Nouvo linisyativ pour rann temwannyaz an piblik
1. Ki legzanp bann Kretyen dan premye syek in kite?
1 Bann Kretyen dan premye syek ti fer plis ki zis pres kaz an kaz. Zot ti osi pres an piblik. (Akt 20:20) Par egzanp, zot ti al kot tanp kot zot ti konnen i annan en kantite dimoun. (Akt 5:42) Kan i ti Atenn, tou le zour zapot Pol ti pres avek bann dimoun kot laplas piblik. (Akt 17:17) Ozordi, fason prensipal nou pres sa bon nouvel se portanport. Me, nou osi al dan bann parking, landrwa biznes, zarden, dan semen ek lezot landrwa pour ki nou kapab pres avek dimoun nenport landrwa zot ete. Menm si tou proklanmater i ganny ankouraze pour partisip dan temwannyaz an piblik kan i posib, bokou pou kontan pour partisip dan de nouvo fason eksitan pour rann temwannyaz an piblik.
2. Ki nouvo linisyativ ki’n ganny pran depi Novanm 2011?
2 Temwannyaz spesyal an piblik dan bann gran lavil: Parey in ganny dir lo paz 16 ek 17 dan Yearbook 2013, en nouvo linisyativ pour rann temwannyaz an piblik ti konmanse New York Novanm 2011. Bann latab ek prezantwar avek bann zoli prezantasyon nou bann piblikasyon dan plizyer langaz ti ganny mete dan bokou landrwa dan sa lavil. Sak zour, plizyer milye dimoun i pase, enkli bann ki reste dan bann apartman ki difisil ganny akse avek ek bann ki pa souvan kot lakour. Reaksyon dimoun ti enkrwayab. Dan zis en mwan, 3,797 magazin ek 7,986 liv ti ganny plase. En kantite dimoun ki pase i demande pour ganny en letid Labib. Vi ki lanfaz ti pe ganny mete lo konmans letid Labib, ladres ki bann dimoun enterese ti kite ti deswit ganny anvoye kot en kongregasyon apropriye pour pourswiv zot lentere.
3. Ki mannyer sa fason rann temwannyaz pe propaze?
3 Vi ki sa linisyativ ti en sikse, sa metod pe ganny servi partou dan lemonn kot i annan bokou dimoun. Bann biro brans ki pou deside ki lavil ki pou benefisye avek sa fason rann temwannyaz. Sa i souvan dan bann landrwa kot i annan terminal bis, lofis ouswa apartman kot bokou dimoun i pase. Apre sa, biro brans i ekrir ouswa anvoy lenstriksyon pour bann kongregasyon ki pou partisip dan sa kalite form servis. Bann pionye ordiner e spesyal ki normalman fer sa form servis, menm si dan serten landrwa bann pionye asistan ki ganny servi.
4. Ki mannyer temwannyaz spesyal an piblik dan bann gran lavil i kapab ganny fer?
4 Konman i ganny fer: Bann ki enplike pour rann temwannyaz an piblik dan bann gran lavil i normalman esper dimoun vin kot zot latab ouswa prezantwar. Kan en dimoun i aprose, zot envit li pour pran en piblikasyon ki enteres li. Bann pionye i kontan pour reponn okenn kestyon ki zot annan. Si i pran en piblikasyon, bann pionye pa koz lo kontribisyon. Me si i demande ki mannyer nou travay i ganny finanse, zot kapab eksplike ki nenport kontribisyon i kapab ganny anvoye kot bann ladres dan sa piblikasyon. Kan i posib, sa bann pionye i demande: “Eski ou ti a kontan en dimoun i vizit ou kot ou?” ouswa “Apard ofer sa bann magazin, eski ou ti konnen ki nou ofer letid Labib gratwit?”
5. Ki byenfe en koup ti gannyen kan zot ti partisip dan sa nouvo linisyativ pour rann temwannyaz?
5 I annan bokou byenfe kan nou partisip dan sa fason rann temwannyaz. En koup ti ekrir: “Ler nou debout kot latab e vwar sa plizyer milye dimoun pase sak zour, nou leker i ranpli avek lazwa pour sa kantite travay ki pe ganny fer pour pres avek dimoun dan lemonn antye. Ler nou vwar tou sa kantite dimoun e mazinen ki Zeova i enterese avek zot tou endividyelman, sa in ranforsi nou determinasyon pour met predikasyon premye dan nou lavi. Nou mazinen ki Zeova pe egzamin leker tou sa bann ki pas kot latab, i pe rod sa bann ki diny. Nou santi plis ankor ki bann lanz pe ed nou dan sa travay.”
6. (a) Ki lot nouvo linisyativ pour pres an piblik ki’n ganny pran par bann ansyen dan bann kongregasyon e ki mannyer i diferan avek fer temwannyaz spesyal an piblik dan bann gran lavil? (b) Ki mannyer bann kongregasyon i kapab korpere ansanm kan pe pres an piblik?
