Eski ou kapab partisip dan predikasyon lo tar apremidi?
1. Dapre en spesyalis Labib, kan ki Pol ti pres kaz an kaz?
1 Dapre liv Daily Life in Bible Times, zapot Pol ti normalman pres kaz an kaz “depi 4 er apremidi ziska tar aswar.” Nou pa konnen si sanmenm sa progranm Pol, me nou konnen ki Pol ti pare pour ‘fer tou pour Levanzil.’ (1 Kor. 9:19-23) Tre probab, sa ti enplik organiz tou son bann keksoz pour ki i al pres kaz an kaz kan i ti pou zwenn plis dimoun.
2. Akoz i en bon letan pour prese lo tar apremidi?
2 Bann proklanmater dan diferan landrwa i normalman pres kaz an kaz dan bomaten pandan lasemenn. Me, dan rezyon kot ou reste, eski sa ler i ankor sa bon moman? En pionye ti dir sa konsernan son teritwar: “Apenn si ou zwenn dimoun dan lazournen. Laplipar dimoun i kot zot tar apremidi.” Rann temwannyaz lo tar apremidi i kapab en bon loportinite pour pres sa bon nouvel avek bann zonm. Bann met lakour i souvan kalm e pare pour koze. Si i apropriye pour fer li, bann ansyen i devret fer laranzman pour annan en renyon predikasyon lo tar apremidi.
3. Ki mannyer nou kapab annan bon zizman kan nou pe pres tar apremidi?
3 Servi bon zizman: Kan nou pe partisip dan predikasyon lo tar apremidi, i enportan pour annan bon zizman. Par egzanp, si ou’n pas kot en dimoun dan en letan ki pa apropriye, tel ki ler zot pe manze, i byen pour demann zot si ou kapab pas pli tar. Si i fernwanr, debout kot sa met lakour i kapab vwar ou e pa tarde pour entrodwir ou lekor e dir li akoz ou la. I byen osi pour pres par de ouswa par group e mars dan semen kot i annan lalimyer kot ou pa pou tousel. Pa al kot bann lakour tro tar pangar ou ava deranz sa met lakour ki pe met li pare pour al dormi. (2 Kor. 6:3) Si en vwazinaz i danzere apre soley kouse, i pli bon pres en pti pe pli boner.—Prov. 22:3.
4. Ki byenfe ou kapab gannyen pour partisip dan predikasyon lo tar apremidi?
4 Benediksyon: Nou minister i pli gou kan nou ganny en bon konversasyon. Pli nou kapab koze, pli nou pou ganny loportinite pour ed lezot pour “ganny sove e ganny konnesans laverite.” (1 Tim. 2:3, 4) Eski ou kapab aziste ou progranm pour ki ou kapab partisip dan predikasyon lo tar apremidi?