Eski ou pare pour adapte?

1. Ki azisteman nou bezwen fer lefet ki lemonn pe sanze?

¹ Dan 1 Korentyen 7:31, (NW) Labib i konpar lemonn avek en pyes teat kot bann senn ek akter pe kontinyelman sanze. Lefet ki i annan bann sanzman dan lemonn, sa i fer ki detanzaot nou bezwen sanz nou bann metod predikasyon, nou progranm ek nou lapros. Eski ou pare pour adapte?

2. Akoz nou bezwen adapte pour ki nou kapab bouz menm vites avek lorganizasyon Zeova?

² Ou metod predikasyon: Bann vre Kretyen in touzour pe adapte. Kan Zezi ti anvoy son bann disip prese pour premye fwa, i ti dir zot pa bezwen anmenn sak, oubyen larzan dan zot portmonnen. (Mat. 10:9, 10) Par kont, plitar i ti dir lekontrer akoz i ti konnen ki dimoun ti pou persekit son bann disip e predikasyon ti pou propaze dan plis teritwar ankor. (Lik 22:36) Boner dan bann lannen 1900, lorganizasyon Zeova ti servi diferan metod predikasyon, par egzanp, kart temwannyaz, transmisyon lo radyo ek portvwa lo loto, anfet, bann mwayen ki ti egziste sa lepok. Konmela, vi ki dan bokou landrwa dimoun pa souvan kot zot, en kantite lanfaz pe ganny mete lo temwannyaz an piblik ek lo semen olye zis portanport. Nou’n osi ganny ankouraze pour pres portanport lo tar apremidi si dimoun pe travay pandan lazournen. Anmezir saret Zeova dan lesyel i bouze e sanz direksyon, eski ou pe bouz menm vites avek li?​—Ezek. 1:20, 21.

3. Akoz ler nou adapte nou prezantasyon, sa i kapab ed nou pour pli efikas dan nou teritwar?

³ Ou prezantasyon: Ki dimoun dan ou teritwar i enterese avek konmela? Eski se lekonomi? Eski se zot fanmir? Eski zot konsernen avek lager? I byen pour konn problenm ki pe arive ensi ki sityasyon ki bokou dan ou teritwar i ladan pour ki ou kapab prepar en prezantasyon ki apropriye. (1 Kor. 9:20-23) Kan en met lakour i eksprim son lekor, olye zis donn li en larepons bref e kontiny ou prezantasyon ki ou’n prepare, akoz ou pa adapte ou prezantasyon e koz avek li lo sa ki pe enkyet li?

4. Akoz nou devret adapte deswit?

⁴ Tre byento, dernyen “senn” sa lemonn pou terminen e gran ladetres pou konmanse. “Letan i kourt.” (1 Kor. 7:29) Alor, pa i vreman enportan ki nou adapte deswit pour ki nou kapab akonplir bokou dan sa ptigin letan ki reste!