Ou kapab donn temwannyaz enformel!
1. (a) Ki si sa temwannyaz enformel? (b) Konbyen ki la prezan ki’n tann laverite pour premye fwa par temwannyaz enformel?
1 Konbyen dimoun dan ou kongregasyon ki’n tann laverite pour premye fwa par temwannyaz enformel? Ou kapab sirprann pour konnen ki kantite i annan. Temwannyaz enformel i ler nou partaz sa bon nouvel avek bann dimoun ki nou zwenn kan nou pe fer bann aktivite dan nou lavi tou le zour. Par egzanp kan nou pe vwayaze, vizit nou fanmir oubyen vwazen, fer konmisyon, al travay oubyen lezot aktivite. Parmi en group plis ki 200 Temwen batize, 40 poursan ladan ti ganny kontakte par temwannyaz enformel! Alor sa metod predikasyon i vreman efikas!
2. Ki legzanp temwannyaz enformel ki Labib i koz lo la?
2 Bann predikater dan premye syek ti souvan rann temwannyaz enformel. En legzanp i kan Zezi ti rann temwannyaz avek en madanm ki ti vin sers delo kot pwi Zakob ler i ti pe vwayaze Samari. (Zan 4:6-26) Filip ti konmans en konversasyon avek en zofisye Etyopyen ki ti pe lir dan liv profet Izai an dizan: “Eski ou konpran sa ki ou pe lir?” (Akt 8:26-38) Kan i ti ganny anprizonnen dan lavil Filip, zapot Pol ti rann temwannyaz avek en gard prizon. (Akt 16:23-34) Pli tar kan i ti ganny anprizonnen dan son lakaz, Pol “ti resevwar tou bann ki ti vin war li. I ti pres Rwayonm Bondye e ansennyen konsernan Senyer Zezi-kri.” (Akt 28:30, 31) Ou osi ou kapab donn temwannyaz enformel, menm si ou timid. Ki mannyer ou kapab fer sa?
3. Kwa ki kapab ed nou pour aret timid?
3 Ki ou kapab fer pour konmanse: Bokou nou i vwar li difisil pour konmans en konversasyon avek bann dimoun ki nou pa konnen. Menm pour koz lo laverite avek bann dimoun ki nou konnen, i kapab paret en pe difisil. Nou pou ganny motive pour fer li si nou medit lo labonte Zeova, lo sa laverite presye ki i’n donn son bann serviter ek kondisyon deplorab ki dimoun pe viv ladan. (Yona 4:11; Ps. 40:5; Mat. 13:52) An plis ki sa, nou kapab demann Zeova pour ed nou pour ganny “kouraz.” (1 Tesa. 2:2) En etidyan Gilead ti dir: “Mon’n souvan remarke ki lapriyer i ede kan mon vwar li difisil pour mwan koz avek dimoun.” Si ou ezite pour koze, fer en lapriyer bref an silans.—Nee. 2:4.
4. Ki lobzektif ki nou kapab etablir o konmansman e akoz?
4 Parey sa non li menm i endike, temwannyaz enformel pa vedir ki nou konmans en konversasyon par entrodwir nou lekor dan en fason formel oubyen an servan en verse Labib. I kapab ede si nou fer li nou lobzektif pour senpleman konmans en konversasyon san ki nou bezwen santi ki nou bezwen donn en temwannyaz toudswit. Bokou proklanmater i santi ki ler zot fer sa, o firamezir ki sa konversasyon i deroule zot arive ganny sa konfidans ki zot bezwen pour konmans koz lo sa bon nouvel. Me si sa dimoun pa anvi fer konversasyon, i pa neseser pour fors li pour kontinyen koz avek ou. Byen poliman aret sa konversasyon e kontinyen avek sa ki ou ti pe fer.
