Laverite konsernan lavenir

Zezi ti eksplike ki mannyer nou pou konnen “ki Rwayonm Bondye i pros.” (Lik 21:31) I ti dir ki i pou annan lager, tranblemandter, mankman manze, lepidemi ek lezot keksoz ankor. Konmela nou pe vwar tou sa bann keksoz arive.​—Lik 21:10-17.

Labib i osi montre ki dan “bann dernyen zour” kot zonm pou dirize, dimoun pou annan move konportman. Ou kapab lir sa dan 2 Timote 3:1-5. Ler ou vwar sa bann latitid ek konportman ozordi, pa ou pou dakor ki sa profesi Labib pe ganny akonplir dan nou letan?

Ki sa i vedir? Rwayonm Bondye i pros pour fer bann gran sanzman ki pou fer lavi vin pli meyer lo later. (Lik 21:36) Dan Labib, Bondye in promet bann bon keksoz pour later e pour bann dimoun ki pou reste lo later. Annou vwar detrwa legzanp.

EN BON GOUVERNMAN

“[Zezi] ti resevwar lotorite, loner ek lwayote; tou bann pep, tou bann nasyon, dimoun ki sorti dan tou langaz ti servi li. Son pouvwar pou reste pour touzour. Son renny pa pou zanmen fini. Son rwayonm pa pou zanmen ganny detrir.”​—DANYEL 7:14.

Ki sa i vedir: Ou kapab viv ere anba sa sel gouvernman ki Bondye in etabli avek son Garson konman Lerwa.

EN BON LASANTE

“Personn pa pou dir: ‘Mon malad!’”​—IZAI 33:24.

Ki sa i vedir: Ou pa pou zanmen malad oubyen ganny okenn dezabilite. Ou pou kapab viv pour touzour.

PARTOU I POU ANNAN LAPE

“I fer lager arete partou lo later.”​—PSONM 46:9.

Ki sa i vedir: Pou nepli annan lager e tou sa soufrans ki i anmennen.

LATER POU RANPLI AVEK BANN BON DIMOUN

“Move dimoun pou nepli la. . . Bann dimoun ki annan limilite pou ganny donnen later.”​—PSONM 37:10, 11, NWT.

Ki sa i vedir: I pou nepli annan bann move dimoun. I pou annan zis bann ki anvi obei Bondye.

LATER ANTYE POU VIN EN PARADI

“Zot pou konstri bann lakaz e zot pou reste ladan. Zot pou plant bann pye rezen e manz son bann fri.”​—IZAI 65:21, 22.

Ki sa i vedir: Later antye pou vin zoli. Bondye pou reponn nou lapriyer pour fer son lavolonte ganny fer “lo later.”​—Matye 6:10.