Fer sa bon Nouvel disponib avek otan Dimoun posib
1. Ki bann premye Kretyen ti fer pour anmenn sa bon nouvel kot otan dimoun posib?
1 Bann premye disip Zezi ti seryezman fer zefor pour propaz mesaz Rwayonm. Zot ti servi bann mwayen efikas pour fer sa bon nouvel disponib avek otan dimoun posib. Bann ekriven Labib ti servi langaz Grek ordiner, ki ti en langaz enternasyonal dan Lanpir Romen pour ekrir bann parol enspire. Deplis, bann predikater devoue dan dezyenm ek trwazyenm syek ti’n kapab bann premye dimoun pour servi codex, ki ti pli fasil pour servi pour rod referans ki en roulo.
2, 3. (a) Ki mannyer Izai 60:16 pe ganny akonpli ozordi? (b) Konman teknolozi pe ganny servi pour fer avanse vre ladorasyon?
2 Servi Teknolozi: Atraver profet Izai, Zeova ti predir: “Ou pou tete dile bann nasyon.” (Iza. 60:16) Dan lakonplisman sa profesi ozordi, bann serviter Zeova pe servi bann bon resours bann nasyon pour fer avanse travay predikasyon. Par egzanp an 1914, bokou lannen avan ki film ti vin en sikse komersyal, bann etidyan Labib ti konmans montre “Photo-Drame de la Création.” Sa film ek slayd, ki annan kouler ek son, ti dir anviron wit er-d-tan e i ti donn en gran temwannyaz plizyer milyon dimoun.
3 Ozordi, pep Bondye i servi bann lenprimri ki annan tre gran vites ek bann lekipman ki ganny kontrole par konpiter pour pibliy Labib ek piblikasyon baze lo Labib dan plizyer langaz. Bann mwayen transpor rapid i anmenn piblikasyon dan bann landrwa pli lwen lo later, kot dimoun dan 235 pei. Atraver son lespri sen, Zeova in pous son bann serviter pour servi byen sa bann teknolozi, pour fer laverite dan Labib disponib avek plis dimoun ki zanmen avan dan listwar.
4. Ki sanzman serten in fer dan zot lavi pour pres sa bon nouvel avek plis dimoun?
4 Sanzman dan zot Lavi: Bann vre adorater in osi motive pour fer bann sanzman dan zot lavi pour kapab pres sa bon nouvel avek plis dimoun. Bokou zot in senplifye zot lavi pour kapab partisip plis dan predikasyon. Serten in deplase pour al servi dan bann landrwa kot i annan en pli gran bezwen pour proklanmater Rwayonm. Lezot in aprann en lot langaz pour ogmant zot predikasyon.
5, 6. Ki nou kapab fer pour pres avek otan dimoun posib dan nou teritwar?
5 Anplis ki sa, nou kapab pres sa bon nouvel avek plis dimoun kan nou pres dan bann ler ki dimoun i kot lakour e dan landrwa kot nou kapab trouv zot. Si dimoun laplipar-di-tan pa kot zot lakour pandan lazournen, eski ou kapab sanz ou progranm pour pres en pe lo tar apremidi? Eski i annan bann landrwa piblik kot ou kapab donn en temwannyaz? Eski ou’n deza esey fer temwannyaz par telefonn e travay dan teritwar biznes? Eski ou rod loportinite pour donn temwannyaz enformel?
6 Pa nou vreman privilezye ki nou osi nou pe rann temwannyaz lo non Zeova ek son Rwayonm! Annou kontinyen partaz sa laverite dan Parol Bondye ki donn lavi avek otan dimoun posib.—Mat. 28:19, 20.