5. Kwa ki’n ed en ser ki timid pour kapab donn temwannyaz enformel?
5 Premye keksoz ki en ser timid i fer kan i al fer konmisyon bazar i fikse sa dimoun pour atir son latansyon e donn li en sourir byen amikal. Si sa dimoun i sourir avek li, i pas en pti komanter amikal. Si i remarke ki sa dimoun i byen reazir, sa i donn li sa konfidans pour kontinyen koze. I ekout atantivman e i esey desifre ki laspe dan sa bon nouvel ki sa dimoun pour enterese avek. An servan sa kalite lapros, i’n kapab plas en kantite piblikasyon e menm konmans en letid Labib.
6. Ki mannyer nou kapab konmans en konversasyon pour donn temwannyaz enformel?
6 Konmans konversasyon: Ki nou kapab dir pour konmans en konversasyon? Kan Zezi ti koz avek sa madanm kot pwi, i ti senpleman konmans sa konversasyon par demann li en pe delo. (Zan 4:7) Alor petet nou kapab konmans en konversasyon an dizan bonzour oubyen demann en kestyon byen amikalman. Anmezir ki sa konversasyon i deroule ant zot de ou kapab rod loportinite pour konmans koz lo en panse dan Labib e petet plant en lagrenn laverite. (Ekle. 11:6) Serten in ganny bon rezilta kan zot in mansyonn en keksoz enteresan ki evey lentere bann dimoun e fer zot demann kestyon. Par egzanp, kan ou al kot dokter, pandan ki ou pe espere, ou kapab konmans en konversasyon par dir: “Mon pou byen kontan kan sa zour i arive kot mon pa pou zanmen malad ankor.”
7. Kan nou obzervan ki mannyer sa i kapab ed nou donn temwannyaz enformel?
7 Si nou obzervan, sa osi pou ed nou konmans en konversasyon. Si nou obzerve ki en paran i annan bann zanfan ki’n byen ganny elve, nou kapab felisit sa paran e demann li: “Kwa ki’n ed ou pour reisi konman en paran?” En ser i not bann size ki son bann koleg travay i diskit lo la kot travay e apre i partaz bann lenformasyon spesifik baze lo sa ki enteres zot. Kan i ti aprann ki en madanm kot son travay ti pe fer preparasyon maryaz, i ti donn li en Awake! ki diskit lo ki mannyer pour prepar pour en maryaz. Sa ti ouver semen pour plis konversasyon lo Labib.
8. Ki mannyer nou kapab servi nou bann piblikasyon pour konmans konversasyon?
8 En lot fason pour konmans konversasyon i par lir nou bann piblikasyon kot lezot i kapab vwar nou. En frer i ouver en Latour Veyer oubyen Awake! kot i annan en lartik ki son tit i atiran e trankilman i konmans lir. Si i remarke en dimoun lanmenm o bor pe get son magazin, i demann sa dimoun en kestyon oubyen i fer en pti komanter lo sa lartik. Souvan sa i ede pour konmans en konversasyon e en temwannyaz i ganny donnen. Zis par kit enn nou bann piblikasyon kot lezot i kapab vwar i kapab evey lentere bann koleg travay oubyen kanmarad lekol e sa i fer zot demann kestyon lo sa size.
9, 10. (a) Ki mannyer nou kapab kree loportinite pour donn temwannyaz enformel? (b) Ki mannyer ou’n kapab fer sa?
9 Kree loportinite: Lefet ki nou konnen i irzan pour pres sa bon nouvel, nou pa devret konsider temwannyaz enformel konman en keksoz ki nou fer zis ler nou ganny loportinite pour fer li. Me o kontrer nou devret kree loportinite pour donn temwannyaz anmezir nou fer bann aktivite dan nou lavi tou le zour. Mazinen lekel ou kapab zwenn e reflesir lo ki mannyer ou pou kapab konmans en konversasyon byen amikal. Gard en Labib avek ou ek piblikasyon ki ou kapab partaz avek bann ki demontre lentere.—1 Pyer 3:15.
