Pres Mesaz Rwayonm dan en Lemonn ki toultan pe sanze
1 Pa keksoz i sanz vitman! En sel kou, en dezas natirel, en kriz ekonomik, en konfli politik, ouswa en trazedi ki pe domin laktyalite, i kapab vin en topik konversasyon. Demenm, dimoun i kapab vitman tir zot latansyon lo en keksoz e i met li lo en lot keksoz. (Akt 17:21; 1 Kor. 7:31) Dan sa lemonn ki toultan pe sanze, konman nou kapab ganny latansyon bann dimoun pour kapab partaz mesaz Rwayonm avek zot?
2 Rekonnet sa ki pe trakas zot: En fason ki nou kapab ganny latansyon bann dimoun se kan nou koz lo bann levennman aktyel. En fwa, ler Zezi ti pe ankouraz sa bann ki ti pe ekout li pour mazin seryezman lo zot relasyon avek Bondye, i ti mansyonn serten trazedi ki ti’n fek arive ki ti ankor dan zot lespri. (Lik 13:1-5) Dan menm fason, ler nou pe prezant sa bon nouvel, i byen ki nou refer avek en aktyalite oubyen en topik ki bann dimoun dan nou teritwar i enterese avek. Me ler nou pe koz lo sa bann keksoz, nou devret fer byen atansyon ki nou pa siport okenn topik politik oubyen sosyal.—Zan 17:16.
3 Omoman ki nou pe prese, ki mannyer nou kapab konn sa ki pe preokip lespri bann dimoun? Petet pli bon fason se pour zis demann en kestyon e apre ekout sa ki sa dimoun i dir. (Mat. 12:34) Lentere dan lezot dimoun, pou pous nou pour ekout byen zot pwennvi e rod plis lenformasyon an servan bann kestyon byen swazir. En remark san reflesir ki en met lakour i fer, i kapab revel en keksoz ki pe trakas bokou lezot dimoun dan sa landrwa. Sa i kapab donn loportinite pour donn en temwannyaz.
4 Prepar en Prezantasyon: Ler nou pe prepare pour predikasyon dan en lemonn ki toultan pe sanze, nou kapab servi liv Comment raisonner. Bann sizesyon itil lo konman pour enkli bann aktyalite dan nou prezantasyon i trouve lo paz 10-11, anba soutit “Crime/Safety” ek “Current Events,” an Angle, e paz 9-11, anba soutit “Actualité” ek “Crime/Sécurité,” an Franse. Osi dan Nou Minister Rwayonm Septanm 2000, paz 4, i annan bann lenformasyon en pe parey. Ler ou pe prepar ou prezantasyon, pa oubliye pour enkli en verse apropriye.
5 Anmezir ki nou vey lentere bann dimoun ki pe toultan sanze dan nou teritwar, nou bezwen adapte nou prezantasyon dapre sa ki pe enteres zot. Dan sa fason, nou pou koz avek bann dimoun lo sa ki pe vreman afekte zot lavi. Ler nou fer sa, nou ed bokou dimoun arive konn sa Enn ki son bann kalite ek standar pa sanze.—Zak 1:17.