Avek lapresyasyon mazin sa sakrifis
1, 2. Ki rezon nou annan pour nou mazin sa sakrifis avek lapresyasyon?
1 Pour obeir lord Zezi, bann Kretyen atraver lemonn pou zwenn ansanm Sanmdi le 22 Mars apre soley kouse pour komemor lanmor Zezi Kri. (Lik 22:19; 1 Kor. 11:23-26) Nou ganny motive pour fer li akoz nou gran lapresyasyon pour tou sa ki ti ganny akonpli sa zour, plis ki 1,975 lannen pase. Par mentenir son lentegrite parfe atraver en lanmor martir lo en poto, Zezi ti sangtifye non son Papa par donn sa pli bon larepons Satan sa enn ki provok Zeova.—Zob 1:11; Prov. 27:11.
2 Ler Zezi ti vers son disan sa ti konfirm sa nouvo lalyans e sa ti fer ki bann imen enparfe i kapab ganny adopte konman garson Bondye avek lespwar pour renny avek Kris dan Rwayonm lesyel. (Zer. 31:31-34; Mark 14:24) An plis ki sa, profon lanmour Bondye pour limanite ti ganny demontre klerman kan i ti donn son Garson byenneme konman en sakrifis, parey Zezi li menm ti eksplik Nikodenm.—Zan 3:16.
3. Ki mannyer bann ki asiste Memoryal pou benefisye?
3 Envit lezot: Nou Minister Rwayonm pour Zanvye, ti sizer fer en lalis tou dimoun ki nou konnen e envit zot an personn. Eski ou’n konmans envit bann ki lo ou lalis? Eski ou pe fer laranzman pour partisip plennman dan sa kanpanny ki pou konmans le 1 Mars pour envit otan dimoun Memoryal? Bann ki pou asiste sa Memoryal pou sirman tann bann lenformasyon baze lo Labib ki kapab ogmant zot lafwa dan sa sakrifis, ki an retour pou gid zot ver lavi eternel.—Rom. 10:17.
4. Akoz nou devret ariv boner pour Memoryal?
4 Tou bann ki kapab i devret fer plan pour ariv boner pour swet labyenveni bann ki’n reponn lapel sa lenvitasyon spesyal. Vi ki i annan bokou dimoun ki asiste Memoryal, i tre enportan ki nou donn en latansyon spesyal bann nouvo, enkli lezot ki asiste renyon detanzaot.
5. Konman ou kapab prepar ou leker pour sa lokazyon?
5 Prepar Ou Leker: Sa brosir Egzamin Labib sak zour pour lannen 2008 ek Calendar 2008 i kontyen en progranm spesyal pour lir Labib konmansman le 17 Mars. Si ou egzamin bann levennman enportan ki ti arive pandan bann dernyen zour lavi Zezi lo later, sa pou ed ou prepar ou leker pour obzerv sa zour Memoryal. (Ezra 7:10) Meditasyon lo sa bann resi Labib dan lapriyer pou fer ou pli apresye lanmour ki Zeova ek son Garson in demontre par fourni sa sakrifis.—Ps. 143:5.
6. Ki mannyer nou pou benefisye kan nou fer zefor pour ogmant nou lapresyasyon pour sa sakrifis?
6 Vi ki Memoryal pe aprose, nou devret seryezman prepar nou e osi ed lezot pou prepar zot pour sa lokazyon enportan. Mazin sa sakrifis avek lapresyasyon pour fer ki nou relasyon avek Zeova ek son Garson i vin pli for. (2 Kor. 5:14, 15) Sa pou osi pous nou pour imit zot par demontre sa lanmour ki fer nou met lentere lezot avan sa ki pour nou.—1 Zan 4:11.