10 Kan zot in esey rod diferan lapros, bokou proklanmater in trouv diferan fason pour kree loportinite pour donn temwannyaz enformel. En ser i reste dan en apartman dan en batiman kot i annan mezir sekirite byen o nivo. I servi sa fasilite detant ki’n ganny met an plas dan sa landrwa pour aranz puzzle bann zoli landrwa dan lanatir. Ler dimoun i arete pour fer komanter lo la, i servi sa loportinite pour konmans en konversasyon avek zot e i koz avek zot lo sa promes dan Labib konsernan “en nouvo lesyel ek en nouvo later.” (Rev. 21:1-4) Eski ou kapab mazin bann fason ki ou kapab kree loportinite pour donn temwannyaz enformel?
11. Ki mannyer nou kapab pourswiv lentere en dimoun kan nou donn temwannyaz enformel?
11 Pourswiv lentere: Si en dimoun in ekoute, esey pourswiv sa lentere. Si i apropriye, ou kapab dir sa dimoun: “Mon’n vreman apresye nou konversasyon. Kote nou kapab zwenn pour nou koz plis?” Serten proklanmater i zis donn zot ladres ek nimero kontak avek sa dimoun e dir: “Mon’n vreman apresye nou konversasyon. Si ou ti a kontan konn plis lo sa ki nou’n diskite, kontakte mwan lo sa ladres.” Si ou menm ou pa kapab pourswiv lentere sa dimoun, ranpli en form Please Follow Up (S-43) san tarde e donn sekreter dan ou kongregasyon. Sa pour permet li fer laranzman pour ki sa kongregasyon ki responsab sa teritwar kot sa dimoun i reste i ava kapab fer li.
12. (a) Akoz nou devret rikord e raport nou ler kan nou rann temwannyaz enformel? (b) Ki rezilta serten proklanmater in gannyen kan zot in donn temwannyaz enformel? (Vwar bwat “Temwannyaz enformel i anmenn bon rezilta!”)
12 Kan nou rann temwannyaz enformel nou devret raport nou ler. Alor, fer sir ki kan ou donn temwannyaz enformel ou gard en rikord, menm si i zis detrwa minit par zour. Reflesir lo la: Si tou le zour tou proklanmater i donn temwannyaz enformel pour senk minit, sa pou fer plis ki 17 milyon erdtan par mwan!
13. Kwa ki devret pous nou pour donn temwannyaz enformel?
13 Nou annan pli bon rezon pour nou donn temwannyaz enformel, sa i nou lanmour pour Zeova ek nou prosen. (Mat. 22:37-39) Nou leker ranpli avek lapresyasyon pour bann kalite ki Zeova i annan ek son plan i pous nou pour koz lo “laglwar konsernan splander son rwayote.” (Ps. 145:7, 10-12) Lentere senser pour lezot i pous nou pour profit tou loportinite ki apropriye pour partaz sa bon nouvel kan i ankor annan letan. (Rom. 10:13, 14) Si nou pran letan pour reflesir davans e fer bon preparasyon, nou tou nou kapab donn temwannyaz enformel e petet eksperyans sa lazwa ki en proklanmater i gannyen kan i koz lo laverite pour premye fwa avek en dimoun ki annan leker senser.
[Pwen adisyonnel]
I kapab anmenn byenfe si ou etablir sa lobzektif pour senpleman zwenn dimoun e konmans en konversasyon
[Pwen adisyonnel]
Kan zot in esey rod diferan lapros, bokou proklanmater in trouv fason pour kree loportinite pour donn temwannyaz enformel
[Bwat lo paz 5]
Sizesyon pour konmans konversasyon
◼ Priye pour ganny led pour ou konmanse
◼ Swazir bann ki paret zantiy e ki pa pe degaze
◼ Esey ganny son latansyon, fikse li, sourir e fer komanter lo en keksoz ki enteres zot tou le de
◼ Ekout atantivman
[Bwat lo paz 6]
Temwannyaz enformel i anmenn bon rezilta!
