Servi bann Aktyalite pour Stimil Lentere
1 Eski ou ti a kontan annan en rezerv permanan bann bon lide ki gard ou minister touzour nouvo e ki stimil lentere dimoun dan mesaz Labib? Alor servi sa ki pe arive lo lasenn mondyal e dan ou kominote pour konmans bann konversasyon. Ou kapab servi bann levennman lokal oubyen bann size nouvel nasyonal e enternasyonal. Sa bann levennman i touzour pe sanze. (1 Kor. 7:31) Konsider sa bann legzanp.
2 Problenm ekonomik ek pri lavi i vreman preokip dimoun. Alor, ou kapab dir:
◼ “Ou’n tande lo nouvel ki pri [mansyonn sa komodite] pe mont ankor?” Oubyen ou kapab fer komanter lo problenm lanplwa si resanman en lakonpanni in met plizyer travayer deor. Depandan lafason ki ou anvi pourswiv ou diskisyon, ou kapab kontinyen par demann enn ant sa de kestyon, “Eski ou’n deza demann ou lekor akoz ki i sitan dir pour ganny nou lavi?” oubyen “Eski ou krwar ki i pou touzour difisil pour ganny nou dipen?”
3 Rapor lo vyolans, tel konman bann trazedi dan fanmiy oubyen parmi bann etidyan lekol, i fourni en baz pour en lot diskisyon. Ou kapab demande:
◼ “Ou’n lir dan zournal ki [nonm trazedi dan kominote]?” Apre demann swa “Kwa ki ou panse i lakoz sitan bokou vyolans dan lemonn?” oubyen “Eski ou krwar pou annan en letan kot en zour nou pou kapab santi nou an sekirite?”
4 Nouvel lo bann inondasyon ek tranbleman-d-ter devaster, oubyen konfli sivil dan diferan parti lemonn i osi ofer size ki stimil lentere. Par egzanp, ou kapab demande:
◼ “Eski Bondye i responsab pour [nonm sa dezas natirel]?” Oubyen ou kapab port son latansyon lo sa dernyen konfli sivil e dir: “Si tou dimoun i anvi lape, akoz ki i sitan difisil pour ganny li?”
5 Reste atantif anver bann levennman aktyel afen ki ou a kapab servi li dan ou lentrodiksyon. Bann sizesyon itil i trouve anba soutit “Actualité,” lo paz 9-10 dan liv Comment Raisonner. Sepandan, evite pran kote avek bann problenm politik e sosyal. Plito, diriz latansyon ver Lekritir ek Rwayonm Bondye konman sa sel solisyon permanan pour problenm limanite.