Eksprim ou rekonesans pour sa pli gro kado ki Bondye in donnen
1. Akoz nou devret espesyalman rekonesan anver Zeova?
1 Parmi sa kantite “don ekselan” ki Zeova in donn nou, sakrifis son Garson byenneme i sa pli gro kado ki tou. (Zak 117) Gras a sa sakrifis, i posib pour nou ganny en kantite benediksyon enkli ganny pardonnen nou pese. (Efe. 1:7) Nou devret touzour rekonesan pour sa kado. Pandan sezon Memoryal, nou devret espesyalman pran letan pour medit lo sa kado presye.
2. Ki mannyer nou menm, nou kapab devlop lapresyasyon pour sa sakrifis e ed nou fanmir osi pour fer parey?
2 Devlop lapresyasyon: Pour ed ou fanmir devlop lapresyasyon pour sa sakrifis, pandan bann semenn avan Memoryal ki tonm le 30 Mars, akoz ou pa servi sa letan kan zot pe fer ladorasyon an fanmir pour revwar bann lenformasyon lo sa ranson? Ou kapab osi fer lektir Labib pour Memoryal sak zour an fanmir. Ou devret personnelman reflesir lo ki mannyer ou’n benefisye avek sa ranson e ki pwennvi sa ranson i fer ou annan lo Zeova, lo ou menm, lo lezot e lo lavenir. Ou pou osi vwar li itil pour esey sant sa de nouvo kantik ki pou ganny sante zour Memoryal, kantik nimero 8 ek 109.—Ps. 77:12.
3. Ki mannyer nou kapab eksprim nou rekonesans?
3 Eksprim ou rekonesans: Lapresyasyon pour sa ranson i pous nou pour koz avek lezot lo Zeova e lo sa gran lanmour ki i’n demontre par anvoy son Garson lo later. (Ps. 145:2-7) Pandan mwan Mars, Avril ek Me, serten fanmir i eksprim zot rekonesans par fer laranzman pour ki omwen en manm zot fanmir i pran servis pionye asistan. Si i pa posib, eski ou kapab “servi byen tou bann lokazyon” pour partisip plis dan predikasyon? (Efe. 5:16) Sa rekonesans ki nou annan pou motiv nou pour ankouraz lezot asiste Memoryal ansanm avek nou. (Rev. 22:17) Konmans fer en lalis bann retourn vizit, etidyan Labib, manm fanmir, koleg travay ek vwazen, pour envit zot Memoryal e apre partisip plennman dan sa kanpanny pour distribye sa lenvitasyon spesyal pour Memoryal.
4. Ki mannyer nou kapab byen servi sa sezon Memoryal?
4 Sezon Memoryal i donn nou lezot loportinite pour montre Zeova ki kantite nou apresye sa kado ki i’n ofer limanite. Annou servi sa letan pour ogmant e eksprim nou rekonesans pour sa ranson e pour tou “larises san limit Kris.”—Efe. 3:8.