Pres port-an-port
1. Ki kestyon ki ganny souleve an rapor avek nou predikasyon port-an-port, e akoz?
1 “Sa bann ki annan leksperyans pour propaz Laverite dan diferan fason, pou dakor ki sa kanpanny pour plas enn sa bann liv MILLENNIAL DAWN port-an-port, i ankor ziska prezan sa fason pli efikas pour pres Laverite.” Sa i ganny tire dan edisyon Zion’s Watch Tower le 1 Zilyet 1893, ki ti met lanfaz lo lenportans pour pres port-an-port. Dimoun dan lemonn antye in kapab idantifye bann Temwen Zeova, par sa fason. Vi ki dan serten pei i pe vin pli difisil pour zwenn dimoun kot zot, eski sa metod i ankor efikas ozordi?
2. Kote dan Labib nou vwar sa nide pour pres port-an-port?
2 Sorti dan Labib e i enportan: Predikasyon port-an-port i sorti dan Labib. De par de, Zezi ti anvoy 70 disip pour al koz avek bann dimoun kot zot. (Lik 10:5-7) Remarke ki Labib i dir lo bann disip pa bokou letan apre ki Zezi ti’n mor. I dir: “Toulezour zot ti kontinyen prese dan Tanp ek dan bann lakaz e anons Zezi konman Mesi.” (Akt 5:42) Avek devouman zapot Pol ti osi al port-an-port pour ansenny dimoun.—Akt 20:20.
3. Nonm serten lavantaz pour pres port-an-port.
3 Predikasyon port-an-port i ankor touzour en fason enportan pour propaz sa bon nouvel. I permet nou ‘rod’ sa bann ki pare pour resevwar sa mesaz, dan en fason sistematik e annord. (Mat. 10:11) An zeneral kan dimoun i kot zot, zot pa santi zot anba presyon. Kan nou koz avek zot fas-a-fas, ekout zot koze, get lekspresyon lo zot figir, e obzerv zot lantouraz, sa pou ed nou konnen kwa ki enteres e konsern zot. Souvannfwa, nou kapab koz pli lontan avek zot.
4. Ki mannyer nou kapab ganny pli bon rezilta dan nou predikasyon port-an port?
4 Fer Azisteman: Zapot Pol ti pare pour fer azisteman akoz “Levanzil.” (1 Kor. 9:23) Petet nou kapab aziste nou progranm pour al prese dan bann ler kot laplipar dimoun i kot zot, parey tar lo apremidi, dan wikenn, oubyen pandan vakans. Not bann lakaz ki napa personn lo en bout papye, e esey retournen en lot zour oubyen ler dan lasemenn.
5. Ki mannyer sa bann ki malad i kapab pres port-an-port?
5 Menm bann ki malad i kapab pres port-an-port. Petet nou kapab anmenn zot avek nou ler nou fer bann lakaz obor semen, e nou les zot pran byen zot letan. En ser ki ti ganny difikilte pour respire, ti kapab fer zis en lakaz tou le trant minit. Me, i ti vreman kontan apre, akoz i ti’n kapab pres avek group.
6. Akoz nou devret fer predikasyon port-an-port vin en laspe regilye dan nou minister?
6 Akoz nou predikasyon port-an-port, toulezour bann dimoun senser pe ganny trouve. En zour en proklanmater ti tap en laport, e i ti tann dir: “Antre, mon konnen lekel ou. Mon ti pe priy Bondye pour anvoy en dimoun pour ed mwan, e apre mon’n tann laport tape. Bondye in tann mwan e i’n anvoy ou kot mwan.” Bann rezilta ki nou pe gannyen i montre ki Zeova pe beni sa metod predikasyon. (Mat. 11:19) Eski ou determinen pour fer predikasyon port-an-port vin en laspe regilye dan ou minister?