Prepar byen pour ansennyen
1. Kan nou pe kondwir en letid Labib, akoz nou devret konsantre lo fer nou etidyan devlop en gran lapresyasyon pour sa ki i pe aprann?
1 Kan nou pe kondwir en letid Labib, nou bezwen byen prepare si nou anvi motiv sa etidyan pour servi Zeova. Pour nou zefor reisi, nou bezwen fer nou etidyan devlop en lapresyasyon pour sa ki i aprann dan Labib. An retour, sa pou motiv sa etidyan. (Det. 6:5; Prov. 4:23; 1 Kor. 9:26) Alor ki mannyer nou kapab fer sa?
2. Ki rol lapriyer i annan kan nou pe fer en bon preparasyon?
2 Priye avan: Vi ki se Zeova ki fer lagrenn laverite pouse dan leker sa etidyan, i byen ki avan nou konmans prepar sa letid nou priy spesifikman pour sa etidyan e konsernan son bann bezwen. (1 Kor. 3:6; Zak 1:5) En lapriyer koumsa i kapab osi ed nou pour vwar ki mannyer nou kapab pli byen ed li pour ranpli son leker avek “konnesans” egzakt lo lavolonte Zeova.—Kol. 1:9, 10.
3. Ki mannyer nou kapab gard sa etidyan antet kan nou pe prepare?
3 Pran an konsiderasyon sa etidyan: Zezi ti konnen ki pour ansenny dan en fason efikas i enplik pran an konsiderasyon son lodyans. Lo omwen de lokazyon Zezi ti ganny demande sa menm kestyon: “Ki fodre mon fer pour mwan erit lavi eternel?” Sak fwa ki i ti pe reponn sa kestyon i ti servi diferan lapros. (Lik 18:18-20;10:25-28) Nou devret gard sa etidyan antet anmezir ki nou pe prepare. Ki verse ki’n ganny mansyonnen ki nou pou lir avek li? Ki kantite lenformasyon ki nou pou esey kouver? Ki pwen dan sa leson ki petet sa etidyan pour ganny difikilte pour konpran oubyen aksepte? Si nou kapab esey mazin detrwa kestyon ki i kapab demande, nou pou pli byen prepare pour donn li en larepons ki pou tous son leker.
4. Kwa ki enplike pour fer en bon preparasyon?
4 Revwar sa lenformasyon: Menm si nou’n etidye sa lenformasyon plizyer fwa dan lepase, i pou sa premye fwa ki nou pou etidye li avek sa etidyan. Si nou anvi tous leker sa etidyan, i enportan pour nou fer en bon preparasyon pour sak letid. Sa i vedir ki nou bezwen fer sa ki nou ankouraz nou etidyan pour fer. Revwar sa lenformasyon enkli sa bann verse ki’n ganny mansyonnen, gard sa etidyan antet e petet souliny bann pwen prensipal.—Rom. 2:21, 22.
5. Ki mannyer nou kapab imit Zeova?
5 Zeova i senserman enterese avek progre sak etidyan Labib. (2 Pyer 3:9) Kan nou pran letan pour prepare pour sak letid Labib, nou demontre sa menm kalite lentere ranpli avek lanmour.