa diskisyon.
Swiv Lentere avek bokou Latansyon
◼ Ankouraz sa etidyan pour retournen san tarde kot tou dimoun ki montre lentere.
◼ Ed sa etidyan vwar nesesite pour persiste ler i pe sey trouv bann ki difisil pour zwenn.
◼ Montre sa nouvo proklanmater konman pour fer bann laranzman pour retournen, e ed li konpran nesesite pour retournen parey i’n promet.
Parti 12: Ed Etidyan konmans e kondwir Letid Labib
I tre enportan ki ou imit Zezi par demontre en bon legzanp dan ou predikasyon. Ler ou etidyan i obzerv ou legzanp dan predikasyon, i pou konpran ki lobzektif retourn vizit se pour konmans bann letid Labib.—km 8/05 p. 1.
Ofer en Letid Labib
◼ Eksplik sa etidyan ki normalman i pa neseser pour dekrir laranzman letid an detay.
◼ Laplipar-di-tan i pli byen pour demontre konman fer letid par servi enn oubyen petet de paragraf dan en piblikasyon ki ganny servi pour fer letid.
◼ Reviz e egzers enn bann prezantasyon pour konmans bann letid Labib.—km 8/05 p. 8; km 1/02 p. 6.
Form bann Etidyan pour vin Ansennyan
◼ Ankouraz etidyan pour antre dan Lekol Minister Teokratik.
◼ Fer laranzman pour bann nouvo proklanmater akonpanny ou lo lezot letid Labib kot zot a kapab partisip en pe pour ansennyen.