Nou Tou Annou Onor Zeova ek Son Garson
Konman Tou Dimoun Ki Asiste Memoryal le 8 Avril i Kapab Benefisye O Maksimonm
1 Lekel ozordi ki ganny loner spesyal? Sa bann ki zot lakonplisman i ganny bokou estimen par lemonn. Sepandan, laplipar-di-tan zot bann aksyon i ganny vitman oubliye. Me konsernan bann aksyon ki vreman benefisye tou limanite? Sa aksyon pli gran parmi tou lezot pou resevwar bokou nou latansyon pandan ki nou obzerv Repa Senyer apre soley kouse le 8 Avril, 2001.
2 Lekel ki merit sa pli gran loner? Labib i reponn: “Nou Senyer [Zeova], ou merite resevwar laglwar, loner ek pisans, parski ou’n kree tou keksoz, e se par ou lavolonte ki zot egziste e ki zot in ganny kree.” (Rev. 4:11) Konman Kreater, Zeova i Dirizan Siprenm liniver. I pou touzour merit ganny onore e sa pa pou zanmen sanze!—1 Tim. 1:17.
3 Zezi Kri, Garson Bondye, ti perform bann aksyon onorab ki pou anmenn bann benediksyon eternel pour limanite. I ti parfetman imit son Papa. (Zan 5:19) Son lobeisans san defo ek son servis fidel in fer li “diny pour resevwar pisans, larises, lasazes, lafors, loner, laglwar ek louanz.” (Rev. 5:12) Son Papa in onor li par etabli li konman Lerwa. (Ps. 2:6-8) Pour nou, nou pou annan sa loportinite pour onor Papa ek Garson kan nou pou obzerv Repa Senyer le 8 Avril, 2001.
4 I tris pour dir ki pandan listwar imen en pti gin dimoun in donn Zeova ek son Garson sa loner ki zot merite. A en serten moman, menm pep ansyen Bondye, bann Izraelit, ti donn Zeova en servis siperfisyel. Sa ti klerman en mank respe. (Mal. 1:6) Respe apropriye i demann en lobeisans fidel baze lo lanmour e lo lapresyasyon pour tou sa ki Zeova ek son Garson in fer pour nou. Pour donn en tel loner ek respe i vedir ki nou montre lakrent Bondye ek en lestim profon par pran an konsiderasyon Zeova ek Zezi dan tou nou fason viv. Kongregasyon Kretyen i esey ansenny lezot e ed zot pour fer parey.
5 En Lokazyon Spesyal Pour Montre Loner: Komemorasyon Memoryal i rasanbleman pli enportan pour pep Zeova sak lannen. Tou dimoun ki annan en dezir pour servi e onor Zeova i devret prezan. (Lik 22:19) Nou ekspekte ki apard ki sa 6 milyon Temwen aktif, bann ki enterese pour fer lasistans ariv plis ki 14 milyon. Pa sa i en bon loportinite pour onor nou Papa seles! Kantmenm sa lokazyon i atir latansyon lo Zezi, sa loner ek respe ki ganny montre pour sa ki i’n akonpli i glorifye son Papa ki’n anvoy li.—Zan 5:23.
6 Ki nou kapab fer pour siport sa lokazyon spesyal? Nou kapab ed sa bann nouvo ki enterese pour benefisye o maksimonm. Ankouraz zot pour asiste, e kot i annan bezwen, ofer lasistans senser pour ed zot ariv kot lasal. Eksplik bi sa diskour. Entrodwir zot avek lezot. Sa ki zot vwar e tande i kapab motiv zot pour anvi asosye avek nou pour onor Zeova.
7 Pa pran alalezer lenpak sa progranm. En etidyan liniversite ti annan sa reaksyon: “Mon’n deza asiste konminyon plizyer fwa dan mon legliz, me sa i vreman diferan. Mon vwar ki sa i egzakteman parey sa ki Labib i dir, e mon panse ki ou posed laverite.” I ti konmans asiste regilyerman bann renyon e pa bokou letan apre i ti batize.
8 Ed Bann Nouvo Fer Progre: Get byen sa bann nouvo ki pe asiste Memoryal, e pa tarde vizit zot apre pour revwar sa bann keksoz stimilan ki zot in aprann e obzerve. Met zot okouran ki i annan lezot renyon, kot zot kapab ogmant zot konnesans lo Labib. En egzaminasyon sapit 17 dan liv Konnesans, “Trouv Sekirite Parmi Pep Bondye,” pou montre zot sa varyete provizyon spirityel ki ganny ofer par kongregasyon, e ki fasilman disponib pour zot. Fer laranzman pour zot vwar sa video Our Whole Association of Brothers afen ki zot kapab vwar linite, lazwa, ek zel pep Zeova avek zot prop lizye!
9 I enportan ki bann ki enterese i aprann konman zot kapab zot menm montre loner ek respe pour Zeova. Eksplike ki lapriyer senser i fer plezir Zeova e i en sours konstan lafors ek soulazman spirityel. (1 Zan 5:14) An servan leson 8 ziska 12 dan brosir Ekspekte, dekrir kalite kondwit ki onor Zeova. Par diskit sa ki’n ganny ekrir dan brosir Les Témoins de Jéhovah lo paz 30-1, ankouraz bann nouvo pour mazin lo sa posibilite pour onor Zeova par personnelman pran par dan predikasyon.
10 Lapresyasyon pour sakrifis Zezi e pour nou privilez pour servi konman son bann disip i onor nou Papa e anmenn benediksyon pour lezot. Zezi ti promet: “Si en dimoun i servi mwan, mon Papa pou fer li loner.”—Zan 12:26.