Pres pli byen dan Landrwa piblik
1. Parey bann Kretyen premye syek, konman bann Kretyen ozordi pe pres dan bann landrwa piblik, e ki rezilta zot gannyen?
1 Parey bann premye disip Zezi, bann Kretyen ozordi i fer zefor pour partaz sa bon nouvel avek dimoun nenport landrwa kot zot ete. (Akt 16:13; 17:17; 20:20, 21) Zot zefor pour pres dan bann landrwa piblik pe fer zot trouv bann dimoun enterese ki kekfwa zot pa ti pou zanmen trouve ler pe pres port an port.
2. Akoz nou bezwen demontre disernman ler nou pe pres dan bann landrwa piblik, e konman nou kapab kontribye pour annan lord?
2 Nou bezwen demontre disernman ler nou pe pres dan landrwa piblik. Normalman, i pli bon pour pa tro atir latansyon lo nou. Par egzanp, si tro bokou proklanmater pe pres dan menm landrwa oubyen pe vizit menm landrwa biznes, serten dimoun i kapab santi zot pe ganny anvair par nou prezans. Sa i abes dinite nou travay e i kapab fer nou pa ganny bon rezilta. Ki nou kapab fer pour anpes sa arive? Serten kongregasyon ki annan bokou landrwa piblik pour prese in vwar li itil pour organiz sa bann landrwa konman bann teritwar separe. (1 Kor. 14:40) Deplis, nou kapab kontribye pour annan bon lord si nou travay zis dan teritwar nou kongregasyon, amwen ki bann laranzman spesifik in ganny fer par Komite Servis Kongregasyon pour ed en lot kongregasyon.—Vwar Nou Minister Rwayonm Novanm 1998, p. 6, par. 18-19.
3. Ki lapros serten in vwar i efikas ler pe pres dan bann landrwa piblik?
3 Apros Dimoun: Ler Zezi ti koz avek en madanm kot en pi, i ti konmans avek en remark bref e kontiny sa konversasyon parski sa madanm ti montre lentere. (Zan 4:7-26) Ozordi, sa kalite lapros i efikas depandan serten sirkonstans. Serten proklanmater i vwar ki pour pres pli byen dan landrwa piblik, i itil pour pran ennde minit pour dir bonzour dimoun e montre lentere personnel dan zot avan prezant sa mesaz Rwayonm. Zot fer komanter lo en topik ki pe enteres dimoun, ki souvannfwa devlop dan en konversasyon. Zot ekout atantivman ler lezot i dir sa ki trakas zot. Pa pou pran zot bokou letan apre pour koz lo bann rekonfor dan Parol Bondye.—Rom. 15:4.
4. Ki mannyer nou kapab devlop lentere bann dimoun?
4 Devlop Lentere: Sak fwa nou ganny en bon konversasyon, nou devret sey fer laranzman pour devlop lentere sa dimoun. Ki mannyer nou kapab fer sa? Avan fini sa diskisyon, ou kapab pran ou pti kaye e dir: “Mon’n apresye sa konversasyon ki nou’n fer. Eski i annan okenn fason ki nou kapab kontiny sa konversasyon en lot fwa?” Oubyen dir: “Mon ti a kontan ou lir en lartik ki mon asire pou enteres ou. Eski mon kapab anmenn li kot ou lakour oubyen dan ou lofis?” Serten proklanmater i zis demande: “Mon kapab ganny ou nimero telefonn?” Souvannfwa sa dimoun i byen reazir.
5. Ki lobzektif nou devret annan ler nou pe pres dan landrwa piblik?
5 Bokou dimoun ki nou zwenn premye fwa dan bann landrwa piblik in aksepte letid Labib. Sa letid i kapab ganny kondwir kot lakour sa dimoun, kot son travay, dan en landrwa piblik apropriye, oubyen par telefonn. Annou fer li nou lobzektif pour konmans bann letid Labib ler nou pres pli byen dan landrwa piblik.