Servi byen zot let an dan predikasyon
Temwen Zeova in pas 1,945,487,604 erdtan dan predikasyon pandan lannen servis 2014 e sa i montre klerman ki nou determinen pour reste okipe dan servis Zeova! (Ps. 110:3; 1 Kor. 15:58) Vi ki “letan i kourt,” eski i posib pour servi nou letan ki presye dan predikasyon pour zwenn plis dimoun ankor?—1 Kor. 7:29.
Pour servi byen nou letan dan predikasyon, ou bezwen pare pour adapte. Par egzanp, si normalman ou pas enn erdtan oubyen plis dan en serten laspe predikasyon san koz avek personn, eski ou kapab fer bann azisteman pour ki ou trouv plis dimoun pour koz avek? I vre ki sak landrwa kot ou ale sirkonstans pou diferan. Kantmenm sa, bann sizesyon ki swiv i kapab ed ou pour pli byen servi ou letan pour ki ou evite “donn kou-d-pwen dan ler.”—1 Kor. 9:26.
Temwannyaz portanport: Pour plizyer dizenn lannen, bann proklanmater in annan labitid konmans zot lazournen predikasyon par pres portanport. Toudmenm, vi ki bokou dimoun i travay pandan lazournen, akoz ou pa esey pres portanport lo tar apremidi ler plis dimoun i kot zot e pe relaks? Pandan lazournen, temwannyaz lo semenn oubyen dan teritwar biznes i kapab anmenn plis rezilta.
Temwannyaz an piblik: Bann latab ek prezantwar i devret ganny met dan bann landrwa kot bokou dimoun i ale vini dan teritwar kongregasyon. (Vwar Nou Minister Rwayonm Zilyet 2013 paz 5) Si sa kantite dimoun ki ale vini i diminyen dan sa landrwa ki’n ganny swazir pour fer temwannyaz an piblik, Komite Servis Kongregasyon i kapab deside ki sa prezantwar oubyen latab i devret ganny met en lot landrwa kot plis dimoun i ale vini.
Retourn vizit ek letid Labib: Eski i posib pour fer ou retourn vizit ek letid Labib pandan bann ler ki lezot laspe predikasyon i mwen efikas? Par egzanp, si sa travay portanport i efikas Sanmdi bomaten, eski ou kapab fer ou letid Labib apre midi oubyen aswar? Kan nou pe fer bann retourn vizit, eski i posib organiz bann pti group proklanmater pour al dan en loto pour ki zot kapab akonplir plis dan predikasyon?
I vre ki nou kapab kont nou erdtan nenport ki ler nou pe prese me nou lazwa i ogmante ler nou travay predikasyon i efikas. Si ou vwar ki en laspe predikasyon i pa efikas dan en ler spesifik, esey en lot laspe. Priy Zeova, ‘Met rekolt,’ pour donn ou son gidans pour ki ou kapab servi byen ou letan dan predikasyon!—Mat. 9:38.