Presyon Lezot ek Ou Privilez pour Prese
1 Presyon bann kanmarad i en lenfliyans pwisan—pour lebyen oubyen lemal. Bann serviter Zeova i egzers en lenfliyans pozitif ki ensit nou pour fer bann bon aksyon Kretyen. (Ebr. 10:24) Sepandan, bann manm fanmiy ki pa Temwen, kanmarad travay, kanmarad lekol, vwazen oubyen lezot zanmi i kapab met presyon lo nou, pour fer nou swiv en semen ki pa an akor avek bann prensip Kretyen. Zot kapab koz ‘mal lo nou bon kondwit an konneksyon avek Kris.’ (1 Pyer 3:16) Konman ki nou kapab mentenir nou determinasyon pour kontinyen prese menm si nou fer fas avek presyon lezot?
2 Manm Fanmiy: Parfwa, en mari e en papa ki pa en Temwen Zeova i kapab pa oule ki son madanm ek zanfan i partisip dan minister kot dimoun i a kapab trouv zot. Sa ti sitiasyon dan en lakour an Meksiko. En ser marye ek son set zanfan ti vin dan laverite. Okonmansman, son msye ti opoze akoz i pa ti oule ki son fanmiy i prese e ofer bann piblikasyon baze lo Labib port-an-port. I ti santi ki sa i abes zot. Toutfwa, son madanm ek son zanfan ti kontinyen reste ferm dan zot desizyon pour servi Zeova e pour kontinyen partisip regilyerman dan minister. Avek letan, sa zonm ti konmans vwar lenportans pour aksepte laranzman Bondye pour sa travay predikasyon, e li osi i ti dedye son lavi avek Zeova. Ti pran li 15 an pour aksepte laverite, me eski i ti pou fer li si son fanmiy pa ti’n persevere dan zot privilez pour prese?—Lik 1:74; 1 Kor. 7:16.
3 Bann Kanmarad Travay: Ou zefor pour pres avek bann kanmarad travay i kapab pa byen ganny resevwar par serten. En ser ti rakonte ki kan en diskisyon konsernan lafen lemonn ti souleve kot son travay, i ti ganny sikannen akoz i ti sizere ki son bann koleg i lir Matye sapit 24. Toutfwa, ennde zour plitar, enn son koleg ti dir li ki i’n lir sa sapit e ki i’n enpresyonnen. Sa ser ti donn li en piblikasyon, e laranzman ti ganny fer pour li ek son msye konmans etidye. Premye letid ti dire ziska 2 er bomaten. Apre trwazyenm letid zot ti konmans asiste renyon, e vitman apre zot ti aret fimen e konmans partisip dan minister. Eski sa ti pou arive si sa ser pa ti fer okenn zefor pour partaz son lespwar avek lezot?
4 Bann Kanmarad Lekol: I pa drol pour bann zenn Temwen eksperyans presyon kot lekol e pou per ki lezot zenn i sikann zot akoz zot partisip dan travay predikasyon. En zenn Kretyen an Letazini ti dir: “Mon ti per pour pres avek lezot zenn, mon ti per ki zot a sikann mwan.” Alor i ti evit bann loportinite pour pres avek son bann kanmarad lekol e dan teritwar. Konman ki ou kapab ganny kouraz pour fer fas avek presyon lezot? Konfye dan Zeova, resers son laprouvasyon. (Prov. 29:25) Pa kanmi me plito pran plezir dan ou abilite pour servi Parol Bondye dan ou minister. (2 Tim. 2:15) Sa zenn ki fek ganny mansyonnen ti konmans priy Zeova, i ti demann Zeova pour ed li kiltiv sa dezir pour koz avek son bann kanmarad lekol. I ti konmans pres enformelman kot lekol, i ti ganny bann bon rezilta, e i ti konmans koz avek tou dimoun ki i ti konnen. I ti konklir: “Sa bann zenn i bezwen e anvi en lespwar pour lavenir, e Zeova pe servi nou pour ed zot.”
5 Vwazen: Nou bann vwazen oubyen dimoun ki nou konnen i kapab demontre serten lakoler anver nou akoz sa ki nou ete e sa ki nou krwar. Si ou per pour sa ki zot panse, demann ou lekor: ‘Eski zot konn laverite ki anmenn ver lavi eternel? Ki mon kapab fer pour tous zot leker?’ En sirveyan rezyonal in remarke ki bon rezilta i ganny akonpli kan nou rann temwannyaz avek nou bann vwazen pti gin par pti gin. Demann Zeova pour donn ou lafors ek lasazes pour kontinyen resers bann ki annan leker senser.—Fili. 4:13.
6 Si nou soumet avek bann presyon negatif sa pou kapab fer plezir bann ki opoz nou, me si nou fer sa, eski i pou dan zot lentere—oubyen dan nou lentere? Zezi ti ganny opoze par bann dimoun dan son kominote. I ti menm fer fas avek bann remark ki son demi frer ti fer. Me i ti konnen ki i ti kapab ed zot senpleman par reste lo sa semen ki Bondye in trase pour li. Par konsekans, Zezi ti “siport sitan lopozisyon delapar bann peser.” (Ebr. 12:2, 3) Nou bezwen fer parey. Determinen pour servi byen nou privilez pour pres sa bon nouvel. An fezan sa, “ou ava sov ou lekor ek tou bann ki ekout ou.”—1 Tim. 4:16.