‘Kontinyen fer sa an mon Memwar’
Lanmor Zezi pou ganny obzerve le 2 Avril
1. Akoz le 2 Avril, 2007 i en dat enportan?
1 Plizyer milyon dimoun partou dan lemonn pou zwenn ansanm pour obzerv lanmor sakrifisyel Zezi le 2 Avril, 2007. Zezi ti mor akoz i ti defann drwa son Papa pour dirize e donn laprev pour demanti sa ki Satan ti dir, ki bann imen i servi Zeova zis pour bann rezon egois. (Zob 2:1-5) Repa Senyer i osi rapel nou ki par mwayen son lanmor konman en zonm parfe, san pese, Zezi ti “donn son lavi konman pri pour liberasyon bokou dimoun.” (Mat. 20:28) Alor Zezi ti donn sa komann avek son bann disip: ‘Kontinyen fer sa an mon memwar.’ (Lik 22:19) Eski lapresyasyon pour sa kado presye ki Bondye in donn ou in pous ou pour konmans fer bann preparasyon pour obzerv sa lokazyon ki demontre sa pli gran akt lanmour?—Zan 3:16.
2. Ki mannyer nou kapab prepar nou leker pour Memoryal?
2 Prepar ou Leker: Par reflesir lo sa ki ti arive lo sak sa bann dernyen zour lavi Zezi konman en imen, nou kapab prepar nou leker pour obzerv Memoryal. (Ezra 7:10) Pour ed nou fer sa, en progranm spesyal pour lir Labib i trouve dan sa pti liv Egzamin Labib—2007 e lo Calendar 2007. Sa bann zour ki nou sipoze lir sa progranm lektir Labib i tonm preski menm zour kot sa bann levennman ki relye avek lanmor Zezi ti arive dapre kalandriye ki nou servi ozordi. Bann zour ek dat dan bann resi Labib i baze lo kalandriye Zwif, e zot ti konmans kont en zour apartir soley kouse ziska lot soley kouse. Sa diferans in ganny pran an konsiderasyon e i’n ganny reflekte dan sa progranm dan lektir pour Memoryal. Si nou revwar sa bann lenformasyon dan sa lektir Labib e reflesir lo grander lanmour Zeova dan lapriyer, sa pou ed nou tir bokou byenfe par obzerv Memoryal.
3. Ki mannyer nou kapab ed bann ki enterese ek bann inaktif benefisye avek Memoryal?
3 Envit lezot pour asiste: En sipleman dan Nou Minister Rwayonm Fevriye ti anons en kanpanny spesyal pour envit dimoun pour sa levennman enportan. Eski ou’n fer laranzman pour partisip plennman dan sa kanpanny? Eski ou’n fer en lalis bann dimoun ki ou konnen ki ou ti a kontan envite. Eski ou’n konmans kontakte zot? Fer plan pour ariv ase boner sa zour swar Memoryal pour akey bann ki ou’n envite ek lezot ki’n vini. Petet ou pou anvi asiz obor zot, pour fer sir ki zot annan en Labib ek en liv kantik. Entrodwir zot avek lezot dan kongregasyon. Apre Memoryal pran letan pour reponn zot kestyon. Envit zot pour asiste sa diskour spesyal ki pou ganny donnen le 15 Avril. Bann ansyen sirtou i devret enterese pour fer sir ki bann ki ti asosye avek kongregasyon me ki’n vin inaktif i ganny envite Memoryal ek diskour spesyal.
4. Ki mannyer nou kapab ed dimoun pour kontinyen progrese spirityelman apre Memoryal?
4 Ed bann Nouvo ki enterese ek bann Inaktif pour fer progre: Sa enn ki pou donn diskour zour Memoryal pou eksplik bann laranzman letid Labib an bref, e ankouraz bann nouvo ki enterese pour kontinyen aprann konn Zeova. Ou kapab servi son bann komanter konman en baz pour ofer bann ki ou’n envite pour aprann plis lo Zeova. Si zot pa pe etidye Labib, fer sir ki ou rann zot en vizit zis apre Memoryal e montre zot konman en letid Labib gratwit i deroule. Zot pou bezwen asiste bann renyon kongregasyon, si zot oule progrese spirityelman. (Ebr. 10:24, 25) Avek sa antet, ankouraz zot pour konmans asiste bann renyon regilyerman. Bann ansyen i devret fer laranzman pour vizit bann Kretyen inaktif ki’n asiste Memoryal e ed zot pour reflesir plis ankor lo sa ki ti ganny dir dan diskour. Sa i kapab ed zot repran zot aktivite dan kongregasyon.
5. Ki mannyer ler nou obzerv Memoryal i benefisye nou?
5 Memoryal i donn nou en loportinite pour seryezman reflesir lo sa ki Zeova ek Zezi in fer pour nou. En tel refleksyon pou fer nou lanmour pour zot vin pli for e i pou annan en lefe lo nou kondwit. (2 Kor. 5:14, 15; 1 Zan 4:11) La i moman pour nou konmans prepar nou ek bann ki enterese pour sa lokazyon enportan pandan ki nou “anons lanmor Senyer Zezi.”—1 Kor. 11:26.