Annou demontre lapresyasyon
Memoryal pou ganny obzerve le 17 Avril
1. Parey sa psalmis, ki santiman ki nou devret annan sirtou la ki nou pe apros sezon Memoryal?
1 Telman i ti apresye sa kantite fwa ki Zeova in demontre mizerikord e delivre son pep, en psalmis ti demande: “Ki mon pou rann Zeova pour tou son bann byenfe anver mwan?” (Ps. 116:12) Bann serviter Zeova ozordi i annan plis rezon pour annan lapresyasyon. Plizyer syek apre ki sa parol enspire ti ganny ekrir, Zeova ti donn imen sa pli gro kado, setadir sakrifis Zezi konman en ranson. Nou annan tou rezon pour demontre nou lapresyasyon anver Zeova anmezir ki nou prepare pour komemor lanmor Kris le 17 Avril.—Kol. 3:15.
2. Ki serten rezon nou annan pour apresye sa sakrifis?
2 Benediksyon ki sa ranson i anmennen: Sa ranson in fer li posib pour Bondye “pardonn nou pese.” (Kol. 1:13, 14) Sa i fer nou kapab ador Zeova avek en konsyans ki prop. (Ebr. 9:13, 14) Nou kapab santi nou alez pour apros Zeova dan lapriyer avek konfyans. (Ebr. 4:14-16) Bann ki met lafwa dan sa sakrifis i annan sa zoli lespwar pour viv pour touzour!—Zan 3:16.
3. Ki mannyer nou kapab demontre lapresyasyon anver Zeova pour sa sakrifis?
3 Demontre ou lapresyasyon: En fason ki nou kapab demontre nou gran lapresyasyon se lir lektir Labib pour Memoryal sak zour e medit lo la. Sa lartik dan Latour Veyer le 1 Fevriye 2011 an Angle ki annan pour tit “Are You Prepared for the Most Important Day of the Year?” in ganny ekrir pour ed nou fer sanmenm. Nou kapab osi dir Zeova senserman ki kantite nou apresye sa sakrifis dan lapriyer. (1 Tesa. 5:17, 18) Nou lobeisans anver parol Zezi pour asiste Memoryal i demontre nou lapresyasyon. (1 Kor. 11:24, 25) Deplis, nou kapab imit sa gran lanmour ki Zeova i annan par envit lakantite dimoun ki nou kapab pour asiste Memoryal avek nou.—Iza. 55:1-3.
4. Ki nou devret determinen pour fer?
4 Bann serviter Zeova ki annan en leker rekonesan pa pou tret sa zour Memoryal konman zis en lot renyon. I sa renyon pli enportan dan lannen! Anmezir ki sa zour i aprose, annou annan menm determinasyon parey sa psalmis ki ti ekrir: “Beni Zeova, mon nanm, e pa oubliy tou sa ki i’n fer.”—Ps. 103:2.