Fer tou pour sa bon nouvel
1. Ki en proklanmater Rwayonm i pare pour fer pour lezot e akoz?
1 Zapot Pol ti personnelman santi ki i ti en lobligasyon pour li anons sa bon nouvel avek lezot. (1 Kor. 9:16, 19, 23) Pareyman, vi ki nou ti a kontan ki bann dimoun i ganny lavi eternel, sa i pous nou pour fer tou sa ki nou kapab pour partaz sa bon nouvel avek zot.
2. Ki bann azisteman nou pare pour fer an rapor avek predikasyon e akoz?
2 Pres dan landrwa ek moman ki ou kapab zwenn dimoun: En bon peser pa anvoy son laliny oubyen lasenn dan en landrwa ek moman kot i santi i pli apropriye pour li, me dan en landrwa ek moman kot i annan plis posibilite pour ganny pwason. Nou osi, konman bann ki “lapes dimoun,” i kapab ki nou bezwen personnelman fer serten azisteman pour nou kapab zwenn dimoun dan nou teritwar e trouv plis lazwa dan sa privilez ki nou’n gannyen pour rasanble tou “kalite pwason.” (Mat. 4:19; 13:47) Eski nou kapab kontakte bann dimoun kot zot lakour tar apre midi oubyen fer temwannyaz dan semen gran maten? Pol ti annan sa lobzektif “pour anons plennman sa bon nouvel,” e i ti profit bann loportinite ki i ti gannyen pour fer sa.—Akt 17:17; 20:20, 24, NW.
3, 4. Kan nou dan predikasyon, dan ki fason nou kapab adapte nou prezantasyon e avek ki rezilta?
3 Adapte ou prezantasyon avek bezwen bann dimoun: Detanzaot bann peser i aziste zot metod pour zot kapab atrap zis en kalite pwason. Ki mannyer nou kapab prezant sa bon nouvel Rwayonm dan en fason pli atiran pour bann dimoun dan nou teritwar? Avek bon zizman, nou bezwen entrodwir en size ki enteres bann dimoun an zeneral e ekout atantivman kan zot eksprim zot lo sa size. (Zak 1:19) Nou kapab demann en kestyon lopinyon pour fer zot eksprim zot. (Prov. 20:5) Dan sa fason nou pou kapab adapte nou prezantasyon lo sa bon nouvel dan en fason ki pou annan en lefe lo zot lavi. Pol ti vin “tou avek tou dimoun.” (1 Kor. 9:22) Adapte nou prezantasyon i lakle pour tous leker bann dimoun.
4 I en lazwa pour partaz sa “bon nouvel konsernan en keksoz meyer” avek bann dimoun! (Iza. 52:7) Fotespere ki nou “fer tou pour sa bon nouvel” pour nou zwenn otan dimoun ki nou kapab.—1 Kor. 9:23, NW.