Eski ou’n pare pour rann temwannyaz enformel?
1 Temwannyaz enformel i kapab vreman efikas. Dan Labib i annan en kantite legzanp kot serten dimoun ti rann temwannyaz enformel e sa ti anmenn bon rezilta. (Zan 4:7-15) Ki nou kapab fer pour prepare pour rann sa kalite temwannyaz?
2 Fason sanze ek laparans fizik: Si nou toultan vey byen lafason ki nou sanze ek nou laparans fizik, sa pou permet nou partaz nou lafwa fasilman avek lezot. (1 Tim. 2:9, 10) Si nou santi enkonfortab akoz nou laparans fizik, i tre probab ki nou pou ezite rann en temwannyaz. De lot kote, si nou laparans i annord e prop i kapab evey lentere lezot e fer zot demande akoz nou diferan. Par egzanp, kan en koup Temwen ki ti’n byen sanze ti pe vwayaze, zot ti asiz akote en zonm ki ti en Mizilman. Zot laparans ti atir son latansyon e sa ti fer li demann zot si zot ti Kretyen. Sa ti fer konmans en diskisyon lo Labib ki ti al pour trwa-z-erdtan.
3 Konmans konversasyon: Kan Zezi ti zwenn sa madanm Samariten o bor pwi Zakob, i ti konmans en konversasyon senpleman par demann li en pe delo pour bwar. Pareyman, petet nou kapab konmans en konversasyon par dir en pti parol oubyen demann en kestyon senp. Menm si i arive ki nou ezite parfwa, si nou depan lo Zeova pour ed nou, nou kapab ganny “kouraz” pour konmans en konversasyon.—1 Tesa. 2:2.
4 Kree loportinite: Bokou proklanmater in esey rod fason pour rann temwannyaz enformel. Analiz ou sityasyon e mazin bann dimoun ki ou kapab zwenn pandan lazournen. Anmenn piblikasyon ki ou pou kapab servi ek en pti Labib avek ou. Obzerve e pran en lentere dan bann dimoun otour ou. Kan ou reflesir davans lo bann loportinite ki ou kapab gannyen pandan lazournen, sa pou fer ou pare pour rann en bon temwannyaz.—Fili. 1:12-14; 1 Pyer 3:15.
5 I annan de bon rezon akoz nou bezwen sezi loportinite ki nou gannyen pour rann temwannyaz enformel. Sa i akoz nou kontan Bondye ek nou prosen. (Mat. 22:37-39) Si nou gard antet ki sa travay predikasyon i irzan, temwannyaz enformel pa pou vin en keksoz ki nou fer zis par azar me nou bezwen prepare davans pour fer li. Nou devret pare pour sezi tou loportinite ki apropriye pour partaz sa mesaz Rwayonm avek lezot kan i ankor annan letan.—Rom. 10:13, 14; 2 Tim. 4:2.
[Kestyon]
1. Ki legzanp ki montre ki temwannyaz enformel i kapab anmenn bon rezilta?
2. Ki mannyer nou fason sanze ek laparans fizik i kapab permet nou rann en temwannyaz?
3. Par imit legzanp Zezi, ki mannyer ou’n konmans en konversasyon?
4. Ki mannyer nou kapab prepare pour rann temwannyaz enformel?
5. Akoz temwannyaz enformel pa devret ganny fer zis par azar?