Nou en Temwen Zeova a tou moman
1. Ki nou kapab aprann avek sa resi kot Zezi ti rann temwannyaz avek sa madanm kot pwi?
1 Zezi ti’n mars pour plizyer erdtan. I ti fatige e swaf. Pandan ki son bann disip ti al aste manze, i ti asize kot en pwi dan zalantour lavil Samari pour repoze. Zezi pa ti’n al Samari pour prese, i ti’n zis pas laba lo son larout pour al kontiny son minister Galile. Me kantmenm sa, i ti sezi sa loportinite pour rann temwannyaz avek en madanm ki ti pe vin sers delo. (Zan 4:5-14) Akoz? Zezi pa ti zanmen aret servi konman en “temwen fidel e vre” pour Zeova. (Rev. 3:14) Nou kapab imit legzanp Zezi par azir konman Temwen Zeova a tou moman.—1 Pyer 2:21.
2. Ki mannyer nou kapab prepare pour rann temwannyaz enformel?
2 Prepare davans: Nou kapab prepare pour rann temwannyaz enformel par anmenn piblikasyon avek nou. Plizyer proklanmater i touzour anmenn trak avek zot pour donn avek bann boutikye, vander kot stasyon petrol ek lezot dimoun ki zot zwenn pandan lazournen. (Ekle. 11:6) En ser ki souvan vwayaze i fer sir i touzour annan en pti Labib ek en liv Ki Labib i dir dan son sak e i esey konmans en konversasyon avek sa dimoun ki asiz akote li.
3. Ki mannyer nou kapab konmans en konversasyon?
3 Konmans en konversasyon: Kan pe rann temwannyaz enformel, nou pa bezwen entrodwir en topik lo Labib toudswit. Kan Zezi ti konmans en konversasyon avek sa madanm kot pwi i pa ti deswit idantifye li konman Mesi. I ti senpleman demann sa madanm en pe delo pour bwar, e sa ti evey lentere sa madanm. (Zan 4:7-9) En ser ti remarke ki sa menm kalite lapros in permet li konmans en konversasyon kan i ti ganny demande si i ti’n byen selebre en lafet. Olye reponn ki i pa ti partisip dan sa lafet akoz i en Temwen Zeova, i ti dir: “Mon’n fer en swa personnel pour mwan pa partisip dan sa lafet.” Sa dimoun ki demann sa kestyon i normalman demande akoz e sa i permet sa ser pour rann en temwannyaz.
4. Akoz nou kapab dir ki Matye 28:18-20 i motiv nou?
4 Menm si Zezi in fini son minister ki i ti akonplir avek devouman lo later, i ankor vreman enterese pour pa vwar sa travay predikasyon ganny fer parey i ti fer. (Mat. 28:18-20) Alor, parey Zezi ki’n kit en legzanp pour nou, nou Temwen nou bezwen pare pour eksprim nou lafwa piblikman a tou moman.—Ebr. 10:23.