Loue Zeova par donn Temwannyaz enformel
1 Bann serviter fidel Zeova i rod bann loportinite pour loue li sak zour. (Ps. 96:2, 3; Ebr. 13:15) En fason kot nou kapab fer sa se par donn temwannyaz enformel. Bokou adorater Zeova ozordi i rekonesan ki en dimoun ti entrodwir mesaz Rwayonm avek zot par temwannyaz enformel.
2 Donn en temwannyaz enformel avek en dimoun i souvan ouver semen pour lezot antann sa mesaz Rwayonm. Par egzanp, sa konversasyon ki Zezi ti fer avek sa fanm Samariten kot pi Zakob ti fer en kantite lezot dimoun annan en lentere dan sa bon nouvel. (Zan 4:6-30, 39-42) Letan Pol ek Silas ti ganny anprizonnen, zot ti temwanny avek sa zofisye prizon, e son fanmiy antye ti aksepte laverite.—Akt 16:25-34.
3 Bann Loportinite: Ki bann loportinite ou annan pour donn temwannyaz enformel? Serten i fer li ler zot pe aste zot konmisyon, pe esper bis, oubyen pe esper dokter. Lezot i kapab donn temwannyaz pandan letan brek dan travay oubyen kot lekol. Zis par fer lezot dimoun vwar enn nou bann piblikasyon baze lo Labib i kapab pous zot pour rod plis lenformasyon lo nou krwayans.—1 Pyer 3:15.
4 Fodre eseye: En pti fiy set an ki ti timid, ti antann dan en renyon lenportans pour tou dimoun prese. Alors kan i ti al laboutik avek son manman, i ti met de brosir dan son sak. Letan son manman ti okipe kot kontwar, sa pti fiy ti ofer en brosir avek en madanm ki ti aksepte sa brosir zantiman. Ler zot ti demann li ki mannyer i ti ganny kouraz pour apros sa madanm i ti dir: “Mon ti zis dir, Enn, De, Trwa, Ale! Apre mon ti ale pour koz avek li!”
5 Pour donn temwannyaz enformel, nou tou nou bezwen annan en leta lespri parey sa pti fiy. Kwa ki kapab ed nou? Priye pour ganny kouraz pour koze. (1 Tesa. 2:2) Prepar en kestyon oubyen en komanter lo en topik ki ou kapab servi pour konmans en konversasyon. Apre annan konfyans ki Zeova pou beni ou zefor.—Lik 12:11, 12.
6 Kan nou donn temwannyaz enformel avek dimoun ki nou zwenn sak zour, sa i anmenn louanz pour Zeova e i fer nou zwaye. I kapab ed en dimoun pour konmans mars lo semen lavi eternel.