Eski ou kapab adapte ou Progranm?
1. Akoz nou devret adapte nou progranm predikasyon?
1 Konman bann vre Kretyen, nou aksepte sa lenvitasyon pour “lapes dimoun.” (Mat. 4:19) Parey bann peser, nou ti pou kontan ganny pli bon rezilta dan sa travay lapes si nou fer en progranm pour pres en ler kot nou trouv dimoun. En sa bann moman apropriye se lo tar apremidi apre ler travay. Plis dimoun i kot zot lakour. Souvan, zot pli relaks e zot pli pare pour resevwar dimoun. Eski ou kapab adapte ou progranm pour pres dan sa bann ler?—1 Kor. 9:23.
2. Nonm serten fason nou kapab zwenn plis dimoun avek sa bon nouvel.
2 Pres lo tar: Ler nou fer plan pour pres lo tar, sa pou ed nou zwenn plis dimoun avek sa bon nouvel. (Prov. 21:5) Bann zenn i kapab al prese apre lekol. Lezot proklanmater i kapab al prese apre travay. Serten group letid liv i kapab fer laranzman pour prese enn er-d-tan avan oubyen apre letid liv.
3. Dan ki fason ou kapab pres lo tar kot ou reste?
3 Ler nou pres port an port lo tar, nou kapab koz avek bann ki normalman pa kot lakour. Dan bokou landrwa, travay dan semen ek lezot form temwannyaz piblik i kapab ganny fer lo tar. Plizyer proklanmater in vwar ki lo tar i pli bon moman pour fer bann retourn vizit e osi pour konmans bann letid Labib.
4. Akoz i enportan pour montre disernman e pour annan konsiderasyon ler pe pres lo tar?
4 Disernman: Nou bezwen annan bon zizman kan nou pe pres lo tar. Normalman, i pli byen pour pres en pti pe pli boner, olye ki pres ler bann dimoun pe al dormi. (Fili. 4:5) Ler ou tap laport, debout kot sa dimoun i kapab vwar ou, e entrodwir ou lekor klerman. Fer li konn bi ou vizit vitman. Si ou vin dan en moman pa apropriye, par egzanp si en fanmiy pe al manze, ou kapab sizere ki ou retourn en lot ler. Ou bezwen toultan annan konsiderasyon.—Mat. 7:12.
5. Ki mannyer nou kapab evit bann danze ler nou pe prese?
5 Nou bezwen vey nou kont danze. Si ou pe pres ler fernwanr pe konmans fer oubyen dan fernwanr, i byen pour mars a de oubyen an group. Reste dan bann landrwa kot i annan lalimyer e ki pa izole. Pres dan bann landrwa kot ou santi ou an sekirite. Evit bann landrwa kot i kapab en danze dan fernwanr.—Prov. 22:3.
6. Ki lezot byenfe ou kapab gannyen ler ou pres lo tar?
6 Ler nou pres lo tar, nou kapab pres avek bann ki pe fer pionye asistan oubyen ordiner. (Rom. 1:12) Eski ou kapab adapte ou progranm pour partisip dan sa form servis?