Annan Lakrent Pour Zeova Toultan
1 “Lakrent pour Zeova i konmansman lasazes.” (Ps. 111:10) I ankouraz nou pour fer bann bon aksyon e ed nou pour detourn kont sa ki mal. (Prov. 16:6) Sa lakrent i en profon respe pour nou Kreater, ki pous nou pour fer tou, pour evite depler e dezobei li. I en kalite ki nou bezwen kiltive e demontre toultan.—Prov. 8:13.
2 Toulezour, lespri lemonn Satan i egzers presyon lo nou pour fer nou konform avek son bann move fason. (Efe. 6:11, 12) Nou laser i enparfe e i annan tandans natirel pour fer sa ki mal. (Gal. 5:17) Donk, pour obeir bann komannman Zeova, pour nou ere, e ganny lavi, nou bezwen annan lakrent pour li toultan.—Det. 10:12, 13.
3 Dan Ebre 10:24, 25, nou’n ganny konseye pour rasanble ansanm afen ki nou ankouraz kanmarad “sirtou” pandan sa letan ki nou pe viv ladan. Asiste regilyerman bann renyon, i esansyel si nou oule sirviv sa bann dernyen zour. Lakrent ki nou annan pour depler Bondye i pous nou pour asiste bann renyon e pour estim bokou bann rezon ki nou annan pour zwenn ansanm. Bann ki annan lakrent pour Bondye, i konsider partisipasyon dan bann renyon Kretyen konman en privilez sakre.
4 En lot fason ki nou demontre ki nou annan lakrent pour Bondye i letan nou obei sa konmann pour pres sa bon nouvel Rwayonm. (Mat. 28:19, 20; Akt 10:42) En bi prensipal nou travay predikasyon se pour ed lezot annan lakrent pour Zeova e soumet avek son lavolonte. Nou akonpli sa par fer bann retourn vizit, fer zefor pour konmans bann letid Labib kot lakour e apre ansenny lezot tou bann komannman Bondye. Nou alor demontre ki nou annan lakrent pour Zeova e annan lanmour pour nou prosen.—Mat. 22:37-39.
5 Bann ki napa lakrent pour Bondye pa rekonesan pour bann keksoz spirityel, e zot tonbe kan zot respir ler mortel sa monn, setadir son latitid mantal. (Efe. 2:2, NW ) Annou reste ferm dan nou determinasyon pour “ofer Bondye en servis sakre . . . avek lakrent ek lafreyer pour li.” (Ebr. 12:28, NW ) Nou pou alor rekolte bann benediksyon konman bann ki touzour annan lakrent pour Zeova.