6 Temwannyaz an piblik ki ganny organize lokalman: An plis ki fer temwannyaz an piblik dan bann gran lavil, en lot nouvo linisyativ in ganny pran par konsey ansyen dan zot teritwar. Atraver sa linisyativ, bann proklanmater i met en latab ouswa prezantwar dan teritwar zot kongregasyon kot bokou dimoun i pase. I diferan avek fer temwannyaz spesyal an piblik dan bann gran lavil ki servi bann pionye sorti dan diferan kongregasyon pour pres dan menm lavil ki biro brans in swazir.—Vwar bwat “Bon korperasyon i neseser.”
7. Ki mannyer bann ansyen pou organiz temwannyaz an piblik lokalman?
7 Bann ansyen i devret gete si dan teritwar kongregasyon i annan bann landrwa kot i annan bokou dimoun ki pase e vwar si i pratik pour organiz predikasyon an piblik. Bann landrwa ki apropriye pour met en latab ouswa en prezantwar i kapab kot terminal bis, kot taksi stenn, landrwa kot i annan bokou laboutik, kot bann lekol pos segonder, erport ouswa landrwa kot bann levennman anyel pe ganny fer. I byen pour toultan met en latab dan menm landrwa, menm zour e menm ler. I pli bon met en latab kot i annan plizyer laboutik plito ki kot i annan en sel gran laboutik akoz bann dimoun ki vin la pe souvan konsantre zis lo en sel keksoz. Dan serten landrwa, parey lo bann trotwar i pou pli fasil si nou servi en pti prezantwar. I annan bann fayl spesyal ki fer bann gran portre Latour Veyer ek Awake! e osi liv Ki Labib i dir? ki’n ganny prepare espesyalman pour ganny servi dan temwannyaz an piblik ki bann ansyen i kapab download lo Internet. Bann ki partisip dan sa form predikasyon pou bezwen fer sa travay parey bann ki pe fer temwannyaz spesyal dan bann gran lavil e zot devret swiv gidans ki sirveyan servis i donnen. Si zot pran ladres bann dimoun ki enterese me ki pa reste dan zot teritwar, zot kapab ranpli deswit sa form Please Follow Up (S-43) e donn li avek sekreter.
8. Si i napa en landrwa dan ou teritwar kot i annan ase dimoun ki pase, ki ou kapab fer?
8 Fer temwannyaz an piblik ler ou pe prese: I kapab annan serten kongregasyon ki napa en landrwa dan zot teritwar kot i annan ase dimoun ki pe pase e i pa pou pratik pour servi latab ek prezantwar. Kantmenm sa, bann proklanmater i ganny ankouraze pour fer temwannyaz an piblik. Eski i annan en landrwa kot i annan bokou laboutik, oubyen en gran laboutik kot bokou dimoun i ale dan ou teritwar? Eski i annan en landrwa kot dimoun i kontan fer bann rankont? Eski i annan en landrwa piblik kot dimoun i zwenn ansanm pour selebre bann levennman anyel? Si wi, ou pou kapab ganny bokou lazwa ler ou fer temwannyaz an piblik.
9. Akoz nou devret fer zefor pour pres avek dimoun dan nenport ki landrwa kot nou zwenn zot?
9 I lavolonte Zeova “ki tou [“sort kalite,” NW] dimoun i ganny sove e ganny konnesans laverite.” (1 Tim. 2:4) Alor, nou pe esey zwenn otan dimoun ki posib pour anons zot sa mesaz Rwayonm avan lafen i arive. (Mat. 24:14) Dan plizyer landrwa i difisil pour zwenn dimoun kot lakour. Kantmenm sa nou kapab zwenn zot dan bann landrwa piblik. Rann temwannyaz an piblik i kapab sa sel fason ki serten dimoun i ganny sa loportinite pour tann sa bon nouvel. Alor, annou fer bokou zefor pour akonplir nou minister par pres avek dimoun nenport landrwa kot nou zwenn zot.—2 Tim. 4:5.
[Bwat lo paz 5]
Bon korperasyon i neseser
I’n ganny raporte ki bann proklanmater sorti dan diferan kongregasyon ki pros avek kanmarad i rann temwannyaz dan menm semen, menm landrwa parking, dan menm teritwar biznes oubyen kot terminal bis. Bann proklanmater sorti dan diferan kongregasyon in kit magazin dan menm larantre, lasanm kot nou esper dokter, bann landrwa kot i lav lenz e zot in pres dan menm landrwa biznes. Sa in irit bann rezidan ek dimoun ki fer biznes. Sa in arive menm ler bann proklanmater pa ti pe pres menm ler. Alor, i ti a bon pour reste dan sa teritwar ki nou’n ganny donnen kan nou rann temwannyaz an piblik.
Si bann proklanmater i anvi rann temwannyaz dan teritwar en lot kongregasyon ki pros, zot bezwen koz avek zot sirveyan servis. Apre li, i kapab kontakte sirveyan servis sa lot kongregasyon pour ganny permisyon avan ki bann proklanmater dan son kongregasyon i al pres dan sa menm landrwa. Kan en teritwar i pour bann kongregasyon ki koz diferan langaz, bann sirveyan servis i devret koz avek kanmarad pour ki zot evite irit bann dimoun san rezon. Par annan bon korperasyon tou keksoz i kapab ganny fer “byen e avek lord.”—1 Kor. 14:40.
[Portre lo paz 6]
[Portre lo paz 6]