Ed lezot benefisye avek Sakrifis Zezi Kri
Memoryal Lanmor Kris pou ganny obzerve le 12 Avril
1. Nonm en fason ki pep Bondye pou demontre zot lapresyasyon pour sa sakrifis.
1 “Annou rann gras Bondye pour son gran don.” (2 Kor. 9:15) Sa parol i dekrir byen nou santiman anver dibyen ek labonte leker ki Bondye in demontre anver son pep atraver son Garson, Zezi Kri. Sa lapresyasyon pou sirtou evidan kan nou rasanble ansanm le 12 Avril pour obzerv Memoryal lanmor Kris.
2. Lekel ki asiste Memoryal ansanm avek bann serviter Zeova, e ki zot bezwen fer pour kapab benefisye avek sa sakrifis?
2 Apepre 10 milyon dimoun i asiste Memoryal ansanm avek bann serviter Zeova sak lannen. Ler sa bann dimoun i fer sa, zot osi zot demontre serten lapresyasyon pour sakrifis Kris. Me pour zot kapab benefisye avek sa sakrifis, zot bezwen annan lafwa. (Zan 3:16, 36) Ki mannyer nou kapab ed zot devlop en tel lafwa? Pandan sa sezon Memoryal, nou kapab ankouraz zot pour etidye Labib e asiste renyon sak semenn. Annou egzamin sa bann sizesyon.
3. Ki mannyer nou kapab konmans en letid Labib avek bann ki nou pe envit Memoryal?
3 Letid Labib: Kan ou envit bann dimoun enterese pour asiste Memoryal, akoz ou pa konmans en letid Labib avek zot dan liv Ki Labib i dir? Esey eksplik sa dimoun konsernan Memoryal par servi paz 206-8 e egzamin sa topik “Repa Senyer—en Komemorasyon ki onor Bondye.” Ou kapab egzamin sa lenformasyon pandan enn oubyen de vizit, petet konman en letid devan laport. Ler ou’n fini, sa dimoun i kapab anvi diskit sapit 5, “Pli gro Kado ki Bondye in donn nou.” Enn fwa ki en letid Labib regilye in ganny etablir, egzamin sa kat premye sapit dan sa liv.
4. Avek lekel ou kapab konmans en letid Labib pandan sa sezon Memoryal?
4 Par servi sa lapros, avek lekel nou kapab konmans en letid Labib? Petet serten ou bann koleg travay, kanmarad lekol, oubyen vwazen ti pou kontan en tel diskisyon. Bann frer i kapab al ver mari bann ser ki pa Temwen. Pa oubliy osi ou bann fanmiy ki pa Temwen. Deplis, nou pou fer en gran zefor pour envit bann ki ti deza asosye avek kongregasyon. (Lik 15:3-7) Annou rod fason pour ed tou sa bann dimoun benefisye avek sa sakrifis.
5. Ki mannyer nou kapab ankouraz bann etidyan Labib ek lezot dimoun enterese pour asiste bann renyon tou le semenn?
5 Renyon: Memoryal i premye renyon ki bokou etidyan Labib ek lezot dimoun enterese i asiste. Me ki mannyer nou kapab ankouraz zot benefisye avek lezot renyon? Nou Minister Rwayonm Avril 2005, paz 8 i donn sa bann sizesyon: “Mansyonn tit prosenn diskour piblik. Montre zot lenformasyon ki pou ganny egzaminen dan Letid Latour Veyer ek Letid Liv Kongregasyon. Eksplik zot Lekol Minister Teokratik ek Renyon Servis. Ler ou annan en partisipasyon dan lekol, petet ou kapab egzers li avek zot. Partaz bann zoli pwen ki’n ganny prezante dan bann renyon. Servi bann portre dan nou bann piblikasyon pour ed zot esey vwar dan zot lespri sa ki pase dan renyon. Envit zot pour asiste renyon depi premye letid.”
6. Nonm de fason nou kapab ed bann dimoun ki annan leker senser benefisye avek sa sakrifis.
6 Kan bann dimoun ki annan leker senser i annan en letid regilye e zot asiste renyon regilyerman, zot souvannfwa progres pli vitman. Alor, annou ankouraz lezot pour benefisye avek bann provizyon spirityel e osi avek sa pli gro kado ki Bondye in donnen. Sa i sa sakrifis Zezi Kri.