Bann Lasanble—Moman pour rezwir!
1 Bann lasanble Temwen Zeova i bann gran moman lazwa. Pour plis ki san lannen, sa bann rasanbleman in kontribye dan ogmantasyon ki’n arive dan nou lorganizasyon. Depi okonmansman, nou’n vwar bann gran benediksyon Zeova lo nou travay mondyal. Pandan nou premye lasanble dan letan modern, an 1893, Chicago, Illinois, 70 dan sa 360 ki ti asiste ti batize pour montre ki zot ti’n voue avek Zeova. Lannen pase, bann sesyon sa Lasanble Distrik “Pratikan Parol Bondye” ki ti ganny fer dan lemonn antye ti regroup en lasistans 9,454,055 dimoun e 129,367 ti pran batenm. Eski sa pa i en rezon merveye pour rezwir!
2 Depi letan Biblik, bann rasanbleman pep Bondye in en mwayen tre remarkab pour transmet lansennyman sorti kot Zeova. Dan letan Ezra ek Neemya, bann dimoun ti ekout Lalwa pe ganny lir “depi soley leve ziska midi.” (Nee. 8:2, 3) Vi ki pandan sa lokazyon zot ti pli byen konpran Lalwa, sa bann dimoun ti eksperyans “en gran lazwa.” (Nee. 8:8, 12) Nou osi nou rezwir akoz bann lasanble i donn nou en bon loportinite pour resevwar bon lansennyman ek nouritir spirityel “dan en letan konvenab” sorti kot Zeova atraver “lesklav fidel e pridan.” (Mat. 24:45, NW ) Depi ki Zezi ti dir ki zonm i bezwen viv lo “tou parol ki sorti [par] labous [Zeova],” bann lasanble i tre enportan pour nou boner spirityel.—Mat 4:4.
3 I vo Lapenn fer tou Zefor pour asiste: Nou tou nou bezwen fer li konman en lobzektif personnel pour prezan dan sa Lasanble Distrik “Bann Ansennyan Parol Bondye” pour sa lannen. Nou devret plàn pour ariv boner sak zour e reste ziska nou zwenn ansanm pour dir “Amenn!” pour lapriyer final. Pour nobou akonplir sa, kekfwa nou pou bezwen aziste nou progranm. Pour pran konze dan nou landrwa travay pour kapab asiste lasanble i kapab anmenn serten difikilte. Nou bezwen defann nou pozisyon, pa krwar ki enn ou de zour konze pou vin par sans. Si nou bezwen akomodasyon oubyen transpor, nou bezwen fer bann laranzman boner. Nenport zefor ki nou pour fer i pou vo lapenn!
4 Pep Zeova pa mezir bann benediksyon lasistans en lasanble lo kantite larzan ki’n ganny depanse pour kapab asiste. Not legzanp detrwa dimoun ki ti determinen pour asiste sa Lasanble Enternasyonal Lavolonte Divin an 1958 par bann Temwen Zeova dan lavil New York. En frer ti ferm son biznes konstriksyon pour de semenn pour volonterman donn son led e pour asiste lasanble. Dan Virgin Islands, en frer ti vann senk arpan later pour ki son fanmiy antye ki ti annan sis zot ti kapab asiste. En zenn koup ti vann zot bato pour kapab anmenn zot trwa zanfan, ant laz de mwan ziska set an, lasanble. Trwa frer menm fanmiy an Kaliforni ti ganny dir ki si zot absan dan zot louvraz, zot pour nepli annan louvraz letan zot retournen. Me toutfwa sa, pourtan, pa ti anpes zot asiste sa lasanble ki ti inoubliyab
5 Zeova i rekonpans nou Zefor senser: Zeova i vwar e beni bann zefor son pep. (Ebr. 6:10) Par egzanp, dan Lasanble Theocracy’s Increase an 1950, sa bann ki ti’n asiste ti antann sa diskour markan “Bann Nouvo Sistenm.” Frer Frederick Franz ti revey e stimil lentere tou dimoun par demande: “Eski bann asistan sa lasanble enternasyonal i ere pour konnen ki la, ozordi, parmi nou i annan en serten nonm bann fitir prens sa nouvo later?” Plis ki senkant lannen plitar, nou ankor pe rezwir pli bon konpreansyon Psonm 45:16.
6 Apre ki i ti’n asiste sa lasanble distrik lannen pase, en sef fanmiy rekonesan ti ekri: “Bann frer, zot pa pou zanmen konnen konman ki sa lasanble in sov lavi. Mon fanmiy ti enstal dan en lavil pour rezon lanplwa, zis pour vwar nou spirityalite afebli. . . . Nou lobligasyon Kretyen ti ganny neglize. Nou ti menm aret asiste bann renyon e pa partisip ditou dan predikasyon. . . . Sa lasanble in redonn nou lafors, e ankor enn fwa nou pe met bann lobzektif spirityel e organiz nou pour akonpli zot.”
7 Zeova pe fourni nou avek bann nouritir spirityel ki nou bezwen. I’n etal en latab ris dan bann lasanble. Nou lapresyasyon pour sa provizyon i devret fer nou kapab dir sa ki Korney ti dir letan i ti ganny vizite par zapot Pyer: “Aprezan la nou tou, nou’n rasanble devan Bondye pour ekout mesaz ki [Zeova] in konfye ou.” (Akt 10:33) Annou fer li nou lobzektif pour “rasanble devan Bondye” dan tou sesyon sa Lasanble Distrik “Bann Ansennyan Parol Bondye” pour sa lannen e rezwir!