Vin en Pratikan ki Zwaye
1 Zezi ti dir ki diran son prezans, laplipar dimoun pa ti pou ‘pran kont nanryen,’ zis parey dan letan Noe. (Mat. 24:37-39) Sirman, alor, bokou dimoun pa pou ekout sa bon nouvel Rwayonm. Kwa ki pou kapab ed nou pour mentenir en leta lespri zwaye anmezir ki nou pe akonpli nou minister?—Ps. 100:2.
2 Premyerman, nou bezwen kit antet ki nou mesaz ek sa lord pour prese i sorti kot Bondye. Kantmenm nou pe fer nou mye, si dimoun pa montre lentere zot pe an realite repous Zeova. Si nou touzour mazinen ki par nou fidelite dan predikasyon nou resevwar son laprouvasyon, sa pou ed nou mentenir nou lazwa ek nou kontantman konman bann pratikan parol Bondye.—Zak 1:25.
3 Dezyenmman, i annan ankor bann endividi ki pou aksepte mwayen delivrans Zeova. Menm si lamazorite pa montre lentere, i annan ankor bann ki annan laspe en mouton e ki bezwen ganny rasanble, konmela menm, dan sa letan ki tre pros avek lafen. Nou bezwen kontinyen prese, al “dan en lavil oubyen en vilaz” pour ‘rode ki sennla ki pare pour resevwar nou.’—Mat. 10:11-13.
4 Mentenir en Latitid Pozitif: Listwar deplorab bann fo relizyon in dezapwent serten. Lezot in “fatige e dekouraze” par sa sistenm. (Mat. 9:36) Bokou in dezespere akoz zot bann problenm an rapor avek mankman lanplwa, lasante ek sekirite. Nou konpreansyon lo sa bann keksoz pou ed nou persevere dan nou travay. Esey konmans bann konversasyon ki adres bann keksoz ki dimoun dan nou teritwar i tre konsernen avek. Ed zot pour rekonnet ki Rwayonm Bondye i sa sel solisyon. Servi Labib ek bann pwen spesifik dan bann piblikasyon pour tous zot leker avek sa bon nouvel.—Ebr. 4:12.
5 Ou pratikan parol Bondye ki zwaye, touzour mazinen ki: ‘Lazwa Zeova i nou forteres.’ (Nee. 8:10) Pa bezwen ki nou perdi nou lazwa. “Si bann zabitan sa lakaz i resevwar zot, zot salitasyon lape i a reste avek sa lakaz; me si zot pa ganny resevwar, zot salitasyon lape i a retourn kot zot.” (Mat. 10:13) Zeova i renouvle nou lazwa ek lafors kan nou andire avek pasyans dan son servis sakre, e i beni nou fidelite.