Nouvo Progranm Lasanble rezyonal
En definisyon pour lakrent se “en profon respe espesyalman pour Bondye.” Sa i dekrir sa lakrent apropriye ki ganny mansyonnen dan Lekritir konman “konmansman lasazes.” (Ps. 111:10) An kontras, en lot lakrent i domin lemonn Satan otour nou. Konman nou kapab evit sa move santiman anmenmtan ki nou devlop en lakrent respektab pour Zeova? Nouvo progranm lasanble rezyonal pour lannen servis 2002 i adres sa kestyon. Tenm se “Annan Lakrent pour Bondye e donn li Laglwar.” (Rev. 14:7) Nou pou vwar bokou fason kot lakrent pour Zeova i benefisye nou personnelman e konman en lorganizasyon.
Kantmenm lakrent i kapab enplik lenkyetid oubyen en mank kouraz e pa pare pour fer fas avek bann sitiasyon difisil, Labib i dir: “Ere tou dimoun ki annan lakrent pour Zeova.” (Ps. 128:1) Progranm lasanble pou montre nou konman nou kapab reisi fer fas avek bann defi ki nou rankontre an rapor avek vre ladorasyon. Nou pou vwar konman pour ed bann nouvo kiltiv sa lakrent apropriye pour Bondye, ki pou vreman motiv zot pour anvi servi li avek tou zot leker, nanm, lespri, ek lafors. (Mark 12:30) Sirveyan distrik pou konklir premye zour avek sa diskour “Apros pli pre avek sa bann ki ou kontan.” I pou eksplike konman nou kapab reste vizilan avek zefor ki Dyab pe fer pour detourn nou avek Zeova, nou fanmiy, ek nou bann frer ek ser Kretyen.
“Annan Lakrent pour Zeova, non pa pour Zonm” i tenm en diskour an kat parti ki pou ganny fer dezyenm zour. I pou eksplike akoz e konman nou devret sirmont okenn lakrent ki anpes nou akonpli plennman nou minister oubyen mentenir nou lentegrite e annan en konsyans prop dan lekol e dan landrwa travay. Sa diskour piblik ki annan pour tenm “Annan Lakrent pour Bondye e gard son bann Komannman” i baze lo en seri levennman ki’n ganny dekrir dan Revelasyon sapit 14. Lasanble rezyonal pou konklir avek gidans ankourazan pour “Kontinyen mars avek Lakrent pour Zeova.”
Lekol Minister Teokratik, model Renyon Servis, diskour batenm, ek rezimen Letid Latour Veyer i bann keksoz adisyonnel dan progranm ki ou pa ti ava anvi manke. Envit ou etidyan Labib pour asiste lasanble ansanm avek ou. Nenport dimoun ki oule batize i devret fer konnen sirveyan prezidan oplivit posib. Nou tou nou ti ava anvi demontre sa lakrent apropriye pour Zeova e donn li laglwar par pa mank okenn parti sa progranm remarkab!