• En frer ki ti kot en garaz pe esper son loto ganny repare ti donn temwannyaz bann ki ti otour li e i ti osi donn zot lenvitasyon pour vin ekout diskour piblik. Dan en lasanble son lannen swivan, en frer ki i pa ti rekonnet ti dir li bonzour avek bokou lafeksyon. Sa frer ti enn parmi sa bann zonm ki i ti’n donn en lenvitasyon kot garaz son lannen avan! Sa zonm ti’n al asiste sa diskour piblik e i ti’n donn son non pour li ganny en letid Labib. Aprezan tou le de, li ek son madanm in batize.
• En ser ki ti aprann laverite par temwannyaz enformel i konsider bann dimoun ki i zwenn atraver son bann zanfan konman son teritwar. Son teritwar i enkli son vwazen ek bann paran ki i zwenn kot lekol e dan renyon ki ganny fer pour bann paran. Sak fwa i entrodwir son lekor i dir en pti parol ki sorti o fon son leker kot i fer resorti ki Labib i en gran led pour li elve son zanfan, apre i konmans koz lo en lot size. Lefet ki i’n deza fini konmans en konversasyon, i vwar li pli fasil pour koz lo Labib dan lezot konversasyon ki swiv. Par servi sa metod, in ed 12 dimoun pour batize.
• En ser ti sezi loportinite pour donn en temwannyaz kan en zofisye lasirans ti vizit li. Sa ser ti demann sa zonm si i ti a kontan ganny lasirans pour en bon lasante, en lavi ere e pour touzour. I ti dir wi i ti a kontan e demann li ki kalite lasirans i ti pe koz lo la. I ti montre li bann promes Labib e ofer li enn nou piblikasyon. I ti pran zis en sware pour fini lir sa piblikasyon. Laranzman pour li ganny en letid Labib ti ganny fer, i ti konmans asiste renyon e plitar i ti batize.
• En ser ki ti pe vwayaz par avyon ti konmans koz avek en madanm ki ti pe asiz akote li e i ti reisi donn li en temwannyaz. Kan avyon ti’n ariv dan son destinasyon, sa ser ti donn sa madanm son ladres ek nimero kontak e i ti ankouraz li pour demann en letid Labib prosenn fwa ki Temwen Zeova i pas kot li. Son lannmen, de Temwen ti pas kot li. Sa madanm ti konmans etidye Labib e fer progre byen vit. I ti batize e san tarde i ti pe kondwir trwa letid Labib.
• En frer aveg aze 100-t-an ki reste dan en kazern i souvan dir: “Nou bezwen Rwayonm.” Sa in fer ki bann ners ek lezot pasyan in poz li bann kestyon ki’n permet li eksplike ki si sa Rwayonm. Enn parmi sa bann madanm ki travay dan sa landrwa ti demann li ki i pou fer dan Paradi. I ti reponn: “Mon pou vwar kler ankor, mon pou mars ankor e mon pou bril sa wiltyer.” Lefet ki i pa vwar kler, i demann sa madanm pour lir magazin avek li. Kan fiy sa frer ti vin vizit li, sa madanm ti demann li permisyon pour pret sa bann magazin pour anmenn kot li. En ners ti dir avek son fiy: “Nou nouvo tenm isi kazern i: ‘Nou bezwen Rwayonm.’”
• En ser ki ti dan laliny pe espere kot en restoran ti tann en group zonm aze ki ti pe asize lanmenm o bor pe koz lo politik. Enn sa bann zonm ti dir ki gouvernman pa kapab rezourd nou bann problenm. Sa ser ti dir dan li menm, ‘La i mon sans.’ I ti fer en pti lapriyer e i ti apros zot. Apre ki i ti’n entrodwir son lekor, i ti koz avek zot lo Rwayonm Bondye, en gouvernman ki pou kapab rezourd problenm limanite. I ti ofer zot en brosir ki i ti annan avek li. Sa menm moman sa manedyer ti apros zot. Sa ser ti krwar ki i ti pe vin pous li dan son restoran. O kontrer, i ti dir ki i ti pe ekout sa konversasyon e ki li osi i ti a kontan en brosir. En travayer ki ti pe ekoute li osi ti aprose an pleran. Aparaman i ti’n deza konmans etidye Labib, me i ti’n arete, aprezan i ti anvi rekonmans son letid.