Kontinyen “fer sa” Memoryal pou ganny fer le 5 Avril
1. Akoz Memoryal i sitan enportan?
1 Kontinyen “fer sa an mon memwar.” (Lik 22:19) Atraver sa parol, Zezi ti pe ordonn son bann zapot pour komemor son lanmor. Sakrifis Zezi in anmenn bokou byenfe e akoz sa, napa en lot zour apard Memoryal sak lannen ki pli enportan ouswa ki annan plis valer pour bann Kretyen. Anmezir ki Memoryal ki pou ganny fer le 5 Avril i aprose, ki mannyer nou kapab demontre nou rekonesans anver Zeova?—Kol. 3:15.
2. Ki mannyer nou kapab demontre lapresyasyon pour Memoryal atraver letid ek meditasyon?
2 Preparasyon: Ordinerman nou fer preparasyon pour en keksoz ki enportan pour nou, pa i vre? Nou kapab prepar nou leker pour Memoryal kan nou egzamin e medit an fanmir lo bann dernyen keksoz ki ti arive dan lavi Zezi lo later. (Ezra 7:10) Dan kalandriye e dan liv Egzamin Labib sak zour, i annan en lalis verse Labib ki koz lo bann dernyen zour lavi Zezi lo later e i annan en lalis pli detaye ankor dan Latour Veyer le 1 Fevriye 2011 lo paz 23-24 an Angle ki fer referans avek liv Greatest Man.
3. Ki mannyer nou kapab demontre nou lapresyasyon pour Memoryal an rapor avek predikasyon?
3 Predikasyon: Nou osi kapab demontre nou lapresyasyon par fer plis ankor dan predikasyon. (Lik 6:45) Apartir Sanmdi le 17 Mars, i pou annan en kanpanny spesyal pour envit bann dimoun Memoryal. Eski ou kapab aziste ou progranm pour pas plis letan dan predikasyon oubyen menm pour fer pionye asistan? Akoz ou pa koz lo la dan ou prosen Ladorasyon fanmir?
4. Ki byenfe nou gannyen ler nou asiste Memoryal?
4 Pa nou ganny en kantite byenfe ler nou asiste Memoryal sak lannen! Nou lazwa ek lanmour pour Bondye pou ogmante anmezir nou pran letan pour reflesir lo zenerozite Zeova ki’n donn son sel Garson konman sakrifis. (Zan 3:16; 1 Zan 4:9, 10) Sa i pous nou pour nepli viv pour nou menm. (2 Kor. 5:14, 15) I osi motiv nou pour loue Zeova an piblik. (Ps. 102:19-21) Bann serviter Zeova i vreman kontan pour asiste Memoryal le 5 Avril pour “anons lanmor Senyer Zezi.”—1 Kor. 11:26.