Lavi i An Risk!
1 Labib i fer kler ki lavolonte Zeova se ki ‘tou sort dimoun i ganny sove.’ Sepandan, i osi vre ki lavenir sa bann bilyon dimoun lo later, i depan lo zot latitid anver Zeova ek son Rwayonm par Zezi Kri. En bon latitid i baze selman lo “konnesans laverite.” (1 Tim. 2:3, 4) Pandan ki nou averti ki byento later pou ganny netwaye avek tou mesanste afen ki i a posib pour Bondye met an plas son nouvo monn zis, nou’n osi ganny demande pour fer en travay endispansab ki sov lavi.—Mat. 24:14; 28:19, 20; Rom. 10:13-15.
2 Akoz i Sitan Irzan? Zezi ti donn lavertisman konsernan “en [gran ladetres, NW], pli terib ki tou sa ki’n deza annan avan, depi konmansman lemonn ziska konmela.” (Mat. 24:21) Sa peryod ladetres pou atenn son pli gran moman zour Armagedon. (Rev. 16:16) Lamas dimoun ki pe fer fas avek destriksyon si zot pa reazir favorableman anver sa bon nouvel, i enkli nou bann fanmiy enkrwayan, nou vwazen, konpanyon travay, kanmarad lekol ek lezot ki nou konnen. Me nou konsern se pour ed ‘tou sort dimoun’ an imitan Bondye, ki ti manifeste son lanmour pour limanite antye an donan son Garson, Zezi Kri, konman en ranson pour tou. (Zan 3:16) Avek zel, nou bezwen fer tou nou posib pour envit tou dimoun pour tay ver labri Bondye. An desarzan sa travay predikasyon plennman, nou evite vin koupab pour lavi lezot.—Ezek. 33:1-7; 1 Kor. 9:16.
3 Ki Nou Lobzektif? Lenportans sa travay predikasyon i ganny soulinyen partou dan Parol Bondye. Parey Pol i eksprimen, “lanmour ki Kris i annan i obliz nou” pour viv an armoni avek bann prensip Bondye. (2 Kor. 5:14, NW) Deplis, La Tour de Garde i souvan met lanfaz lo nou lobligasyon pour prese. Nou Minister Rwayonm pe kontinyelman fourni direktiv lo konman pour akonpli sa travay predikasyon. Bann ansyen i organiz sa travay e ankouraz nou pour partisip ladan. Lezot proklanmater i envit nou pour partisip avek zot dan minister. Nou antann bokou konsernan prepar nou prezantasyon, ofer magazin ek lezot piblikasyon, fer retourn vizit, kondwir letid Labib, e servi tou loportinite pour donn en temwannyaz. Tousala i ed nou pour akonpli nou lobzektif pour sov lavi.—1 Kor. 9:22, 23; Efe. 1:13.