Montre Lentere senser—Par fer Preparasyon
1 Ler nou fer en bon preparasyon pour predikasyon, sa i ed nou pour montre ki nou vreman enterese avek lezot. Ki mannyer? Ler nou’n byen prepare, nou pa pou zis konsantre avek nou prezantasyon, me nou kapab donn plis latansyon sa dimoun ki nou pe koz avek. Anplis ki sa, i osi ed nou pour pa sitan anba presyon e koz dan en fason natirel. Me ki mannyer nou kapab prepar en bon prezantasyon?
2 En Prezantasyon apropriye: Swazir en prezantasyon dan Nou Minister Rwayonm Zanvye 2006 ki apropriye kot ou pe reste, e vwar konman ou kapab met li dan ou prop mo. Adapte li avek ou teritwar. Par egzanp, si tanzantan ou zwenn dimoun sorti dan serten larelizyon oubyen lezot pei, mazinen ki mannyer ou prezantasyon i kapab enteres zot. Ler ou adapte ou lapros avek sa bann dimoun zot pou vwar ki ou enterese avek zot.—1 Kor. 9:22.
3 Pandan ki ou pe konmans ou prezantasyon, ou kapab kontinyen amelyor li. Vi ki sa ki nou dir okonmansman i tre enportan, gete konman sa dimoun i reazir anver ou lentrodiksyon. Eski sa topik i enteres zot? Eski kestyon ki mon demande i fer zot koze? Si non, fer bann pti sanzman ziska ki ou lapros i marse.
4 Pour kapab rapel: Bokou proklanmater i ganny difikilte pour rapel en prezantasyon ler zot devan laport en dimoun. Si ou osi ou koumsa, eski ou’n sey egzers ou prezantasyon aotvwa avek en lot dimoun? I pou ed ou gard bann lide antet e prezant zot dan en bon fason e pli senp posib. I osi kapab prepar ou pour fer fas avek nenport fason ki dimoun i reazir.
5 En lot fason pour rapel en prezantasyon i ler ou ekrir li an bref lo en bout papye. E zis avan ariv kot laport en dimoun ou kapab zet en kou-d-ey lo la. Serten proklanmater in vwar ki sa i ed zot pour vin pli alez e fer konversasyon pli byen avek dimoun. Dan sa bann fason, en bon preparasyon i kapab ed nou montre lentere senser dan lezot e amelyor nou prezantasyon ler nou pe pres sa bon nouvel.